Sá merkilegi atburður varð á Selfossi 4. maí að Fjölbrautaskóli Suðurlands lauk fimmta og síðasta Græna skrefinu. Olga Lísa, skólameistari, og Karl Ágúst, fulltrúi umhverfisnefndar, tóku við viðurkenningunni og sögðu frá þeim árangri sem náðst hefur í Grænu skrefunum. Þar má nefna stórbætta flokkun sorps meðal nemenda, áherslu á umhverfisvænni byggingarvið í verknámsgreinum, endurvinnslu sértæks úrgangs og talsverðan sparnað í hitunarkostnaði.

Skólinn hefur lengi lagt áherslu á samband manns og náttúru með verklegri og bóklegri kennslu í umhverfisfræði, sem er nú skyldufag í skólanum. Nemendur taka þátt í skógræktarstarfi á svæðinu og eiga fulltrúa í innra umhverfisstarfi skólans.

Við hjá Grænum skrefum óskum Fjölbrautaskóla Suðurlands innilega til hamingju með fimmta skrefið og óskum þeim góðs gengis við að viðhalda þeim fyrirmyndarárangri sem náðst hefur.

Það er hægt að fara margar leiðir til þess að uppfylla aðgerð um skiptistöð í skrefi 4. Stofnanir hafa sett upp skiptimarkað fyrir föt, öskudagsbúninga, bækur eða jafnvel púsluspil. Starfsmannafélag Umhverfisstofnunar í Reykjavík hefur efnt til plöntu-potta-fræ og afleggjara skiptimarkaðs. Starfsfólk er hvatt til að mæta með afleggjara af plöntum, gamla potta sem þau hafa ekki not fyrir lengur, fræ sem þau komast ekki yfir að nota eða annað sem tengist plöntum og garðyrkju. Þetta sýnir það vel að möguleikarnir eru endalausir og við hvetjum stofnanir til að setja upp hvers konar skiptistöðvar sem hentar þeim. 

Aðgerðin hljómar svona í heild sinni:

Við höfum sett upp skiptistöð (borð og/eða fataslá) þar sem starfsmenn geta komið með hluti að heiman sem þeir vilja gefa áfram og aðrir geta fengið, annaðhvort í afmarkaðan tíma árlega eða til frambúðar.

Við vekjum athygli á að opnað hefur verið fyrir skráningu í Hjólað í vinnuna og hvetjum alla vinnustaði til að skrá lið sín til keppni.

Flest þekkjum við Hjólað í vinnuna, enda keppnin orðin rótgróin, en hún er á vegum almenningsíþróttasviðs ÍSÍ. Keppnin stendur yfir frá 4. maí til 24. maí, og því um að gera að skrá liðin sín sem fyrst svo að allur keppnistíminn nýtist sem best. Allar upplýsingar um skráningar og reglur má finna á heimasíðu verkefnisins. 

Vorin eru einnig góður tími til að yfirfara samgöngusamninga vinnustaðarins, enda er oft auðveldara að byrja að hjóla og ganga í vinnuna þegar sól fer að hækka á lofti og fuglarnir syngja.

Rannsóknir hafa sýnt að þau sem ganga eða hjóla til vinnu eru að jafnan ánægðari og afkastameiri en þau sem mæta til vinnu í bíl og samgöngusamningar eru eitt best atækið sem vinnuveitendur hafa til að hvetja starfsfólk til visvænna samgangna. Það getur einnig verið góð hugmynd að bjóða starfsfólki sérstaklega upp á sumaramning þar sem mörgum þykir auðveldara að skuldbinda sig til að hjóla og ganga á þeim tíma árs.

Hér má finna leiðbeiningar til vinnustaða um gerð samgöngusamninga.

Sunnudaginn 24. apríl næstkomandi er Stóri plokkdagurinn sem haldinn er af hópnum Plokk á Íslandi. Við hvetjum ríkisstofnanir og fyrirtæki til að taka þátt í plokkinu með því að vekja athygli á plokkdeginum og skipuleggja tíma dagana í kringum plokkdaginn þar sem starfsmenn geta plokkað í nærumhverfi vinnustaðarins.

Allir mega stofna viðburði á Stóra Plokkdaginn á samfélagsmiðlum, tengja þá við Plokk á Íslandi, fá merkingar frá Plokk á Íslandi. Hægt er að nálgast merki Plokkdagsins á plokk.is og er öllum heimilt að nota það sér að kostnaðarlausu. Sveitafélög landsins auglýsa sína viðburði og hvernig hægt er að bera sig að með frágang, flokkun eða urðun á hverjum stað fyrir sig.

Rúmlega sjöþúsund og fjögurhundruð manns tilheyra samfélaginu Plokk á Íslandi á Facebook og þessi hópur er kominn á fullt í að plokka bæði í sínu umhverfi. Að sögn plokkara felst fegurðin í plokkinu einna helst í því hversu einfalt það er og hversu auðvelt er að taka þátt. Því fylgir góð og heilbrigð hreyfing, útivera og félagskapur.