Fjölbrautaskóli Snæfellinga fékk fyrsta skrefið á dögunum og óskum við þeim kærlega til hamingju með árangurinn!
Ýmsar breytingar voru gerðar vegna innleiðingar fyrsta skrefsins, sem dæmi má nefna nýja hjólaboga sem komu rétt í tæka tíð fyrir sumarið og Hjólað í vinnuna átakið sem við hvetjum alla vinnustaði til að taka þátt í.
Glæsilegir hjólabogar við enn fallegra útsýni
Menntaskólinn á Tröllaskaga hefur lokið við að stíga 5 Græn skref.
Skólinn hlaut 1 skrefið árið 2018 og hefur síðan þá stigið skrefin jafnt og þétt.
Menntaskólinn á Tröllaskaga er einnig Grænfánaskóli og leggur þar að auki upp úr því að miðla umhverfisþekkingu til nemenda sinna og starfsfólks og tekur þannig heildstætt á umhverfismálunum.
Við óskum skólanum til hamingju með skrefið og hlökkum til að fylgjast með starfi hans áfram!
Sýslumaðurinn á Vesturlandi hlaut fyrstur allra sýslumannsembætta sitt fyrsta græna skref þann 9. mars síðastliðinn. Hjá sýslumanninum á Vesturlandi starfa 18 starfsmenn á fimm starfsstöðvum, það eru skrifstofur á Akranesi, Borgarnesi, Stykkishólmi, og tvö útibú í Búðardal og Snæfellsbæ (Hellissandi).
Starfsmenn skrifstofu sýslumanns á Vesturlandi hafa sýnt fram á að innleiðing Grænna skrefa getur tekið stuttan tíma ef að viljinn og áhuginn er fyrir hendi og eru þau komin langleiðina með annað skrefið nú þegar!
Við óskum þeim kærlega til hamingju með góðan árangur.
Fyrir helgi kláraði Framhaldsskólinn í Vestmannaeyjum (FíV) 1. Græna skrefið. Allir þeir sem fylgjast með fréttum, og kannski sér í lagi fréttum um umhverfismál, vita að við sem samfélag erum að glíma við mörg mjög alvarleg umhverfismál, og stundum er auðvelt að missa móðinn og fyllast bölsýni. Það er þessvegna sem það er svo mikilvægt að fagna góðum árangri, svo við höldum með krafti áfram inn í næstu skref. FíV flugu í gegnum fyrsta skrefið og því verður spennandi að fylgjast með þeim hlaupa í gegnum næstu.
Umboðsmaður barna hlaut á dögunum viðurkenningu fyrir að hafa lokið fyrsta græna skrefinu. Hjá Umboðsmanni barna starfa 5 starfsmenn sem skráðu þau sig til leiks í loks árs 2020 og voru ekki lengi að framkvæma aðgerðir fyrsta skrefsins og byrja á næstu skrefum.
Við heyrum stundum að það taki því ekki fyrir vissa vinnustaði að taka þátt í Grænu skrefunum sökum smæðar. En staðreyndin er sú að allur rekstur hefur einhver áhrif á umhverfið; starfsmenn þurfa að ferðast til og frá vinnu og jafnvel í vinnu, við þurfum rafmagn og hita, kaupum vörur, borðum mat og starfseminni fylgir alltaf einhver úrgangur. Eitt aðalmarkmið Grænna skrefa er að efla umhverfisvitund starfsmanna og það er sannarlega jafn mikilvægt á litlum vinnustöðum sem og stórum.
Við óskum starfsfólki Umboðsmanni til hamingju með árangurinn!
Samgöngustofa hlaut sitt fyrsta skref þann 24. mars síðastliðinn og hélt fjarfögnuð á dögunum. Samgöngustofa er á góðri siglingu og vinnur nú hörðum höndum að öðru skrefinu. Góður andi er yfir verkefninu hjá Samgöngustofu og tekur allt starfsfólkið þátt í að innleiða Grænu skrefin.
Við óskum Samgöngustofu kærlega til hamingju með að hafa lokið sínu fyrsta Græna skrefi!