Að hjóla er raunverulegur valkostur
Háskóli Íslands gaf út kort fyrir starfsmenn og nemendur þar sem hvatt er til þessa að fólk hjóli til og frá skólanum. Á kortinu má sjá hversu langan tíma það tekur fólk að hjóla einn km. Bendum líka á vefsíðu Hjólafærni en þar er hægt að skoða tímavegalengdir í nokkrum sveitarfélögum.
Nokkrar hjólastaðreyndir:
1. Hjólreiðar eru frábær heilsurækt
2. Reiðhjólið er umhverfisvænt
3. Á hjólinu sleppurðu við umferðaröngþveiti
4. Tími gefst til að skoða sig um og njóta útiveru
5. Góð hjólastæði eru upp við byggingar Háksólans og enginn tími fer í að leita að bílastæði
6. Reiðhjólið er ódýrt í rekstri í samanburði við einkabílinn
Forsætisráðuneytið með skref 2 og 3
Nú var forsætisráðuneytið að ljúka innleiðingu 2. og 3ja skrefsins. Verkefnið hefur gengið mjög vel hjá þeim, bæði er umhverfisráðið mjög virkt í að upplýsa starfsmenn og að innleiða aðgerðir. Einnig eru starfsmenn mjög jákvæðir fyrir verkefninu og taka öllum breytingum af jafnaðargeði, vilja jafnvel að hlutir gangi enn hraðar fyrir sig :). Katrín Jakobsdóttir, forsætisráðherra tók á móti viðurkenningunni. Innilega til hamingju með árangurinn.
Lengjum líf hlutanna okkar
Við kynnum nýjan facebook hóp sem heitir Græn skref – Nytjamarkaður 🙂 Borið hefur á því að margar stofnanir sitja uppi með allskonar dót, húsgögn og tæki sem þær vita ekki hvað þær eiga að gera við. Úrgangsmyndun hefur aukist svo mjög að t.d. Góði hirðirinn þarf að henda miklu magni af nothæfum hlutum í hverri viku. Við viljum spyrna á móti þessari þróun og hjálpa hvort öðru að búa til umhverfi þar sem við getum skipt, lánað, selt og gefið nothæfa hluti okkar á milli. Vonandi taka ríkisstofnanir vel í þetta verkefni hjá okkur og athugið að þær þurfa ekki að vera í Grænu skrefunum til að nota hópinn. Við viljum líka að hver sem er geti fengið eða keypt hlutina (almenningur og fyrirtæki líka) en til að hafa smá stjórn á umfanginu þá mega aðeins ríkisstofnanir auglýsa hluti. Endilega deilið síðunni áfram til starfsmanna ríkisstofnana, sérstaklega þeirra sem fara með innkaup, umsjón fasteigna, umhverfismál eða annarra sem gætu haft gagn af henni.
Er einhver að lesa tímaritin, blöðin og auglýsingapóstinn?
Mörg lítil atriði geta hafi mikil neikvæð áhrif eða mikil jákvæð áhrif. Af því að það er svo sjálfsagt að fá inn um póstlúguna allskonar blöð, frípóst, auglýsingapóst og annað að við gleymum oft að hugsa út í þau neikvæðu umhverfisáhrif sem felast í framleiðslu á pappír, tímaritum, blöðum og auglýsingaefni, dreifingu og förgun á þessu öllu. Við ættum því öll að velta fyrir okkur hvort við þurfum á þessu að halda? Landsvirkjun ákvað að draga úr þessari sóun með því að segja upp áskrift af öllum tímaritunum sínum, þó áfram sé hægt að fá þau rafrænt. Með þessu spöruðu þau kolefnislosun á ári sem jafngildir akstri tvisvar sinnum um Íslands eða fjórar ferðir frá Reykjavík til Fljótsdals. Munum margt smátt gerir eitt stórt 🙂
Tvö Græn skref í höfn hjá ÚUA
Úrskurðarnefnd umhverfis- og auðlindamála var að fá afhenta viðurkenningu fyrir að uppfylla fyrstu tvö Grænu skrefin. Nanna Magnadóttir forstöðumaður tók á móti viðurkenningunni. Þó að nefndin sé lítil og starfsmenn fáir þá skiptir allt máli. Nú er ekki boðið uppá neitt einnota fyrir fundi og menn eru meðvitaðri um flokkun og sóun á rafmagni, pappír og öðru. Þau eru staðráðin í að vinna hratt og vel að næstu skrefum.
Virka samgöngusamningar?
Vistbyggðaráð bauð uppá áhugavert morgunspjall um samgöngusamninga þar sem spurningin var „virka þeir?“ Erindi frá fjórum aðilum má sjá hér. Hólmfríður Sigurðardóttir sagði frá reynslu Orkuveitu Reykjavíkur en þar eru 35% starfsmanna með samgöngusamning. Hulda Steingrímsdóttir greindi frá samningunum hjá Landspítalanum en þó að um 20% starfsmanna þar nýti sér slíka samninga þá ferðast um 40% þeirra með vistvænum hætti. Sesselja Traustadóttir sagði frá verkefninu Hjólavottun og Elín Vignisdóttir sagði frá reynslu Verkís. Fundarmenn voru sammála um að samgöngusamningar geta virkað sem hvati til þess að starfsmenn nýti sér umhverfisvænni samgöngumáta og þeir eru í raun nauðsynlegir. Síðan eru ákveðnir þættir sem hindra notkun umhverfisvænni samgöngumáta: strætóleiðir ekki hentugar, veðurfar, þarf að sinna fjölskyldu og skutli, meiri tími fer í slíkan ferðamáta og fleira. Verkefni dagsins er því að finna lausnir á því sem hindrar fólk í að nota umhverfisvænni samgöngur eins og að hækka styrkinn, bjóða uppá að starfsmenn geti skutlast í nauðsynleg erindi á vinnubíl á vinnutíma, að sá tími sem fer í ferðalögin verði skilgreind sem vinnutími og fleira.