Öll skrefin í höfn hjá Landsvirkjun
Landsvirkjun hefur nú lokið við að innleiða öll fimm Grænu skrefin í höfuðstöðvum sínum á Háaleitisbraut. Greinilegt er að bakvið metnaðarfullt umhverfisstarf Landsvirkjunar er samstilltur og drífandi hópur af öllum sviðum rekstursins sem lætur verkin tala og velta við hverjum steini. Við óskum Landsvirkjun innilega til hamingju með áfangann!
Á myndinn eru frá vinstri: Ingvar Sigurðsson matreiðslumeistari; Sæmundur Pálsson og Kjartan Viðarsson umsjónarmenn hússins; Ingibjörg Yrsa Ellertsdóttir og Ólöf Lovísa Jóhannsdóttir umhverfisdeild; og Hildur Harðardóttir hjá Umhverfisstofnun.
Mötuneyti til fyrirmyndar
Það er gaman að sjá hvað mörg mötuneyti eru farin að vanda til verka þegar kemur að matarsóun, endurvinnslu og að bjóða uppá græna valkosti og þ.a.l. minnka framboð af rauðu kjöti. Í mötuneyti Landsvirkjunar á Háaleitisbraut stendur Ingvar Sigurðsson kokkur vaktina. Ingvar er snillingur í því að fullnýta hráefni og hann sér til þess að allur úrgangur sem fellur til í eldhúsinu sé rétt flokkaður til endurvinnslu. Ingvar býður starfsfólki að taka með sér afganga heim í margnota matarílátum sem það kemur sjálft með. En þá afganga sem eftir verða hikar Ingvar ekki við að nýta í nýjan og girnilegan rétt. Restar gærdagsins verða því kræsingar á ný! Einnig er gaman að segja frá því að vegan úrvalið í hlaðborðinu rýkur út og eftirspurnin eykst stöðugt. 
Tvö ráðuneyti fá viðurkenningu fyrir þrjú græn skref
Samgöngu- og sveitarstjórnarráðuneytið og dómsmálaráðuneytið hafa nú innleitt fyrstu þrjú grænu skrefin á einu bretti. Ráðuneytin fengu afhenta viðurkenningu fyrir árangurinn í dag og voru að vonum stolt af sér og sínum. Við óskum ykkur til hamingju og gangi ykkur vel með framhaldið!
Á myndinni eru Dröfn Gunnarsdóttir hjá samgöngu- og sveitastjórnarráðuneytinu, Birgitta Steingrímsdóttir starfsmaður Umhverfisstofnunar og Bergur Sigurjónsson hjá Dómsmálaráðuneytinu.
Heyrnar- og talmeinastöð Íslands tekur þátt í Grænum skrefum
Með skráningu sinni er Heyrnar- og talmeinastöð íslands 72. stofnunin til að taka þátt í Grænu skrefunum. 22 starfsmenn starfa hjá Heyrnar- og talmeinastöðinni og hlökkum við mikið til að feta með þeim skrefin góðu.