Embætti landlæknis stígur með okkur skrefin
Við bjóðum Embætti landlæknis velkomið til leiks og hlökkum mikið til að vinna að umhverfismálunum með þeim 70 starfsmönnum sem þar starfa.
Embætti lögreglustjóra og sýslumanns á Norðurlandi eystra skrá sig til leiks
Það gleður okkur hjá Grænu skrefunum að fá stofnanirnar tvær með í verkefnið og bjóðum við þær hjartanlega velkomnar. Bæði embættin eru fyrst sinnar tegundar til að taka þátt í Grænu skrefunum en þau heyra bæði undir dómsmálaráðuneyti. Við hvetjum að sjálfsögðu önnur lögreglu- og sýslumannsembætti til að taka embættin á Norðurlandi eystra til fyrirmyndar og hefja grænu vegferðina með okkur.
Það er inn að vera í rusli
Við mælum með því fyrir alla vinnustaði sem vilja taka sorpflokkun föstum tökum að fá fræðslu frá sinni sorphirðuþjónustu. Starfsfólk Vinnumálastofnunar og Umhverfisstofnunar fékk nýverið kynningar frá Terra sem áður hét Gámaþjónustan. Mikil ánægja var með kynningarnar og gáfu fulltrúar Terra sér góðan tíma í að svara spurningum. Áhugavert verður að sjá hvort kynningarnar skili sér í hærra endurvinnsluhlutfalli hjá stofnununum tveimur. Að sögn Vinnumálastofnunar er inn að vera í rusli og tökum við í Grænu skrefunum heilshugar undir það!
Fulltrúar Terra með kynningu hjá Vinnumálastofnun
Starfsmenn Umhverfisstofnunar hlýða áhugasamir á kynningu Terra
Það er ekki alltaf augljóst hvernig skal flokka hina ýmsu hluti og því gott að fara yfir helstu vafaatriði með sorphirðuþjónustu stofnunarinnar
Minni orkunotkun og aukið öryggi með vistakstri
Í skrefi tvö í Grænu skrefunum snýr ein aðgerð að vistakstri en hún hljóðar svona: „Starfsfólk okkar sem notar bíl mikið vegna vinnu sinnar hefur farið á vistakstursnámskeið“. Hér höfum við einnig hvatt stofnanir til að fá fyrirlestur um vistakstur fyrir allt starfsfólk enda fræðsla sem á sannarlega erindi við alla sem nota bíl, hvort sem það er í leik eða starfi. Með því að breyta ökuhegðun okkar og temja okkur vistakstur stuðlum við að minni útblæstri og mengun, minnkum slit á dekkjum og vegum og drögum þannig úr magni svifryks í umhverfinu og spörum auk þess pening. Starfsfólk Þjóðskrár Íslands fékk fyrirlestur um vistakstur á dögunum og starfsfólk Vatnajökulsþjóðgarðs skellti sér á vistakstursnámskeið í Ökuskólanum í Mjódd. „Þjóðgarðurinn okkar er stór og dreifður og þurfa starfsmenn stundum að aka langar leiðir til að sinna verkefnum og því er mikilvægt að temja sér vistakstur. Með slíku ökulagi er hægt að minnka orkunotkun bifreiða um 10-15% auk þess sem vistakstur getur stuðlað að meira akstursöryggi. Starfsfólk þjóðgarðsins lærði margt nýtt á vistakstursnámskeiðinu og hlökkum við til að sjá árangurinn í grænu bókhaldi þjóðagarðsins“, segir í frétt á vef Vatnajökulsþjóðgarðs.
Starfsfólk Vatnajökulsþjóðgarðs og Sigurður E. Steinsson frá Ökuskólanum í Mjódd.
Skiptimarkaður á Umhverfisstofnun
Í tilefni Evrópsku nýtnivikunnar settu meðlimir teymis græns samfélags hjá Umhverfisstofnun upp skiptimarkað. Öllu starfsfólki býðst að koma með föt og hluti á markaðinn og taka svo það sem þeim líst vel á. Framtakið hefur gengið vonum framar og er fólk bæði duglegt að koma með hluti á markaðinn sem og að framlengja líf annarra hluta. Margir hafa fundið sér ný föt og fína muni til heimilisins og enn fleiri dót, búninga og föt á börnin. Það sem ekki öðlast nýtt líf á skiptimarkaðnum fer í Góða Hirðinn hjá Sorpu eða í fatasöfnun Rauða Krossins.
Með því að setja upp skiptimarkað freistum við þess að lengja líftíma hlutanna og svo er þetta bara ansi skemmtilegt líka! Eftirfarandi punkta sendum við á starfsfólk til að hvetja þá til að taka þátt:
🎅Kjörið tækifæri fyrir jólasveina að skiptast á dóti í skóinn
👗Eru flíkur í fataskápnum ykkar eða barnanna sem gætu öðlast nýtt líf hjá samstarfsfólki?
🤸♀️Ef þú ætlar í helgartiltekt um helgina þá er tilvalið að koma með hluti sem þú notar ekki lengur á markaðinn – allir hlutir velkomnir!
🌿Hver veit nema þú finnir jóladressið eða jólagjafirnar á skiptimarkaðnum
Ýmsir gullmolar leynast á skiptimarkaðnum
Gott að standa upp frá tölvunni, fá sér kaffibolla og kíkja á skiptimarkaðinn.
Nýtnivikan hefst laugardaginn 16. nóvember
Dagana 16.-24. nóvember næstkomandi stendur Evrópsk nýtnivika yfir en markmið átaksins er að hvetja fólk til að draga úr óþarfa neyslu, nýta hluti betur og draga þannig úr myndun úrgangs. Þema þessa árs er fræðsla og miðlun um úrgangsmál undir slagorðinu Minni sóun – minna sorp. Fyrirtæki, stofnanir og almenningur eru hvött til þess að fræðast um úrgangsmál og koma þeirri þekkingu í framkvæmd með því að breyta daglegum neysluvenjum sínum og draga þannig úr myndun úrgangs.
Á heimasíðu Umhverfisstofnunar má finna alls kyns upplýsingar og fróðleik um úrgangsmál, eins og tölfræði um úrgangsflokka og hvernig okkur gengur að uppfylla sett markmið, stefnu ríkis og sveitafélaga í úrgangsmálum, áhugaverðar upplýsingar um flokkun og endurvinnslu og almenna umfjöllun um neyslu og innkaup. Umhverfisstofnun stendur að viðburðum í tengslum við nýtnivikuna, bæði í Reykjavík og á Akureyri, og má nálgast allar upplýsingar um þá á Facebook síðu átaksins.
Við hvetjum að sjálfsögðu alla þátttakendur Grænna skrefa til að nýta sér nýtnvikuna og vekja athygli á málstaðnum. Hér að neðan eru hugmyndir að því hvað stofnanir geta gert en ítarlegri leiðbeiningar er að finna hér.
Svanurinn og hringrásarhagkerfið
Ársfundur umhverfismerkisins Svansins fer fram á Grand Hótel Reykjavík þriðjudaginn 19. nóvember næstkomandi. Á fundinum verður áhersla á hringrásarhagkerfið, þau tækifæri sem liggja í því og hvernig Svanurinn styður fyrirtækin í þeirri vegferð. Við mælum eindregið með því að þátttakendur Grænna skrefa sendi fulltrúa á fundinn og fræðist um Svaninn, hringrásarhagkerfishugsunina, umhverfisstarf Krónunnar og viðhorf Íslendinga til umhverfis- og loftslagsmála. Opnunarávarp flytur Guðmundur Ingi, umhverfis- og auðlindaráðherra. Allir velkomnir – morgunverður í boði! Vinsamlegast skráið þátttöku til þess að koma í veg fyrir matarsóun hér: http://tiny.cc/ofa7fz. Fundinum verður streymt Facebook viðburðinum.
DAGSKRÁ 8:30 – 10:30
Guðmundur Ingi Guðbrandsson, umhverfis og auðlindaráðherra
𝐴́𝑣𝑎𝑟𝑝
Elva Rakel Jónsdóttir, framkvæmdastjóri Svansins á Íslandi
𝑌𝑓𝑖𝑟𝑓𝑒𝑟ð 𝑠𝑡𝑎𝑟𝑓 𝑆𝑣𝑎𝑛𝑠𝑖𝑛𝑠 𝑜𝑔 ℎ𝑒𝑙𝑠𝑡𝑢 𝑎́ℎ𝑒𝑟𝑠𝑙𝑢𝑟 2018-2019
Bjarni Herrera Þórisson, frkvstj. & meðeigandi CIRCULAR Solutions
𝘏𝘳𝘪𝘯𝘨𝘳𝘢́𝘴𝘢𝘳𝘩𝘢𝘨𝘬𝘦𝘳𝘧𝘪ð: 𝘵æ𝘬𝘪𝘧æ𝘳𝘪 𝘰𝘨 𝘢́𝘴𝘬𝘰𝘳𝘢𝘯𝘪𝘳
Birgitta Stefánsdóttir, sérfræðingur Svansins
𝘏𝘷𝘦𝘳𝘯𝘪𝘨 𝘵𝘦𝘯𝘨𝘪𝘴𝘵 𝘏𝘳𝘪𝘯𝘨𝘳𝘢́𝘴𝘢𝘳𝘩𝘢𝘨𝘬𝘦𝘳𝘧𝘪ð 𝘷𝘪ð𝘮𝘪ð𝘶𝘮 𝘚𝘷𝘢𝘯𝘴𝘪𝘯𝘴?
Hjördís Elsa Ásgeirsdóttir, markaðsstjóri Krónunnar
𝘜𝘮𝘩𝘷𝘦𝘳𝘧𝘪𝘴𝘴𝘵𝘢𝘳𝘧 𝘒𝘳𝘰́𝘯𝘶𝘯𝘯𝘢𝘳
Ólafur Elínarson, sviðsstjóri markaðsrannsókna, Gallup
𝘝𝘪ð𝘩𝘰𝘳𝘧 𝘐́𝘴𝘭𝘦𝘯𝘥𝘪𝘯𝘨𝘢 𝘵𝘪𝘭 𝘶𝘮𝘩𝘷𝘦𝘳𝘧𝘪𝘴- 𝘰𝘨 𝘭𝘰𝘧𝘵𝘴𝘭𝘢𝘨𝘴𝘮𝘢́𝘭𝘢
Þrjár starfsstöðvar Isavia í Keflavík stíga skref
Flugstöð Leifs Eiríkssonar, Þjónustuhús og Flugturn í Keflavík luku nú í sumar við Grænt skref númer tvö. Allar átta starfsstöðvar Isavia sem skráðar eru í Grænu skrefin hafa nú stigið tvö skref en Flugfjarskipti kláruðu öll fimm Grænu skrefin fyrir ári síðan. Hjá Isavia er unnið mjög metnaðarfullt umhverfisstarf og er í nógu að snúast hjá starfsmönnum umhverfisdeildarinnar í Keflavík. Við óskum Isavia til hamingju með árangurinn!
Á myndinni eru Þröstur Söring framkvæmdastjóri rekstrarsviðs Isavia, Ásdís Ólafsdóttir umhverfisdeild Keflavíkurflugvallar og Guðjón Arngrímsson deildarstjóri rekstrarsviðs á Keflavíkurflugvelli.
Góð ráð og upplýsingar um matarsóun er að finna á kaffistofum Isavia á Keflavíkurflugvelli
Upplýsingar um flokkun úrgangs eru aðgengilegar og skýrar
Fyrsta skref Vinnumálastofnunar
Fyrsta Græna skrefið hefur nú verið stigið í höfuðstöðvum Vinnumálastofnunar í Reykjavík. Stefnan er svo sett á landsbyggðina í framhaldinu en starfsstöðvar stofnunarinnar eru staðsettar vítt og breitt um landið. Umhverfisteymi Vinnumálastofnunar hefur gengið vasklega til verks og lagt áherslu á að kynna verkefnið vel fyrir starfsmönnum og taka flokkunarmálin föstum tökum. Á döfinni hjá þeim er m.a. að fá kynningu frá Gámaþjónustunni svo þau geti lagt sig enn betur fram við flokkunina. Til hamingju með árangurinn Vinnumálastofnun og gangi ykkur vel með framhaldið!
Á myndinni er teymi Grænna skrefa hjá VMST, Valdimar K. Guðlaugsson, verkefnastjóri, Sigmundur Arnórsson, Unnur Sverrisdóttir, forstjóri, Herborg Haraldsdóttir, Guðrún Agða Aðalheiðardóttir, Hrefna Guðmundsdóttir og Birgitta Steingrímsdóttir hjá Umhverfisstofnun. Á myndina vantar Hugrúnu Jóhannesdóttur sem einnig er í teyminu.
74 stofnanir skráðar til leiks
Heilbrigðisstofnun Norðurlands hefur nú skráð sig í verkefnið og er þar með 74. þátttakandi Grænna skrefa. Hjá stofnuninni starfa 570 starfsmenn á starfsstöðvum á Akureyri, Blönduósi, Dalvík, Fjallabyggð, Húsavík og Sauðárkróki.Við hlökkum til vegferðarinnar með Heilbrigðisstofnun Norðurlands.
