Ásta Sigrún Helgadóttir og Jóhannes Bjarki

Umboðsmaður skuldara lýkur fimmta skrefinu

/in /by

Umboðsmaður skuldara hefur nú lokið við  fimmta og síðasta skrefið í verkefni Grænna skrefa í ríkisrekstri.

Verkefnið hefur gengið vel og fær embættið hrós fyrir hversu hratt og vel var unnið að innleiðingu skrefanna fimm, eftir að vinna við innleiðinguna hófst. Embættið fékk fyrsta skrefið staðfest þann 12.júlí 2021, annað skrefið í október, það þriðja í janúar og fjórða í apríl sl.  Myndin var tekin í tilefni af staðfestingunni á fimmta skrefinu en þar tók Ásta Sigrún Helgadóttir við viðurkenningu frá Jóhannesi Bjarka frá Umhverfisstofnun.

Ásta Sigrún Helgadóttir og Jóhannes Bjarki

 

 

 

Fimmta skref Sýslumannsins á Suðurnesjum

/in /by

Sýslumaðurinn á Suðurnesjum lauk fimmta og síðasta skrefinu á dögunum. Meðal þess sem embættið hefur unnið að, er að vera með dagatal yfir umhverfisviðburði yfir árið. Sem dæmi má nefna að farið er í flokkunarátak árlega, úrgangur vigtaður og haldið upp á samgönguvikuna sem er í september.

Það er góð hugmynd að útbúa umhverfisdagatal fyrir árið, líkt og Sýslumaðurinn á Suðurnesjum, til að tryggja að umhverfisstarfið haldist við eftir að vinnu við innleiðingu skrefanna er lokið. Við óskum embættinu til hamingju með fimmta skrefið og óskum því góðs gengis í framhaldinu.

Fimmta skref Náttúruminjasafns Íslands

/in /by

Náttúruminjasafn Íslands steig í síðustu viku fimmta og síðasta skrefið.

Stofnunin hefur lengi verið umhugað um umhverfismál og var því góður grunnur til staðar þegar vinna hófst við Grænu skrefin. Þó hefur stofnunin náð ýmsum sigrum síðan vinnan við Grænu skrefum, en til að mynda náðu þau 80% flokkunarhlutfalli samkvæmt Grænu bókhaldi 2021, sem er talsvert hærra hlutfall en árið þar á undan.

Hér má lesa frétt um þegar Náttúruminjasafn Íslands kláraði skref 2-4.

Við óskum starfsfólki innilega til hamingju með þennan áfanga.

Frá vinstri: Álfheiður Ingadóttir, Helga Aradóttir, Þóra Björg Andrésdóttir og Hrefna Berglind Ingólfsdóttir

Sýslumaðurinn á Norðurlandi eystra kominn með fimm skref

/in /by

Fyrr í júlí kláraði Sýslumaðurinn á Norðurlandi eystra úttekt á fimmta og síðasta skrefinu.

Síðan vinnan hófst við skrefin hjá embættinu hafa þau náð frábærum árangri og sést það vel þegar litið er á Græna bókhaldið. Þar er helst að nefna flokkun sem hefur aukist umtalsvert, en þau hafa einnig dregið úr magni úrgangs í heildina. Þá hefur þeim einnig tekist að draga úr orkunotkun sem um munar. Það er einstaklega skemmtilegt að sjá tölulegan árangur af skrefunum!

Við óskum Sýslumanninum á Norðurlandi eystra og starfsfólki embættisins innilega til hamingju með skrefin!

Harpa komin með fimm Græn skref

/in /by

Harpa hefur lokið fimmta og síðasta Græna skref og tók á móti viðurkenningu frá Umhverfisstofnun mánudaginn 4. júlí 2022.

Til að ná skrefunum fimm hefur Harpa innleitt fjölmargar aðgerðir, meðal annars:

  • Útbúið aðgerðaáætlun í loftlagsmálum fyrir árin 2022 – 2024, en með henni eru settar fram aðgerðir til þess að styðja við markmið um endurvinnsluhlutfall verði komið í 75% árið 2024 og að tæplega þriðjungur starfsfólks verði kominn með samgöngusamning, ásamt fleiru.
  • 13 rafhleðslustöðvum voru settar upp í bílahúsi Hörpu í neðri kjallara sem eru opnar öllum með ON hleðslulykli.
  • Pappírsþurrkum var skipt út fyrir handblásara á almenningssalernum í húsinu til að minnka pappírssóun.

Vinnan við Grænu skrefin reyndist góður grunnur fyrir Svansvottun, en Harpa fékk nýlega Svansvottun fyrir ráðstefnusvið hússins og býður m.a. upp á sérstaka viðburðaskýrslu fyrir stærri viðburði með upplýsingum um umhverfis-, efnahags- og samfélagsleg áhrif viðburðarins.

Harpa fær yfir milljón heimsóknir árlega og það er ánægjulegt að sjá þau taka umhverfismálunum föstum tökum.

Á myndinni má sjá Rakel Lárusdóttur, Huldu Kristínu Magnúsdóttur og Arngrím Fannar Haraldsson taka við viðurkenningunni fyrir hönd Hörpu af Jóhannesi Bjarka Urbancic Tómassyni hjá Umhverfisstofnun.

Hreinsunaraðgerðir með aðkomu Landhelgisgæslunnar á Hornströndum

/in /by

Í fjórða skrefi Grænna skrefa er ein aðgerð sem hljóðar svo: Við tökum þátt í stærri verkefnum sem snúa að umhverfisvernd s.s. strandhreinsun, Samgönguviku, Degi íslenskrar náttúru eða Degi umhverfisins, a.m.k einu sinni á ári. 

Landhelgisgæsla Íslands getur merkt við þessa aðgerð með góðri samvisku, þar sem stofnunin tekur árlega þátt í hreinsunarverkefni samtakanna Hreinni Hornstrandir, þar sem varðskipið Þór sá um að ferja rusl sem sjálfboðaliðar samtakanna höfðu safnað í Furufirði. Alls söfnuðust 5,19 tonn af rusli, mest plast og netadræsur, sem var komið í land á Ísafirði.

Meðfylgjandi eru skemmtilegar myndir frá Landhelgisgæslunni af frábærri vinnu sjálfboðaliða samtakanna og flutningi úrgangsins sem safnað var.

Fimm skref hjá Utanríkisráðuneytinu

/in /by

Utanríkisráðuneytið hefur lokið fimm Grænum skrefum og tók á móti viðurkenningu frá Umhverfisstofnun fyrir helgi.

Við óskum ráðuneytinu og starfsfólki þess innilega til hamingju með Grænu skrefin.

Frá hægri: Ingibjörg Jóna Garðarsdóttir stjórnarráðsfulltrúi, Martin Eyjólfsson ráðuneytisstjóri, Hjördís Sveinsdóttir sérfræðingur hjá Umhverfisstofnun og Jón Einar Sverrisson deildarstjóri á rekstrar- og þjónustuskrifstofu.

Grænu skrefin og hringrásarhagkerfið

/in /by

Stór hluti aðgerða Grænu skrefanna hafa með hringrásarhagkerfið að gera, þar sem leitast er við að koma í veg fyrir að auðlindir verði að úrgangi, með því að neyta minna, deila, gera við, endurnota, endurframleiða og endurvinna.

Dæmi um aðgerðir Grænna skrefa sem tengjast hugmyndinni um hringrásarhagkerfi eru að; nota ekki einnota borðbúnað eða einstaklingsinnpökkun matvæla, að draga úr prentun á pappír, að draga úr notkun jarðefnaeldsneytis, að fara vel með orku og hita, að standa fyrir skiptimörkuðum fyrir starfsfólk, að deila skrifstofuvörum, að greina úrgangsmyndun í því sjónarmiði að draga úr úrgangi og að flokka vandlega allan úrgang sem fellur til.

Austurbrú gaf út myndband í upphafi þessa árs sem útskýrir hugmyndina um hringrásarhagkerfið á skemmtilegan og einfaldan hátt. Myndbandið var unnið af Elínu Elísabetu Einarsdóttur, Rán Flygenring og Sebastian Ziegler og Grænu skrefin fengu góðfúslegt leyfi til að deila myndbandinu svo það mætti ná til sem flestra.

 

 

RÚV klárar 2. skrefið

/in /by

Starfsstöð Ríkisútvarpsins við Efstaleiti kláraði annað skrefið nú á dögunum með glæsibrag! Til þess að ná skrefinu hafa þau meðal annars skilað Grænu bókhaldi og sett sér ítarlega loftlagsstefnu með mælikvörðum. Þá hafa þau einnig skuldbundið sig til þess að fjárfesta í kolefnisbindingarverkefnum sem svarar til reiknaðrar losunar hvers árs.

Við óskum RÚV til hamingju með skrefið og hlökkum til næstu skrefa!

Græn skref – lifandi verkefni

/in /by

Stöðugt fleiri ríkisaðilar ljúka nú við fimmta og síðasta Græna skrefið og er oft spurt; hvað svo?

Það er eðlilegt að sú spurning vakni, enda eru umhverfismál eilífðarverkefni sem ekki er hægt að ljúka fyrir fullt og allt, heldur þarf stöðugt að vinna að því að gera betur og vera vakandi. Það eru nokkur veigamikil atriði sem tryggja að Grænu skrefin séu lifandi verkefni og hér koma dæmi um þau:

  • Ferlar eru innleiddir í fimmta skrefinu sem tryggja að umhverfisstarf sé innleitt í alla starfsemi ríkisaðilans og að það liggi fyrir hver bera ábyrgð á hverju verkefni. 
  • Allir ríkisaðilar skila Grænu bókhaldi til Umhverfisstofnunar árlega og hafa þannig yfirsýn yfir framgang umhverfisstarfsins. 
  • Aðgerðir á gátlistum Grænna skrefa eru uppfærðar reglulega, með hækkandi kröfum og meiri þekkingu.
  • Endurúttekt á Grænu skrefunum fer fram á tveggja ára fresti eftir að fimmta skrefi er náð og þá skulu þátttakendur fylgja uppfærðum gátlistum.

 

 

Það er alltaf gott að hafa góðar fyrirmyndir og óhætt er að benda á Menntaskólann á Tröllaskaga þegar kemur að því að viðhalda metnaðarfullu umhverfisstarfi eftir að fimmta skrefinu var náð, en skólinn var ein af fyrstu stofnunum til að fara í gegnum Grænu skrefin. Starfsmaður Grænna skrefa leit við á Vorsýningu skólans á dögunum, þar sem nemendur sýndu afrakstur annarinnar í listsköpun. Athygli vakti að einungis lítill hluti verkanna prýddi veggi skólans, en stærsti hluti sýningarinnar fór fram rafrænt, en langstærsti hluti nemendanna er einmitt í fjarnámi. Tengiliður við Grænu skrefin, Unnur Hafstað, greindi frá því að upphaflega hefðu nemendur sent verk sín til skólans þar sem þau voru hengd upp, en síðan send til baka. Til þess að spara kolefnisspor af þessum sendingum er nú meiri áhersla lögð á rafræna sýningu og útkoman er stórgóð, hana má sjá hér.

Það má einnig benda á að Grænu skrefin útiloka ekki annarskonar umhverfisstarf eða verkefni og það er alltaf gaman að sjá metnað sem nær út fyrir Grænu skrefin. Grænfáninn er dæmi um slíkt verkefni, en Menntaskólinn á Tröllaskaga hlaut Grænfána númer tvö á dögunum. Á heimasíðu skólans segir að undanfarin ár hafi áherslan í skólanum verið á neyslu og úrgang, og hafa þau málefni verið samþætt hinum ýmsu námsgreinum. Þetta er því annað fyrirtaks dæmi um hvernig hægt er að samtvinna umhverfisstarf öllu öðru starfi sem á sér stað í stofnuninni.