Starfsmenn Fjársýslu ríkisins gerðu sér lítið fyrir og sigldu fjórða og fimmta skrefinu í höfn rétt fyrir jól. Það þurfti litlar áhyggjur að hafa af Fjársýslunni í úttektum fjórða og fimmta skrefsins því þar hefur reksturinn lengi verið á leið í umhverfisvænna horf. Mikil áhersla er lögð á rafvæðingu allra gagna auk þess að minnka úrgang eins og hægt er. Til að mynda minnkaði magn blandaðs sorps frá stofnuninni um helming á árunum 2016-2019. Það hafði því ýmislegt verið gert þegar viðmiðunarárið vinsæla, árið 2019, gekk í garð.

Innleiðing umhverfisstjórnunarkerfisins sem er afurð fimmta skrefsins var þó ekki auðveld fæðing því stofnunin stendur fyrir flutningum og því þurfti að huga að ýmsu sem ekki þarf að huga að. En verkið tókst þó á skömmum tíma. Lexían til annarra stofnana er kannski sú að með því að huga vel að grunninum í umhverfisstarfinu – sjálfbærri vinnustaðamenningu, flokkun og umhverfismeðvitund starfsfólks, tekur öll seinni vinnan minni tíma og verður greiðunnari.

Hamingjuóskir til Fjársýslunnar og gleðilegt ár.

Við hjá Grænu skrefunum og Umhverfisstofnun óskum ykkur gleðilegrar jólahátíðar. Það er ótrúlegur fjöldi skrefa sem við höfum stigið saman á árinu og við hlökkum til að taka saman lokatölurnar á milli jóla og nýjárs og telja þau öll saman.

Njótið jólanna!

Framhaldsskólinn í Vestmannaeyjum hefur öðlast sess í hópi fimmtaskrefshafa eftir að hafa staðist úttekt á dögunum. Þar með er Framhaldsskólinn orðinn stærsti vinnustaðurinn í Vestmannaeyjum með fimm skref og mega aðrar stofnanir líta upp til skólans þegar kemur að umhverfismálum. En hér verður ekki staðar numið því Framhaldsskólinn vinnur nú að innleiðingu umhverfisstjórnunarkerfis eftir ISO14001-Staðlinum og mun það kerfi byggja á þeirri vinnu sem lögð hefur verið í fimmta skrefið hjá stofnuninni.

Eins og sést á meðfylgjandi mynd var fimmta skrefinu vel fagnað á jólahlaðborði starfsmanna. Viðurkenningarskjalið barst þó ekki í tæka tíð í jólapóstinum til að fylgja með á myndinni. Við í Grænum skrefum óskum Framhaldsskólanum í Vestmannaeyjum til hamingju með fimmta skrefið og gleðilegra jóla.

Starfsfólk Grænu skrefanna fær heldur betur að kynnast því vel hversu fjölbreytt starf fer fram í ríkisstofnunum og fyrirtækjum i meirihluta ríkiseigu, og hversu ólík þau eru þegar kemur að stærð, umfangi og fjölda starfsstöðva. Núna í desember stigu sjö stærstu starfsstöðvar Heilbrigðisstofnunar Norðurlands fyrsta skrefið, starfstöðvarnar á Akureyri (heilsugæslan og heimahjúkrun), Dalvík, Blönduósi, Húsavík, Sauðarkróki og í Fjallabyggð.

Um 600 starfsmenn starfa á þessum starfsstöðvum, og að auki er fjöldi vistmanna sem býr á þeim í dreifðari byggðunum, í lengri eða skemmri tíma. Það er í mörg horn að líta á stofnunum af þessari gerð og ánægjulegt að sjá hvað Heilbrigðisstofnun Norðurlands hefur komið inn í verkefnið af miklum krafti, þrátt fyrir þær áskoranir sem faraldurinn síðustu ár hefur haft í för með sér. Hver einasta aðgerð Grænu skrefanna sem stigin eru hefur jákvæð áhrif á starfsfólk og heimilisfólk, sem og umhverfið allt, og við hlökkum til að fylgjast með stofnuninni stíga næstu skref.

Til hamingju með fyrstu skrefin!

Við í Grænu skrefunum megum til með að deila með ykkur þessum fínu myndum sem við fengum sendar frá umhverfisnefnd Ríkisútvarpsins. Umhverfisnefndin hefur sett upp skreytingaborð þar sem starfsfólk er hvatt til að pakka inn jólagjöfum í efni sem fellur til á stofnuninni. Meðal innpökkunarefnis eru mjöl,- kaffi- og kartöflupokar úr eldhúsinu, sem og dagblöð og tímarit sem búið er að lesa. Eins og í öllu góðu hópefli á vinnustöðum hefur verið boðað til keppni þar sem dyggðaskreyttasti jólapakkinn vinnur, og sigurvegarinn fær nafnbótina besti vinur umhverfisins. Sjón er sögu ríkari!

Fyrir þau sem fá ekki nóg af umhverfisvænum jólaundirbúningi bendum við á þetta innslag úr kvöldfréttum RÚV þar sem okkar eigin Jóhannes, ásamt henni Ásdísi, gefa góð ráð.