Umhverfisstofnun hefur stýrt verkefninu Græn skref í ríkisrekstri frá árinu 2014, en það ár hófu 18 stofnanir þátttöku. Verkefnið hefur farið ört stækkandi síðan, en í lok árs 2022 voru 174 skráðir þátttakendur í Grænu skrefin. Sem hluti af ársáætlunarverkefni Umhverfisstofnunar, hvers markmið er að draga fram reynslu þátttakanda í Grænu skrefunum, var spurningakönnun send út til stofnana og fyrirtækja í meirihlutaeigu ríkisins þar sem óskað var eftir þátttöku og reynslusögum. Svörun var góð, en 101 tóku þátt.

Niðurstöður könnunarinnar sýndu mikla ánægju með verkefnið, þar sem 84% sögðust ánægð eða mjög ánægð. Í ljósi þeirra breytinga sem áttu sér stað þegar þátttaka í verkefninu varð skylda, þykja þetta afar ánægjulegar tölur.

Ávinningur verkefnisins var af flestum talin aukin umhverfisvitund, eða af yfir 90% svarenda. Þar á eftir þótti samdráttur í losun ávinningur af um 70% svarenda, og um helmingur nefndi bætta verkferla. Fjárhagslegur sparnaður og bættur starfsandi var einning nefndur af þónokkrum.

Varðandi hjálpsemi starfsfólks Grænna skrefa fannst tæplega 90% svarenda starfsólk hjálplegt eða mjög hjálplegt. Nokkrar ábendingar til bóta voru nefndar, þar á meðal að aðgerðum gæti verið forgangsraðað eftir mikilvægi, biðtími eftir svörum styttur sem og að skrefin yrði sniðin eftir ólíkri starfsemi, og eru allar teknar vel til greina.

Heimasíðan var af 94% talin hjálpleg eða mjög hjálpleg, en bent var að á meira mætti vera af merkingum og miðlægu kynningarefni, og erum við að vinna í því.

Áskoranir sem svarendur mæta við innleiðingu verkefnisins eru nokkrar. Þar á meðal finnst 70% stærsta áskorunin vera að virkja samstarfsfólk, á meðan rúmlega 30% nefna samskipti við rekstraraðlia. Þó svo þau samskipti geti verið krefjandi þá þökkum við sérstaklega fyrir það samtal sem á sér stað, enda hefur það víðtækari áhrif verkefnisins í för með sér.

Aukin útgjöld og skortur á stuðningi yfirstjórnar voru einnig meðal áskorana sem þátttakendur mæta. Nokkrir sögðust vilja meiri eftirfylgni og aðgerðir eftir að fimmta skrefinu hafi verið lokið, sem er gaman að sjá.

Við erum statt og stöðugt að vinna í því að bæta verkefnið, og meðal annars höfum við fundað með stjórnendum, þar sem þeim var bent á mikilvægi þeirra þátttöku. Þar að auki hélt Snjólaug Ólafsdóttir, umhverfisverkfræðingur, erindi á morgunfundi Grænna skrefa um hvernig virkja mætti starfsfólk til þátttöku, en hér má finna upptöku af því.

Við þökkum ykkur kærlega fyrir þátttöku í bæði könnuninni og verkefninu sjálfu. Sem stofnanir sem starfa að almannahag er undirstaðan, náttúran sjálf, nauðsynlegur hluti af þeirri vegferð. Við erum þakklát fyrir samvinnuna við að halda jörðinni lífvænlegri fyrir framtíðarkynslóðir.

Ný styttist í Öskudaginn þann 22. febrúar og við í Grænu skrefunum hvetjum ykkur til að setja upp búningaskiptimarkað af því tilefni. Í skrefi 4 er ein aðgerð sem snýr sérstaklega að skiptimörkuðum en með slíku framtaki gerum við okkar besta til að framlengja líftíma hlutanna okkar:

Við höfum sett upp skiptistöð (borð og/eða fataslá) þar sem starfsmenn geta komið með hluti að heiman sem þeir vilja gefa áfram og aðrir geta fengið, annaðhvort í afmarkaðan tíma árlega eða til frambúðar.

Hér getið þið nálgast auglýsingu um slíkan markað fyrir Facebook og hér er sama auglýsing í stærð A4. Þið megið endilega heyra í okkur á graenskref@graenskref.is ef þið viljið nýta ykkur efnið í breyttri mynd og svo getið þið auðvitað nýtt það sem innblástur í eigið efni 🙂

Endilega deilið svo með okkur mörkuðunum ykkar á Samráðsvettvangnum okkar á Facebook.

Við bendum einnig á að fataverslanir Rauða krossins, Barnaloppan, Góði Hirðirinn og aðrar sambærilegar verslanir bjóða upp á gott úrval af búningum á góðu verði.

Morgunfundur Grænna skrefa er í dag, þriðjudaginn 6. desember. Fundurinn er haldinn í salnum Gullteig á Grand hótel (upphaflega var hann auglýstur í Háteig).

Fundurinn er ætlaður starfsmönnum vinnustaða sem taka þátt í Grænum skrefum fyrir ríkisaðila. Hlekkurinn inn á viðburðinn er hér.

 

Dagskrá:

09:05-09:20 Opnunarávarp Grænna skrefa

Birgitta Steingrímsdóttir og Þorbjörg Sandra Bakke – Umhverfisstofnun

09.20-09:40 Áhrif matarneyslu okkar og hvað við getum gert

Sigurður Loftur Thorlacius – Efla verkfræðistofa

09:40-10.00 Heilnæmt mataræði fyrir okkur og umhverfið

Anna Hulda Ólafsdóttir – áhugamanneskja um umhverfismál og heilsusamlegan lífsstíl

10:00-10:20 Óska eftir grænum heimilisleiðtogum

Guðbjörg Gissurardóttir – Í boði náttúrunnar

10:20-10:40 Kaffipása – léttar veitingar og spjall

10:40-11:00 Niðurstöður ánægjukönnunar um Græn skref

Þorbjörg Sandra Bakke – Umhverfisstofnun

11:00 – 11:15 Hvernig virkjum við starfsfólk til þátttöku?

Snjólaug Ólafsdóttir – EY

11:15 – 11:50 Borðavinna

11:50 – 12:00 Samantekt og fundi slitið

 

Ef einhverjir eiga í vandræðum með að tengjast viðburðinum má senda línu á: johannes.bjarki.tomasson@umhverfisstofnun.is

Nú líður senn að árlegum morgunfundi okkar og hlökkum við mikið til að sjá ykkur sem flest á Grand hótel Reykjavík þann 6. desember næstkomandi milli kl. 9 og 12. Að sjálfsögðu verður einnig boðið upp á þátttöku í gegnum fjarfund. Frítt inn og allir áhugasamir þátttakendur velkomnir.

Á fundinum munum við segja ykkur frá stöðunni á verkefninu og niðurstöðum ánægjukönnunar. Einnig fáum við til okkar frábæra fyrirlesara sem ætla að segja okkur hvernig við getum tekið Grænu skrefin lengra í okkar leik og starfi ásamt því að fara í skapandi borðavinnu sem vonandi veitir okkur öllum innblástur á grænu vegferðinni.

Við hvetjum ykkur til að taka tímann frá í dagatalinu og munum við senda fullbúna dagskrá og skráningarform á tengiliðina sem fyrst.

Fjölbrautaskóli Snæfellinga lauk úttekt á fjórða Græna skrefinu í ágúst og á því aðeins eitt skref eftir. Umhverfisstarf þeirra er fjölbreytt, en þau eru til dæmis með rafhleðslustöðvar fyrir rafbíla, gott úrval af lífrænum matvælum á kaffistofu starfsfólks og endurnýta notaða matarolíu í dýrafóður.

Við óskum þeim innilega til hamingju með flottan árangur!

Á myndinni eru (frá vinstri til hægri) Hrafnhildur Hallvarðsdóttir skólameistari, Ólafur Tryggvason umsjónarmaður fasteigna og Lilja Magnúsdóttir skólafulltrúi, með þetta dásamlega útsýni yfir Kirkjufell.