Í gær héldum við upplýsingafund um Grænt bókhald. Einhverjir áttu í vandræðum með að komast á fundinn og bíða því spenntir eftir upptökunni á fundinum. Við getum glatt ykkur með því að núna er biðin loksins á enda.

Dagskrá fundarins var eftirfarandi:

1. Skilafrestur og viðmiðunarár
2. Kennslumyndband um Græna bókhaldið og algengar spurningar
3. Umfang, starfsstöðvar og réttar deilitölur
4. Kolefnisjöfnun og kolefnisbinding
5. Myndræn framsetning á gögnunum og samanburður skilaaðila
6. Spurningar og svör

Við bendum svo á þjónustuborð Græna bókhaldsins á milli 13:30 – 15:00 föstudaginn 26. mars. Á meðan þjónustuborðið er opið er hægt að komast inn á rafræna fundarboðið og fá aðstoð við Græna bókhaldið og spyrja spurninga. Fyrir spurningar er auðveldast að hafa samband við sinn tengilið í Grænu skrefunum, eða senda póst á graenskref@graenskref.is

Bestu

Gró Einarsdóttir (gro.einarsdottir@umhverfisstofnun.is), Ásdís Nína Magnúsdóttir (asdis.magnusdottir@umhverfisstofnun.is), og Þorbjörg Sandra Bakke (thorbjorg.bakke@umhverfisstofnun.is)

Við óskum Fjölbrautaskóla Suðurlands innilega til hamingu með 2 Græna skrefið!

Til að ná 2 Græna skrefinu hefur FSU meðal annars keypt umhverfisvænar hreinsivörur og pappír, farið sparlega með rafmagn með því að skipta út venjulegum ljósaperum fyrir LED perur, og keypt inn umhverfisvænt kaffi (sem við vitum að var ekki lítil aðgerð, enda kennarar oft sólgnir í kaffi ;).

En kannski mikilvægast af öllum aðgerðum var algjör viðsnúningur í flokkunarmálum. Í raun væri hægt að kalla þetta byltingu. Þetta er framgangssaga sem sýnir hvernig maður getur á mjög stuttum tíma farið úr  23% endurvinnsluhlutfall yfir í 86% endurvinnsluhlutfall. Áður en FSU byrjaði í Grænu skrefunum hafði verið lítil áhersla á flokkun og þau í raun ekki mikið pælt í því. En svo var bara farið í að breyta þessu, og það sem skipti kannski mestu máli var að ruslið frá iðnnáminu, málmur og tré, fer núna allt beint í flokkun. Þetta hefur ekki bara verið gott fyrir umhverfið, heldur líka dregið verulega úr rekstrarkostnaði. Allir græða!

Áskoranir fyrir stofnunina eru að viðhalda þessum árangri í flokkuninni og halda dampi í verkefninu til að ná 5 skrefum fyrir árslok. Áður en þau byrjuðu í verkefninu voru engir með samgöngusamning, en núna verður boðið upp á samning og áhugavert að sjá hvort að fleiri ákveða að fara með vistvænum hætti í vinnuna.

Enn og aftur til hamingju, og vel gert!

Fjölbrautaskóli Suðurnesja hlaut á dögunum 1. Græna skrefið og við óskum honum innilega til hamingju með það!

FSS, eins og skólinn er gjarnan kallaður, var einn af fyrstu ríkisaðilunum til að klára 1. skrefið í nýju útgáfunni af Gátlistanum. Það er alltaf krefjandi að fara ótroðnar slóðir en FSS tókst með glæsibrag á við nýjar aðgerðir eins og að hafa umhverfismálin í huga við framsetningu á matseðli. Auk þess hafa þau hafið vinnu við að skila Grænu bókhaldi, fræðst um umhverfisvæn merki, passað upp á merkingar á flokkun, valið sparneytin raftæki, pantað fleiri hjólaboga fyrir skólann og margt fleira. Það er einnig gleðilegt að þau eru strax langt komin með að klára 2. skrefið og því mikill gangur í verkefninu.

Enn og aftur, innilega til hamingju!

Við óskum Lyfjastofnun til hamingju með að vera komin með 1. Græna skrefið.

Lyfjastofnun ætlar ekki að láta þar við sitja heldur hófu árið á því að endurskoða umhverfis- og loftlagsstefnu sína og  hafa fylgt þeirri vinnu eftir með markvissri aðgerðaáætlun. Við væntum þess því að Lyfjastofnun haldi ótrauð áfram að taka skrefin.

Helena W Óladóttir, sem er tengiliður Grænna skrefa segir í tilefni dagsins að: „Við erum svo heppin að starfsfólk Lyfjastofnunar hefur tekið vel í þær breytingar sem við höfum gert, sinnir flokkun af miklum móð og er áhugasamt um að leggja sitt af mörkum til að markmið ársins náist.“

Enn og aftur til hamingju! Þetta eru góðar fréttir að taka með sér inn í helgina

Við óskum Rannsóknastofu í lyfja- og eiturefnafræði við Háskóla Íslands til hamingju með 1. og 2. Græna skrefið.

RLE, eins og þau eru jafnan kölluð, hafa staðið sig einstaklega vel í sínu umhverfisstarfi. Þann góðan árangur má bæði þakka brennandi áhuga starfsmanna á umhverfismálum og reynslu af því að vinna í öryggismálum. Öryggismál og umhverfismál eiga nefnilega meira sameiginlegt en margir gera sér grein fyrir. Í báðum tilvikum er mikilvægt að vera með gott verklag, góða stefnu og gott utanumhald til að ná árangri. Starfsmenn í RLE eru vanir því að búa til gæðaskjöl og fylgja gæðastöðlum hvað varðar öryggismál, sem er alls ekki ólýkt því að fylgja gátlista Grænu skrefanna.  Gott umhverfisstarf stefnir líka að því að minnka þá áhættu sem felst í hverskonar mengun, alveg eins og öryggisstarf snýr að því að draga úr áhættum. Að lokum verða allir að leggja hönd á plóg til þess að ná raunverulegum árangri í bæði öryggis- og umhverfismálum. Það er því kannski ekki að undra að þessi metnaðarfulla starfsstöð stefnir á ISO umhverfisvottun innan skamms, en fimmta Græna skrefið er í raun léttari útgáfa af því gæðakerfi.

Innilega til hamingju og vel gert!