Spörum orku í sumar

/in /by

Nú líður að sumarfríum hjá starfsfólki. Munum að ganga frá vinnustöðvunum okkar þannig að þær noti sem minnsta orku á meðan við erum í fríi. Að loka gluggum, draga fyrir og lækka á ofnum sparar heitt vatn. Að slökkva á tækjum, taka tölvur, skjái og dokkur úr sambandi sparar rafmagn. Dokka sem er slökkt á notar svipað mikið rafmagn og ein ljósapera. Skjáirnir geta auðveldlega notað enn meira. Safnast þegar saman kemur!

Við í Grænu skrefunum hvetjum ykkur til að senda póst á samstarfsfólk ykkar með þessari áminningu, þið getið nýtt ykkur tékklistann okkar sem listar upp helstu atriði hér.

Norrænar næringarráðleggingar í takt við Græn skref

/in /by

Í vikunni hélt Norræna ráðherranefndin kynningu um nýjar norrænar næringarráðleggingar. Fram kom á kynningarfundi að ráðleggingarnar byggja á bestu vísindalegu upplýsingum sem völ er á um matvælaneyslu, heilsu og umhverfismál.

„Með skýrslunni fáum við vísindalegan grunn sem sýnir að hollt mataræði er oftast líka sjálfbært. Það eru mikil samlegðaráhrif á milli heilsufars og umhverfismála fólgin í þeirri breytingu sem nauðsynleg er á matarvenjum okkar,“ sagði Rune Blomhoff, verkefnisstjóri Norrænna næringarráðlegginga 2023 og prófessor við háskólann í Ósló.

Í fyrsta sinn taka ráðleggingarnar bæði til heilsufarslegra og umhverfislegra þátta, en þær mæla með jurtaríkara mataræði, aukinni fiskneyslu og að dregið verði úr kjötneyslu. Þessi áhersla er í takt við aðgerðir Grænna skrefa sem miða að því að draga úr umhverfisáhrifum af matvælum meðal annars með því að auka hlut grænmetis og plöntupróteina ásamt því að draga úr neyslu rauðs kjöts.

Lesa má nánar um ráðleggingarnar á vef Norrænu ráðherranefndarinnar.