5 skrefið hjá Náttúrufræðistofnun
Til hamingju Náttúrufræðistofnun Íslands með fimmta og síðasta Græna skrefið! Stofnunin hefur unnið ötullega að því að innleiða verkefnið og draga úr umhverfisáhrifum um nokkurn tíma. Stofnunin er í húsnæði sem er með BREEAM vottun, leggur mikla áherslu á góða nýtingu hluta og endurnotkun. Auk þessa hafa þau bætt sig ár frá ári við að flokka úrganginn en árið 2017 fór 75% af úrganginum í endurvinnslu. Þar með er Náttúrufræðistofnun með þriðja besta árangur í flokkun meðal þeirra stofnana sem skila grænu bókhaldi. Þau hafa nú sett sér enn metnaðarfyllra markmið fyrir þetta ár. Vel gert!
Úttektir hjá Skógræktinni
Grænu skrefin voru í heimsókn hjá Skógræktinni í Þjórsárdal og þar hefur sveitarfélagið (Skeiða- og Gnúpverjahreppur) komið með frábæra lausn á því að losa lífrænan úrgang frá íbúum. Í sveitarfélaginu eru margir bændur og því oft erfiðarar um vik að sækja margar mismunandi flokkunartunnur heim á bæi. Þá ákvað sveitarfélagið að grafa niður hólka með loki sem fólk setur lífrænan úrgang í. Þegar holan er full er grafin önnur hola á öðrum stað og hólkurinn settur þar ofan í. Þar sem garðar eru stórir eða landpláss mikið þar getur þetta verið mjög hentug lausn og þar sem ekki er verið að sækjast eftir moltunni þá þarf ekkert að hugsa um holuna. Það verður gaman að fylgjast með þessari lausn hjá sveitarfélaginu í framtíðinni.
ÍSOR eru komin með 2 Græn skref
Innilega til hamingju með árangurinn. ÍSOR hefur unnið vel að innleiðingu skrefanna síðustu misseri og fengu fyrsta skrefið afhent í janúar. Nú stefna þau á þriðja skrefið strax í haust. Meðal þess sem þau hafa gert er nú nýverið settu þau upp aðgangsstýringu á prentarana og finna strax mikinn mun í útprentun efnis. Við hlökkum til frekara samstarfs 🙂
Fræðsluefni um matarsóun
Matarsóun getur haft gríðarlega mikil og fjölþætt umhverfisáhrif. Sóun á matvælum verður til á öllum stigum virðiskeðjunnar s.s. í framleiðslu, flutningi, sölu og á heimilum. Losun gróðurhúsalofttegunda vegna matarsóunar á Íslandi er talin vera um 5% af heildarlosun sem íslensk stjórnvöld eru ábyrg fyrir, það munar því um minna þegar við eigum að draga úr losun um 40% á næstu 12 árum. Umhverfisstofnun lét gera kynningarefni um matarsóun sem hægt er að nýta til margskonar kynningar – endilega notið 🙂
Samgöngusamningar skipta máli
Í baráttunni við loftslagsbreytingar þurfum við Íslendingar að draga úr losun um 40% og þar vega mest vegasamgöngur. Því skiptir mestu máli að við reynum að draga úr losun eins og hægt er þegar kemur að samgöngum. Samgöngusamningar virka sem hvatning til starfsmanna um að koma með umhverfisvænni hætti til og frá vinnu og geta þar af leiðandi dregið úr losun en svo eru aðrir þættir sem við þurfum að horfa til eins og fjárfesting í vegasamgöngum og samgönguflæði. Því fleiri sem ganga, hjóla og nota strætó, því betra fyrir umhverfið og samgöngukerfið okkar.
En hvernig fer þetta fram? Jú stofnanir/fyrirtæki bjóða starfsmönnum að gera gagnkvæman samning þar sem fyrirtækið/stofnunin skuldbindur sig til að greiða ákveðna upphæð til starfsmannsins noti hann umhverfisvænni samgöngur. Að sama skapi samþykkir starfsmaðurinn að ferðast til og frá vinnu að minnsta kosti þrjá daga í vinnu með umhverfisvænni hætti.
Í meðfylgjandi skjali má sjá útgáfu af samgöngusamningi. Hvernig þeir eru útfærðir fer að sjálfsögðu allt eftir hverri stofnun eða fyrirtæki fyrir sig og hvað hentar í hverju tilfelli. Verið óhrædd við að prufa mismunandi leiðir en það getur vel verið að ein leið henti ekki öllum jafnvel.
Samgöngusamningar hafa þegar sannað gildi sitt en þar sem þeir eru í boði er starfsfólk tilbúnara til að nýta sér vistvænni samgöngur. Hjá Umhverfisstofnun voru 44% starfsmanna með heilsárssamgöngusamning, 10% starfsmanna var með sumarsamning og 4% með samninga um að hjóla á fundi. Samanlagt voru því 58% starfsmanna með einhvers konar samgöngusamning á árinu 2017.