Orkusjóður auglýsir styrki til orkuskipta
Við í Grænum skrefum vekjum athygli ríkisaðila á að Orkusjóður auglýsir nú styrki til orkuskipta árið 2022. Hægt er að sækja um í 5 flokkum; bættri orkunýtingu, minnkun olíunotkunar í iðnaði, raf- og lífeldsneyti og metani, hleðslustöðvum fyrir samgöngur og orkuskiptum í haftengdri starfsemi.
Styrkir geta hæst numið 33% af áætluðum stofnkostnaði og umsóknarfrestur er til 7. maí næstkomandi.
Hluti Grænna skrefa í ríkisrekstri er að hvetja til umhverfisvænni samgangna starfsfólks, t.a.m. með að bæta aðgengi að rafmagnshleðslustöðvum. Við hvetjum þátttakendur Grænna skrefa í ríkisrekstri sem eru á leið í slík verkefni, eða önnur sem falla undir ofangreinda flokka, til að senda inn umsókn um styrk til Orkusjóðs.
Allar nánari upplýsingar má finna á www.orkusjodur.is
RÚV tekur fyrsta skrefið
Starfsstöð Ríkisútvarpsins ohf. í Útvarpshúsinu við Efstaleiti lauk úttekt á sínu fyrsta skrefi í gær, 15. mars 2022. Umhverfisnefnd RÚV hefur verið dugleg að minna starfsfólk á umhverfismálin og í desember settu þau til dæmis upp innpökkunarborð þar sem starfsfólk var hvatt til að pakka gjöfum inn í efni sem féll til innanhúss. Sjá frétt um það hér.
Við óskum þeim innilega til hamingju með skrefið og hlökkum til frekara samstarfs með þeim!
Nýir og endurbættir límmiðar
Við vekjum athygli á því að nú er hægt að panta nýja og endurbætta límmiða undir Vinnugögn hér á síðunni. Límmiðarnir sem hafa bæst við eða fengið nýtt útlit eru eftirfarandi:
Það þarf engan plastpoka í þessa tunnu
Hér má nálgast og skilja eftir krassblöð
Leyfum þeim sem þurfa lyftuna að nota hana
Minnum á skil á Grænu bókhaldi
Nú styttist í að fari að vora og við vitum öll hvað það þýðir – árleg skil á Grænu bókhaldi, en frestur til að skila inn upplýsingum fyrir árið 2021 rennur út 1. apríl 2022.
Græna bókhaldið er mikilvægt tæki fyrir stofnanir til að fylgjast með losun gróðurhúsalofttegunda sem stafar frá starfsemi þeirra. Græna bókhaldið tekur til þátta sem hafa hve mest umhverfisáhrif í daglegum rekstri, þó listinn sé ekki tæmandi. Um er að ræða:
- Samgöngur
- Úrgangur
- Orkunotkun
- Matarsóun
- Pappírsnotkun
- Efnanotkun
Hér fyrir neðan má sjá leiðbeiningamyndband um hvernig fylla skal út Græna bókhaldið, kaflaskiptingu myndbandsins má finna fyrir neðan það. Gangi ykkur vel!
Kaflaskipti
Kynning á Grænu bókhaldi 00:00
Kynning á Gagnagátt Umhverfisstofnunar, þangað sem bókhaldinu er skilað 1:23
Síða 1 – Stærð húsnæðis og fjöldi stöðugild 2:47
Síða 2 – Skrifstofupappír og prentþjónusta 4:42
Síða 3 – Ræsti- og hreinsiefni og ræstiþjónusta 6:45
Síða 4 – Rafmagn og heitt vatn 9:30
Síða 5 – Akstur 12:04
Síða 5 – Flug 15:41
Síða 6 – Önnur losun 19:07
Síða 7 – Samgöngusamningar 20:40
Síða 8 – Úrgangur 21:40
Síða 9 – Aðrar rekstrarvörur 24:20
Síða 10 – Matarsóun 25:14
Síða 11 – Niðurstöður og markmið 27:00
Síða 12 – Samantekt á losun gróðurhúsalofttegunda, matarsóun og kolefnisjöfnun 29:22
Síða 13 – Staðfesting á skilum 30:55
Síða 14 – Skilafrestur og aðstoð 31:24
Alþingi klárar fimmta skrefið
Alþingi lauk nýverið úttekt á skrefi fimm og hefur þar með stigið öll Grænu skrefin. Skrefið var formlega afhent forseta Alþingis og yfirstjórn skrifstofu Alþingis þann 25. febrúar.
Þingið hefur meðal annars unnið gott starf í því að draga úr losun vegna samgangna og tveir af þremur bílum í eigu Alþingis eru tengiltvinnbílar. Á dögunum fengu þau afhenta níu rafbíla frá Hertz í langtímaleigu fyrir þingmenn, en reiknað er með því að rafbílarnir verði 19 talsins.
Alþingi hefur sett sér markmið um 40% samdrátt í losun gróðurhúsalofttegunda til ársins 2030 miðað við árið 2018 og fylgist vel með stöðu mála með Grænu bókhaldi. Hér má nálgast umhverfis- og loftslagsstefnu Alþingis í heild sinni: https://www.althingi.is/um-althingi/skrifstofa-althingis/starfsmannamal/umhverfisstefna/
Fimmta skrefið inniheldur aðgerðir til þess að innleiða umhverfisstjórnunarkerfi í stofnunum og er loftslagsstefnan liður í því.
Við óskum Alþingi innilega til hamingju með þennan stóra áfanga.
Fimm í Flensborg
Fimmta græna skrefinu var vel fagnað á starfsmannafundi Flensborgarskólans í Hafnarfirði, enda markaði afhendingin lokin á innleiðingu skólans á Grænu skrefunum sem hófst árið 2021. Í skólanum hefur verið litið langt út fyrir hinn hefðbundna ramma Grænu skrefanna með það fyrir augum að auka sýnileika umhverfis- og loftslagsmála innan skólans og valdefla nemendur.
Þrátt fyrir að fimmta skrefið sé í höfn verður áfram unnið með græna hugsun og skipulag í skólastarfinu en á döfinni er herferð um flokkun á rusli og skráning nemenda í hádegismat til að koma í veg fyrir matarsóun.
Strætó hættir með pappírsmiða – munið að fá þeim breytt fyrir 31. mars
Strætó hættir að taka við pappírsmiðum í dag, 1. mars. Margir vinnustaðir á höfuðborgarsvæðinu hafa haft það sem reglu að eiga til pappírsmiða sem starfsfólk getur nýtt sér á vinnutíma, og þannig stuðlað að umhverfisvænni samgöngunotkun. Nú þarf að fara nýjar leiðir í þeim efnum, Strætó bendir á Klapp-tíuna sem er 10 miða kort sem ekki er bundið við ákveðna notendur og því hægt að lána út til starfsfólks eftir þörfum. Athugið að ekki geta fleiri en einn farþegi nýtt sér sama kortið á sama tíma, svo það gæti verið gott að hafa nokkur kort til umráða. Við hvetjum þátttakendur í Grænu skrefunum til að halda áfram að gera starfsfólki það einfalt að nýta sér strætó fyrir fundi og erindi á vinnutíma, og kynna sér nýtt greiðslufyrirkomulag.
Það er svo um að gera að láta ekki pappírsmiðana sem liggja í skúffum og skápum missa verðgildi sitt, en fram til 31. mars er hægt að skila pappírsmiðum inn til strætó og fá í staðinn inneign í gegnum Klapp-kerfið. Hér má finna leiðbeiningar frá Strætó um hvernig má gera það, til dæmis með því að senda bréfpóst með miðunum á móttöku Strætó.
