Það er alltaf gott að hafa nokkur atriði í huga í sumarfrágangi áður en starfsmenn fara í frí. Gætum þess að vera ekki að nýta auðlindirnar okkar, hita og rafmagn, á meðan enginn er að „njóta“ þeirra 
Einnig viljum við taka fram að þjónusta við Grænu skrefin verður skert í júlí en þó er hægt að senda inn fyrirspurnir á graenskref@graenskref.is. Við þökkum fyrir ykkar góða starf á liðnum vetri og óskum ykkur gleðilegs sumars!
Sjúkratryggingar Íslands hafa nú skráð sig til leiks í Grænu skrefunum. Hlutverk Sjúkratrygginga Íslands er að tryggja réttindi sjúkratryggðra og aðgengi að góðri og hagkvæmri heilbrigðisþjónustu. Hjá stofnuninni starfa í dag 129 manns og bjóðum við þau hjartanlega velkomin í verkefnið og hlökkum til að fylgja þeim í skrefunum.
Birgitta Steingrímsdóttir frá Umhverfisstofnun, Hermann Jónasson forstjóri HMS og Þóra Margrét Þorgeirsdóttir í umhverfisteymi HMS.
Starfsstöðvar Húsnæðis- og mannvirkjastofnunar (HMS) í Borgartúni og á Sauðárkróki fengu í dag afhenta viðurkenningu fyrir að hafa stigið fyrsta Græna skrefið. HMS tók til starfa nú í ársbyrjun við sameiningu Mannvirkjastofnunar og Íbúðarlánasjóðs. Stuttu síðar skráði hin nýja stofnun sig til leiks í Grænu skrefin og ekki leið langur tími þar til aðgerðir fyrsta skrefs höfðu verið uppfylltar. Í framtíðarsýn HMS kemur fram að stofnunin vilji stuðla að því að vistspor frá byggingariðnaðaðinum verði minnkað og mun reynslan úr Grænu skrefunum vafalaust nýtast starfsfólki í þeirri vegferð.
Til hamingju með árangurinn og gangi ykkur sem allra best með framhaldið!
Umhverfisteymi HMS á Sauðárkróki.
Í Grænu skrefunum leggjum við áherslu á að stofnanir velji umhverfisvottuð gistirými og fundaraðstöðu, bæði hérlendis og erlendis. Með því drögum við úr umhverfisáhrifum af viðburðum og ferðum á vegum stofnunarinnar og styðjum við fyrirtæki sem standa sig vel í umhverfismálum.
Eftirfarandi aðgerðir má finna í flokknum Viðburðir og fundir í skrefi 3 og 4:
Við höfum tekið saman lista yfir gisti- og fundarrými sem uppfylla ofangreindar kröfur til að auðvelda ykkur vinnuna. Listann er að finna undir Vinnugögn hér á síðunni ásamt ýmsu öðru ítarefni.
Embætti Héraðssaksóknara fékk á dögunum viðurkenningu fyrir 2. Græna skrefið. Meðal þeirra verkefna unnið hefur verið að undanfarið er efling hjólreiðamenningar en starfsmenn tóku m.a. þátt í Hjólað í vinnuna nú í vor og fékk embættið bronsvottun Hjólafærni í júníbyrjun. Héraðssaksóknari var ein þeirra stofnana sem skilaði inn Grænu bókhaldi í ár og setti sér metnaðarfull markmið fyrir næsta ár þegar kemur að umhverfismálunum.
Til hamingju með áfangann og gangi ykkur vel með framhaldið!
Umhverfisstofnun fór nýlega af stað með fræðsluverkefnið Umhverfisvarpið. Um er að ræða rafræna fræðslu á vefnum þar sem sagt er frá hinum ýmsu verkefnum stofnunarinnar.
Umhverfisvarp miðvikudagsins var helgað loftslagsmálum en í því kynntu sérfræðingar í teymi loftslags og loftgæða losunarbókhald Íslands sem snýr að gróðurhúsalofttegundum. Stiklað var á stóru um helstu niðurstöður losunarbókhaldsins, sem og gefin innsýn inn í hvernig bókhaldið er sett upp og tengsl losunarþátta við lifnaðarhætti okkar. Þá var farið aðeins í sögu alþjóðlegs loftslagssamstarfs, fjallað um þær skuldbindingar sem Ísland hefur gengist undir í loftslagsmálum og þær settar í samhengi við þá vinnuferla og kerfi sem unnið er eftir.
Fram kom að miðað við reiknaða losun síðustu ára, og áætlaða losun 2019 og 2020, er losun Íslands talsvert meiri en við höfum fengið úthlutað fyrir 2. tímabil kýótóbókunarinnar (2013-2020). Því liggur fyrir að íslenska ríkið mun þurfa að kaupa losunarheimildir með þeim kostnaði sem þeim fylgja.
Ísland hefur skuldbundið sig til að draga úr losun um 29% til ársins 2030 miðað við árið 2005 vegna Parísarsamningsins, en ef horft er á þróunina undanfarin ár þurfum við öll að leggjast á eitt til að komast hjá því að fara fram úr losunarheimildum okkar aftur, með bæði þeim fjárhagslega og umhverfislega kostnað sem því fylgir.
Við mælum með að þið hlustið á Umhverfisvarpið og fræðist betur um hvernig þessum málum er háttað og leggið í kjölfarið ykkar lóð á vogaskálarnar til að betur gangi á næstu árum. Enda geta allir eitthvað en engin allt!
Jón Smári Jónsson, Sigrún Eysteinsdóttir og Birna Björk Árnadóttir taka við viðurkenningunni frá Þorbjörgu Söndru Bakke starfsmanni Umhverfisstofnunar
Skipulagsstofnun hefur nú fengið viðurkenningu fyrir 4. Græna skrefið sitt.
Stofnunin sinnir stefnumótun, stjórnsýslu og leiðbeiningum um skipulag og framkvæmdir með sjálfbæra nýtingu auðlinda og vandaða byggð að leiðarljósi. Það styrkir trúverðugleika stofnunar sem vinnur að slíkum verkefnum þegar hlutirnir eru í lagi „heima fyrir“ og þess vegna frábært að sjá hve vel er vandað til verka.
Við óskum Skipulagsstofnun til hamingju með áfangann og hlökkum til að fylgjast með þeim og umhverfisstarfi þeirra áfram.
Starfsmenn Skipulagsstofnunar fögnuðu bæði Grænu skrefi og Hjólavottun
Ríkiskaup hafa nú fengið viðurkenningu fyrir að ljúka innleiðingu á skrefi 3 og 4. Ríkiskaup voru með fyrstu stofnunum til að skrá sig til leiks í verkefnið árið 2014 og hefur markvisst verið unnið að umhverfismálunum þar allar götur síðan. Stofnunin hefur lagt sig fram við að fræða starfsmenn um umhverfismál en ekki síður að fræða viðskiptavini sína um vistvæn innkaup sem eru auðvitað mikilvægur þáttur í Grænu skrefunum.
Halla Rún Friðriksdóttir, Hallgrímur H. Gröndal og Halldór Ó. Sigurðsson hjá Ríkiskaupum, Birgitta Steingrímsdóttir frá Umhverfisstofnun og Egill Skúlason hjá Ríkiskaupum.
Við höfum oft tekið Ríkiskaup sem dæmi þegar við tölum um frábæran árangur í samdrætti í pappírsnotkun en frá árinu 2011 hefur hún dregist saman um 82% – úr 33,7 kg/stöðugildi árið 2011 niður í 6,1 kg/stöðugildi árið 2019. Frábær árangur!
Næst á dagskrá hjá Ríkiskaupum er að keyra vinnu við 5. og síðasta skrefið af stað og eins og kemur fram á heimasíðu þeirra, „halda átrauð áfram að sinna öflugu umhverfisstarfi, huga að umhverfinu og vistvænum úrræðum í öllum þáttum starfseminnar og hvetja til vistvænna innkaupa.“
Til hamingju Ríkiskaup með áfangann!
Sjá frétt um málið á heimasíðu Ríkiskaupa.
Til að einfalda vinnu við gerð loftslagsstefnu hefur Umhverfisstofnun birt leiðbeiningar sem nálgast má á vef Grænna skrefa.
Samkvæmt lögum um loftslagsmál ber Stjórnarráði Íslands, ríkisstofnunum og fyrirtækjum í meirihlutaeigu ríkis að setja sér loftslagsstefnu. Stefnan skal innihalda markmið um samdrátt í losun gróðurhúsalofttegunda og kolefnisjöfnun ásamt aðgerðum til að ná markmiðunum.
Vilji hins opinbera er að fara fram með góðu fordæmi þegar kemur að því að draga úr losun gróðurhúsalofttegunda og þess vegna er mikilvægt að allir leggist á eitt og vinni að metnaðarfullum markmiðum.
Stefnan skal vera tilbúin í árslok 2021 en Umhverfisstofnun hvetur ríkisaðila til að hefjast handa sem fyrst og óskar öllum góðs gengis.
Skilafrestur vegna Græns bókhalds var 1. júní síðastliðinn. Við viljum endilega að sem flestir skili inn svo ekki hika við að heyra í okkur ef þið þurfið viðbótarskilafrest, þið getið annaðhvort sent póst á graenskref@graenskref.is eða birgittasteingrims@ust.is.
Við minnum á að Græna bókhaldinu er nú skilað í Gagnagátt Umhverfisstofnunar.
Gangi ykkur vel!