Samevrópskri Nýtniviku er nýlokið en átakið hófst með Kaffi Nýtni „Repair café“. Þetta er í fyrsta sinn sem boðið er upp á slíkan viðburð á Íslandi og stóðu Umhverfisstofnun og Reykjavíkurborg saman að skipulagningu hans. Hugmyndafræði „Repair café“ er að fólk geti komið saman og fengið aðstoð við að gera við hluti í stað þess að henda og kaupa nýtt. Í þetta sinn var viðburðurinn haldinn á Kaffi Laugarlæk í Reykjavík og var boðið upp á aðstoð og ráðleggingar við viðgerðir á húsgögnum, fatnaði og hjólum. Mikill áhugi var á viðburðinum og að álíka verði aftur haldið síðar.  

Með skýrslu sinni til Alþingis hvetur Rík­is­end­ur­skoðun fjár­mála- og efna­hags­ráðu­neyti og umhverf­is- og auð­linda­ráðu­neyti til að ljúka sem fyrst vinnu við nýja stefnu um vist­væn inn­kaup og grænan ríkisrekstur. Þá er lögð áhersla á að í stefn­unni sé hvatt til auk­innar þátt­töku ráðu­neyta og stofn­ana. Skýrsluna má sjá í heild sinni hér. 

Þá er fjórða skrefið komið hjá Umhverfis- og auðlindaráðuneytinu en starfsmenn þar hafa unnið markvisst að innleiðingu verkefnisins. Sem hluta af aðgerðum verkefnisins ætla þau að gróðursetja í reit sinn hjá Hekluskógum einu sinni á ári sem lið í kolefnisjöfnun og að fara árlegar hreinsunarferðir, þau þrýstu einnig á að settar yrðu upp hleðslustöðvar fyrir rafbíla á bílastæði ráðuneytisins og eru að vinna í að fá hjólavottun. Sigríður Auður Arnardóttir ráðuneytisstjóri tók á móti viðurkenningunni. 

Við viljum bjóða Verkmenntaskóla Austurlands velkominn í verkefnið og hlökkum við til að vinna með þeim öllum.