Morgunfundur Grænna skrefa 2021

/in /by

Morgunfundur Grænna skrefa 2021 verður haldinn föstudaginn 5. nóvember n.k.. Að þessu sinni er áhersla lögð á loftslagsstefnur og aðgerðaáætlanir og verða erindi og borðaverkefni því tengd.

Okkar eigin Kristín Helga Schiöth mun byrja á að fara yfir það helsta sem þarf að hafa í huga við skipulagningu umhverfisvænni viðburða. Eygerður Margrétardóttir, verkefnastjóri hjá Sambandi íslenskra sveitarfélaga mun kynna verkefnakistu Loftslagsvænni sveitarfélaga, en tilgangur hennar er að styðja við sveitarfélög í vinnu sinni að aðgerðamiðaðri stefnumótun í loftslagsmálum. Á fundinum verður einnig erindi um ábyrga kolefnisjöfnun frá Hauki Loga Jóhannssyni, verkefnastjóra hjá Staðlaráði.

Á fundinum fáum við að heyra reynslusögur frá þátttakendum sem hafa stigið skrefin og náð glæsilegum árangri, þrátt fyrir áskoranir.

Að lokum verður stutt erindi frá teymi Grænna skrefa, þar sem farið verður yfir helstu spurningar og svör, ásamt stuttri samantekt á deginum.

Fundurinn er opinn fyrir tengiliði ríkisaðila við Grænu skrefin og hefur skráningarform verið sent á alla ríkisaðila skráða í skrefin. Hafi einhver ekki fengið póst um skráningu má hafa samband við graenskref@graenskref.is.

Súkkulaðiskref Vatnajökulsþjóðgarðs

/in /by

Í byrjun mánaðarins luku allar starfsstöðvar Vatnajökulsþjóðgarðar fjórða skrefinu. Þær eru hvorki meira né minna en átta talsins og dreifðar vítt og breitt um landið;  Gljúfrastofa, Mývatn, Snæfellsstofa, Fellabær, Gamlabúð, Skaftafell, Kirkjubæjarklaustur og Skaftárstofa.  Það fylgja því eflaust aðrar áskoranir að vinna að skrefunum á svo dreifðum og fámennum starfsstöðvum en í mörgum öðrum ríkisstofnunum en verkefnið var leyst af miklum metnaði og stakri prýði.

Þrátt fyrir fjölda starfsstöðvanna þurfti starfsmaður Grænu skrefanna ekki að senda límmiðana nema á einn stað, en  í Fellabæ tók Agnes Brá við þeim og póstsendi á starfsstöðvarnar að viðbættu súkkulaði. Ekki ónýtt að halda upp á góðan árangur með þeim hætti. Við óskum Vatnajökulsþjóðgarði til hamingju með góðan árangur.

 

 

Ný orkumerki Evrópusambandsins og uppfærður gátlisti

/in /by

Orkumerki Evrópusambandsins hafa tekið breytingum og eru nú á kvarðanum A-G á meðan orkunýtniflokkarnir A+, A++ og A+++ víkja. Nýi kvarðinn er strangari og er hannaður á þann veg að mjög fáar vörur í dag eru í flokki A, en það gefur rými fyrir betri orkunýtingu í framtíðinni. Orkunýtnustu raftæki dagsins í dag eru oftast á skalanum B-D samkvæmt nýju merkjunum.

Ástæðan fyrir breytingunum er að gera merkin skýrari, en yfir 90% af rafvörum voru áður í flokki A+, A++ eða A+++. Nýju merkin tryggja það einnig að fyrirtæki haldi áfram að þróa orkunýtnari tæki.

Útlit merkimiðanna hefur breyst lítillega og er orðið einfaldara og nútímalegra. Myndtákn sem skýra tiltekna eiginleika vörunnar hafa verið uppfærð, nokkur eru eins og á gamla miðanum, sum hafa verið endurgerð og sum eru ný.

Þann 1. mars tóku nýju orkumerkin gildi fyrir ísskápa, frysta, uppþvottavélar, þvottavélar, þvottavélar með þurrkurum, sjónvörp og rafeindaskjáir og 1. september bættust ljósgjafar við. Aðrar vörur munu taka upp nýju orkumerkin á næstu árum.

Aðgerð í gátlista Grænu skrefanna sem snýr að kaupum á raftækjum hefur verið uppfærð með tilliti til nýju merkjanna. Aðgerðin var númer fjögur í skrefi eitt, undir innkaupum, en er nú númer fimm. Ein aðgerð hefur bæst við í skrefi eitt, undir innkaupum, þar sem innkaupafólk er beðið um að nota ákvörðunartré fyrir innkaup áður en innkaup fara fram. Þið getið sótt uppfærðan gátlista hér eða undir Vinnugögn hér á síðunni.

Gangi ykkur vel!

Orkan beisluð í þriðja skrefi Fæðingarorlofssjóðs

/in /by

Fæðingarorlofssjóður kláraði á dögunum sitt þriðja Græna skref með glæsibrag enda hefur verið unnið markvisst og ötullega að verkefninu undanfarna mánuði. Það vakti sérstaka athygli hversu vel gekk í orkusparnaðaraðgerðum hjá Sjóðinum því rafmagnsreikningurinn lækkaði um helming milli ára. Útgjöld í kökusjóð hljóta þó að hækka á móti því þetta er þriðja skrefið sem Fæðingarorlofssjóður tekur á árinu.

Háskólinn á Akureyri lýkur þriðja og fjórða skrefi á einu bretti

/in /by

Það er heldur betur gangur í umhverfismálum hjá ríkisstofnunum þessi dægrin og í dag steig Háskólinn á Akureyri þriðja og fjórða skrefið í einu með glæsibrag.

Í Háskólanum á Akureyri er metnaðarfullt umhverfisráð, skipað bæði starfsfólki og nemendum, sem heldur utan um umhverfismál í skólanum. Ráðið gaf út þetta fróðlega og skemmtilega myndband nýlega, þar sem greint er frá aðgerðum ráðsins, m.a. þeim sem falla undir Grænu skrefin.

Við hvetjum sérstaklega fulltrúa annarra stofnana til að horfa á myndbandið. Eitt markmið Grænu skrefanna er að stofnanir deili fróðleik og reynslu við innleiðingu skrefanna, og Háskólinn á Akureyri leggur sannarlega sitt af mörkum með myndbandinu. Við þökkum HA kærlega fyrir það og óskum þeim innilega til hamingju með skref 3 og 4.