Starfsfólk Umhverfis- og orkustofnunar vinnur nú að umbótaverkefni tengdu græna bókhaldinu sem miðar að því að einfalda og bæta aðgengi að upplýsingum um stöðuna á umhverfisvænni starfsemi  ríkisstofnana.

Verkefnið snýst um að þróa miðlægt mælaborð sem byggir á rauntímagögnum úr bókhalds- og mannauðskerfum Fjársýslunnar. Með þessu færist grænt bókhald frá handvirkri gagnasöfnun yfir í sjálfvirka og samræmda gagnamiðlun sem sparar ríkinu verulegan tíma og fjármuni.

Samskipti við Fjársýsluna og Fjármála- og efnahagsráðuneytið hófust í mars 2025 og hefur verið unnið markvisst að því að koma á traustum gagnatengingum. Þær tengingar urðu virkar í byrjun október og hefur starfsfólk UOS síðan þá unnið að því að greina gögnin og skilgreina þær umbætur sem þarf á rafrænum reikningum til að mælaborðið geti orðið að veruleika.

Vonir standa til að mælaborðið verði aðgengilegt fyrir lok árs 2025. Með þessari breytingu verður Umhverfis-og orkustofnun kleift að fylgjast með umhverfisgögnum í rauntíma og bregðast fyrr við, auk þess sem verkefnið mun spara tugir milljóna á ársgrundvelli í vinnusparnaði innan ríkisins.

Verið velkomin á morgunfund Grænna skrefa 2024. Fundurinn fer fram miðvikudaginn 4. desember kl. 9:00-10:30 í streymi á Teams.

Þema fundarins í ár er hringrásarhagkerfið og vinnustaðurinn. Við ætlum að útskýra hvað hringrásarhagkerfi er, hvert umfang hringrásar á Íslandi er í dag og hvað er hægt að gera til þess að stuðla að meiri hringrás í einkalífi og á vinnustöðum.

______

Viðburðurinn er ætlaður stofnunum í Grænum skrefum um allt land en öll sem hafa áhuga á að fræðast meira um hringrásarhagkerfið eru velkomin!

_______

Dagskrá

Guðmundur Steingrímsson umhverfisfræðingur – Umfang hringrásar á Íslandi

Hildur Mist Friðjónsdóttir sérfræðingur hjá Umhverfisstofnun – Hugvekja um einstaklinga í hringrásarhagkerfinu

Hrafnhildur Árnadóttir framkvæmdastjóri Frostþurrkun ehf – Kynning á starfsemi íslensks hringrásarfyrirtækis í matvælageiranum

Bergljót Hjartardóttir sérfræðingur hjá Umhverfisstofnun –  Hlutverk stofnana í hringrásarhagkerfinu

Umræður

Hlekkur á viðburðinn er hér

Á dögunum náði embætti Lögreglustjórans á Vesturlandi því frábæra afreki að klára öll fimm Grænu skrefin. Embættið var þar með fyrsta lögreglustjóraembættið til að klára öll skrefin og gerði það með glæsibrag. Liðin eru um tvö ár frá því að embættið hóf vinnu við Grænu skrefin en þau voru unnin rösklega í samstarfi umhverfisnefndar embættisins við ráðgjafafyrirtækið Environice.

Umhverfisnefnd embættis Lögreglustjórans á Vesturlandi samanstendur af fulltrúum frá öllum sex starfsstöðvum og hefur árangurinn því náðst með samhentu átaki um allt svæðið. Meðal stærstu aðgerðanna sem ráðist var í var að skipta bifreiðum embættisins út fyrir rafmagnsbíla, en í vor fékk embættið afhenta fyrsta sérútbúna, fjórhjóladrifna lögreglubílinn í Evrópu sem gengur fyrir rafmagni.

Áætlað er að losun gróðurhúsalofttegunda frá embættinu á þessu ári verði allt að 50% minni en árið 2020 og að samdrátturinn hafi náð 75% árið 2024, sem er vægast sagt glæsilegur árangur. Það hefur verið gaman að sjá hversu metnaðarfullt umhverfisstarf er rekið við embætti Lögreglustjórans á Vesturlandi og við óskum þeim innilega til hamingju með árangurinn.

Hægt er að lesa meira í umfjöllun í Skessuhorni og á vef Environice.

Verið velkomin á morgunfund Grænna skrefa 2023! Fundurinn fer fram fimmtudaginn 7. desember kl. 9:00-10:40 á Teams.

Þema fundarins í ár er líffræðileg fjölbreytni og vinnustaðurinn. Við ætlum að útskýra hvað líffræðileg fjölbreytni er, hvað ógnar henni og af hverju hún skiptir okkur máli. Við ætlum einnig að fjalla um hvernig við sjálf og vinnustaðirnir okkar geta stutt við líffræðilega fjölbreytni.

Skráning fer fram hér.

Hægt er að senda inn nafnlausar spurningar og fyrirspurnir hér.

Dagskrá

Kl. 9:05 – Snorri Sigurðsson, sviðsstjóri náttúruverndar hjá Náttúrufræðistofnun Íslands, ræðir líffræðilega fjölbreytni og af hverju hún skiptir máli, bæði á Íslandi og í alþjóðlegu samhengi.

Kl. 9:30 – Rannveig Magnúsdóttir, sérfræðingur hjá Landvernd og Skólum á grænni grein, ræðir helstu ógnir við líffræðilega fjölbreytni.

Kl. 9:55 – Aðalbjörg Egilsdóttir, sérfræðingur í teymi hringrásarhagkerfis hjá Umhverfisstofnun, ræðir hvernig vinnustaðir geta lagt sitt af mörkum til að styðja við líffræðilega fjölbreytni.

Kl. 10:15 – Umræður

Við hvetjum öll sem vilja vita meira um líffræðilega fjölbreytni og hvernig mannkynið hefur jákvæð og neikvæð áhrif á hana til að sækja fundinn.

Grænn hittingur í lok dags

Í tilefni fundarins bjóðum við til græns hittings á Loft hostel kl. 15 sama dag.

Við hvetjum þátttakendur í Grænum skrefum út um allt land til að hittast á sams konar hittingum á sínum heimaslóðum. Ef þú ert með hugmynd um hvar væri gott að hittast á þínu svæði, láttu okkur endilega vita á graenskref@graenskref.is og við komum því áleiðis til annarra þátttakenda í Grænum skrefum.

Skil á Grænu bókhaldi ríkisstofnana fyrir árið 2022 voru í vor. Niðurstöður bókhaldsins eru um margt ánægjulegar enda gífurlega gott umhverfisstarf sem hefur átt sér stað, meðal annars í tengslum við Græn skref.

Losun gróðurhúsalofttegunda á hvert stöðugildi árið 2022 var örlítið hærri en árið 2021, en lægri en árin þar á undan, þ. á m. árið 2020. Ef tekið er tillit til breyttrar starfsemi vegna heimsfaraldurs árin 2020 og 2021, má með sanni segja að mikill árangur hafi náðst. Um 25% samdráttur var í losun gróðurhúsalofttegunda á hvert stöðugildi á milli áranna 2019 og 2022, en samkomu- og ferðatakmarkanir lituðu starf stofnana hvorugt þeirra ára.

Þegar losun frá ólíkum uppsprettum er skoðuð má sjá að raforkunotkun jókst töluvert mikið á milli ára, sem og flug. Hins vegar var losun vegna flugs 30% minni á stöðugildi árið 2022 en 2019, sem við fögnum þar sem þá giltu engar ferðatakmarkanir sem settu strik í ferðalög.

Losun vegna aksturs dróst örlítið saman miðað við fyrri ár, sem verður að teljast góður árangur af sömu ástæðum.

Losun vegna óflokkaðs úrgangs hefur jafnframt dregist stöðugt saman, á meðan hlutfall flokkaðs úrgangs er á stöðugri uppleið. Að auki hefur hlutdeild umhverfisvottaðrar ræstivöru aukist sem og hlutfall umhverfisvottaðs pappírs.

Þessar niðurstöður eru sannarlega fagnaðarefni og við viljum hrósa öllum sem lögðu hönd á plóg! Við stefnum að sjálfsögðu enn hærra (eða lægra 😉) og höldum áfram að setja umhverfismálin í forgang!