Stofnun Vilhjálms Stefánssonar er komin með fjögur Græn skref.
Stofnunin hefur tekið þátt í verkefninu frá því það var innleitt fyrst á meðal ríkisstofnanna og vinna aðgerðirnar af natni og vandvirkni.
Við óskum þeim til hamingju með áfangann og hlökkum til að klára fimmta og síðasta skrefið með þeim!
Í byrjun febrúar höfðu allar starfsstöðvar Landhelgisgæslu Íslands lokið við að stíga fyrsta Græna skrefið sitt. Umfangsmikil innleiðing og fræðsla hefur átt sér stað undanfarna mánuði í flugskýli Landhelgisgæslunnar á Reykjavíkurflugvelli, um borð í báðum varðskipunum, á öryggissvæðinu á Keflavíkurflugvelli og á skrifstofum Gæslunnar í Skógarhlíð 14. Samkvæmt starfsfólki Landhelgisgæslunnar sem halda utan um innleiðinguna má greina aukna umhverfismeðvitund og áhuga starfsmanna á umhverfismálum á öllum starfstöðvum.
Við óskum Landhelgisgæslunni til hamingju með árangurinn og hlökkum til áframhaldandi samstarfs!
Grænum skrefum fagnað!
Við óskum Fiskistofu til hamingju með að vera komin með 2. Græna skrefið. Fiskistofa er með starfssöðvar út um allt land og hafa þær allar hlotið viðurkenningu fyrir 2. skrefið. Til hamingju Hafnafjörður, Akureyri, Höfn, Vestmannaeyjar, Stykkishólmur og Ísafjörður!
Okkur langar til þess að hrósa Fiskistofu sérstaklega fyrir að nýta Grænu skrefin til þess að auka samvinnu á milli starfsstöðva Fiskistofu. Þau líta ekki bara á verkefnið sem einhvern tékklista sem þarf að klára, heldur einskonar hópefli fyrir starfssemi Fiskistofu. Við hvetjum fleiri til þess að taka sér þetta til fyrirmyndar.
Til að taka annað skrefið hefur Fiskistofa meðal annars skilað Grænu bókhaldi, farið sparlega með rafmagn og hita, flokkað í alla vega sjö úrgagnsflokka, dregið úr pappírsnotkun, hugað að aðgengi fyrir hjólandi, og skipt yfir í lífrænt kaffi. Fiskistofa þurfti heldur ekki heimsfaraldur til að byrja að nota fjarfundarbúnað heldur hefur um langt skeið stundað fjarfundi, með tilheyrandi olíusparnaði. En það fylgja því vissulega áskoranir að vera umhverfisvænn á sama tíma og maður sinnir eftirliti um allt land. Það er ekki gott ef Fiskistofa dregur úr eftirliti sínu, enda er heilbrigði fiskistofnanna okkar mikilvægt umhverfismál. En til að hafa eftirlit með veiðum þurfa starfsmenn Fiskistofu oft að keyra langar vegalengdir og þar duga enn sem komið er ekki rafbílar eða bílar með innlendum orkugjöfum. Við vitum samt að Fiskistofa fylgist vel með þróuninni og vonandi verður hægt að draga markvisst úr losun per ekinn kílómeter.
Við óskum Fiskistofu enn og aftur til hamingju með þennan áfanga!
Við viljum vekja athygli á því fyrir tengiliði Grænna skrefa að uppfært kennslumyndband fyrir Grænt bókhald er nú aðgengilegt. Skil á Grænu bókhaldi eru fyrir 1. apríl 2021 og hefur það reynst stofnunum sem hafa skilað Grænu bókhaldi áður afar vel að vinna bókhaldið jafnt og þétt fram að skilum.
Skil á Grænu bókhaldi er ein af lykilaðgerðum Grænna skrefa og undirstaða allrar vinnu tengdri loftslagsstefnu ríkisaðila. Myndbandinu er skipt í kafla eftir ólíkum umhverfisþáttum og ykkur til hægðarauka má finna nákvæma tímasetningu þessara hluta hér:
Kynning á Grænu bókhaldi 00:00
Kynning á Gagnagátt Umhverfisstofnunar, þangað sem bókhaldinu er skilað 1:23
Síða 1 – Stærð húsnæðis og fjöldi stöðugild 2:47
Síða 2 – Skrifstofupappír og prentþjónusta 4:42
Síða 3 – Ræsti- og hreinsiefni og ræstiþjónusta 6:45
Síða 4 – Rafmagn og heitt vatn 9:30
Síða 5 – Akstur 12:04
Síða 5 – Flug 15:41
Síða 6 – Önnur losun 19:07
Síða 7 – Samgöngusamningar 20:40
Síða 8 – Úrgangur 21:40
Síða 9 – Aðrar rekstrarvörur 24:20
Síða 10 – Matarsóun 25:14
Síða 11 – Niðurstöður og markmið 27:00
Síða 12 – Samantekt á losun gróðurhúsalofttegunda, matarsóun og kolefnisjöfnun 29:22
Síða 13 – Staðfesting á skilum 30:55
Síða 14 – Skilafrestur og aðstoð 31:24
Gangi ykkur vel!
Starfsmenn Grænna skrefa hafa tekið eftir því að margir ríkisaðilar stefna á að ljúka skrefi samkvæmt gamla gátlistanum fyrir 1. mars. Við fögnum áhuga og metnaði fyrir verkefninu og viljum því biðja þá sem hafa sett markið á klára skref fyrir 1. mars að hafa samband við sinn tengilið sem fyrst til að bóka úttekt.
Í því samhengi er mikilvægt að árétta að við miðum við að úttekt á gömlu skrefunum sé lokið fyrir 1. mars, ekki að ferlið hefjist fyrir 1. mars. Í ferlinu felst að senda inn gátlistann til yfirferðar og fá endurgjöf frá okkur. Það er mjög algengt að eitthvað þurfi að laga eftir yfirferðina frá okkur. Þess vegna er gott að gera ráð fyrir að ferlið frá því að yfirferð á gátlista hefst og úttekt er bókuð taki í kringum tvær vikur. Þetta þýðir að nú fer hver að verða síðastur að senda inn gátlista og bóka úttekt fyrir gamla gátlistann.
Fyrir þá sem sjá sér ekki kleift að klára gömlu skrefin í bráð bendum við stofnunum á að skipta yfir í nýja gátlistann. Þau skref sem tekin hafa verið með gamla gátlistanum haldast inni, og maður byrjar vinnuna með nýja gátlistann á því skrefi sem maður er.
Gangi ykkur vel og áfram gakk!
Framhaldsskólinn í Vestmanneyjum er mættur til leiks í Grænu skrefunum. Velkominn!
Við hlökkum til samstarfssins.
Við bjóðum Menntaskólann á Ísafirði hjartanlega velkominn í Grænu skrefin.
Þann 5. febrúar síðastliðinn fékk Menntaskólinn við Sund fyrstur allra menntaskóla staðfestingu á því að hafa uppfyllt öll 5 Grænu skrefin. Afhending fór fram 9. febrúar og sjá má á mynd Sigrúnu Ágústsdóttur forstjóra Umhverfisstofnunar afhenda Má Vilhjálmssyni rektor skólans viðurkenningu fyrir þennan árangur.
Sigrún Ágústsdóttir forstjóri Umhverfisstofnunar afhendir Má Vilhjálmssyni rektor Menntaskólans við Sund viðurkenningu fyrir fimmta skrefið
Menntaskólinn við Sund er ekki bara fyrsti menntaskóli landsins til þess að klára öll Grænu skrefin heldur var hann einnig fyrstur til að setja sér og innleiða loftslagsstefnu, markmiðasetningu og aðgerðaáætlun í loftslagsmálum.
Menntaskólinn við Sund var fyrsti menntaskóli landsins til þess að skrá sig í Grænu skrefin og hefur þeirra umhverfisstarf einkennst af ástríðu og virðingu fyrir umhverfinu. Skólinn hefur notið góðs af því að hafa frótt starfsfólk og áhugasama nemendur sem tryggja velgengni verkefnisins.
Starfsfólk Menntaskólans við Sund og starfsmenn Umhverfisstofnunar
Már Vilhjálmsson komst svo að orði: ,,Í Menntaskólanum við Sund vorum við meðvituð um að við værum umhverfissóðar eins og flestir aðrir. Við sættum okkur hins vegar ekki við þá stöðu og ákváðum að gera bragarbót samhliða því að við færum í endurskoðun á allri starfssemi skólans, skipulagi hans, námskrá og áherslum í starfseminni.”
Umhverfisfræði hefur verið skyldufag fyrir alla nemendur frá árinu 2015 og er Menntaskólinn við Sund einnig þátttakandi Grænfánaverkefnisins sem er rekið af náttúruverndarsamtökunum Landvernd. Þessi verkefni eiga gífurlega vel saman í skólahaldi og hafa mörg jákvæð samverkandi áhrif og því til fyrirmyndar hjá Menntaskólanum við Sund að vinna þessi verkefni samhliða hvort öðru.
Fimmta skrefið í höfn
Umhverfisstofnun óskar öllum starfsmönnum og nemendur Menntaskólans við Sund kærlega til hamingju með þennan árangur og þakkar fyrir ánægjulegt samstarf yfir árin.
Við erum mjög spennt að kynna fyrir ykkur nýjan leiðarvísi að betri samgöngusamningi. Um er að ræða bækling sem gefinn er út af Grænum skrefum til að aðstoða vinnustaði við að gera enn betri samgöngusamninga. Samgöngusamningar eru afar mikilvægir þar sem ferðir starfsmanna til og frá vinnu oftast langstærsti losunarvaldurinn sem tengist venjulegri skrifstofustarfsemi. Samgöngusamningurinn er eitt besta tækið sem vinnuveitendur hafa til að hvetja starfsmenn til vistvænna samgangna.
Góð ráð og reglur Skattsins
Í bæklingnum eru tekin saman ráðleggingar sem byggja á rannsóknum um atferlisfræði. Við fjöllum einnig um reglur skattsins um samgöngustyrki, sem er að sjálfsögðu mikilvægt að fylgja. Við bendum þó á að samgöngusamningum þarf ekki að fylgja styrkur, og því er töluvert meira svigrúm um hvernig hægt er að móta samninginn en reglur Skattsins um styrki kveða á um.
Horfum til AUSTurs
Í stórum dráttum snúast ráðleggingarnar um að gera það auðveldara, unaðslegra, samfélagslegra og tímanlegra að gera samning (horfum til AUSTurs). Til dæmis er hægt að auðvelda einhverjum að gera samgöngusamning að bæta fjarvinnu við samninginn. Samgöngustyrkir eru klassísk leið til að gera samninginn unaðslegri, en við bendum einnig á aðrar leiðir til að verðlauna starfsfólk. Við mælum með því að virkja starfsfólkið við gerð samningsins til þess að nýta þekkingu þeirra, auka sátt um ákveði hans og fá fleiri til að gera samning. Við hvetjum líka vinnuveitendur til þess að vera með tímanlegar áminningar um samninginn, til dæmis rétt fyrir sumartímann þegar margir hafa hug á því að byrja að hjóla.
Samgöngusamningur fyrir alla
Það var okkar metnaður með þessum bæklingi að sem flestir geri samgöngusamning. Við teljum að það sé mikilvægt að hægt sé að laga samgöngusamninginn að aðstæðum. Eftir lesningu bæklingsins vonum við að öllum sé ljóst að bæði stofnanir með mikið og lítið fjárhagslegt rými geta boðið upp á samgöngusamning. Það á líka að vera hægt að velja samgöngumáta með minni neikvæðum umhverfisáhrifum bæði í dreifbýli og í þéttbýli. Að sama skapi eiga bæði starfsmenn sem búa langt frá og nálægt vinnustað að geta gert samning. Allt er betra en ekkert!
Umboðsmaður skuldara hefur skráð sig til leiks í Grænum skrefum.
Megintilgangur embættisins er að bæta stöðu einstaklinga sem eiga í greiðsluerfiðleikum og auðvelda þeim að koma greiðslubyrði og skuldastöðu í ásættanlegt horf.
Hjá Umboðsmanni skuldara starfa 17 einstaklingar og við hlökkum til að leiðbeina þeim í átt að umhverfisvænni skrifstofustarsemi og stíga með þeim Grænu skrefin!