Lágmörkun matarsóunar er loftslagsmál, efnahagsmál og mikilvægur þáttur í innleiðingu hringrásarhagkerfisins. Ísland hefur sett sér markmið um að draga úr matarsóun, bæði sem lið í aðgerðaáætlun í loftslagsmálum og sem hluta af framlagi okkar til heimsmarkmiða Sameinuðu þjóðanna.

Matarsóun er einn af þeim losunarþáttum sem fylla þarf í Græna bókhaldið ár hvert sem gerir það einstaklega áhugavert að fylgjast með hvernig við stöndum okkur.

Nú þegar flestir eru mættir til starfa er tilvalinn tími til að mæla matarsóun stofnana. Við hjá Umhverfisstofnun réðumst í matarsóunarmælingu í síðustu viku og tókum saman ferlið sem sjá má í myndskeiðinu hér að neðan:

Eins og sjá má er slík mæling ekki bara nytsamleg fyrir Græna bókhaldið, heldur er oft hægt að sjá hvar við getum bætt okkur og fundið viðeigandi lausnir. Það getur bæði sparað fjármuni og dregið úr neikvæðum umhverfisáhrifum.

Við hvetjum ykkur endilega til að byrja á ykkar eigin mælingum, og minnum á öll vinnugögnin sem eru á síðunni okkar, þ.á.m. skráningarskjalið fyrir mælinguna, leiðbeiningar fyrir mötuneyti, kynningu og myndband með húsráðum.

Grænu skrefin hafa lifað góðu lífi í sumar og margar stofnanir unnið að undirbúningi næsta skrefs hjá sér. Á skrifstofu Umhverfisstofnunar er allt starfsfólk Grænna skrefa mætt til baka eftir gott sumarfríi, tilbúið að fara yfir gátlista og taka stofnanir í úttekt.

Það er bæði ánægjulegt og mikilvægt að vinna áfram saman að bættu umhverfisstarfi vinnustaða ríkisins og tilhlökkun fyrir komandi vetri er mikil. Við hvetjum ríkisaðila til að taka stór skref í umhverfisvæna átt á næstunni og við hlökkum til næstu yfirferða Grænu skrefanna með ykkur!

Nú líður að sumarfríum hjá starfsfólki. Munum að ganga frá vinnustöðvunum okkar þannig að þær noti sem minnsta orku á meðan við erum í fríi. Að loka gluggum, draga fyrir og lækka á ofnum sparar heitt vatn. Að slökkva á tækjum, taka tölvur, skjái og dokkur úr sambandi sparar rafmagn. Dokka sem er slökkt á notar svipað mikið rafmagn og ein ljósapera. Skjáirnir geta auðveldlega notað enn meira. Safnast þegar saman kemur!

Við í Grænu skrefunum hvetjum ykkur til að senda póst á samstarfsfólk ykkar með þessari áminningu, þið getið nýtt ykkur tékklistann okkar sem listar upp helstu atriði hér.

Nú styttist óðfluga í Stóra plokkdaginn sem haldinn verður hátíðlegur í 6. sinn sunnudaginn 30. apríl næstkomandi.

Við í Grænu skrefunum hvetjum alla vinnustaði til að hita upp fyrir daginn með því skipuleggja vinnustaðaplokk í vikunni. Við höfum útbúið einfaldar leiðbeiningar sem vonandi auðvelda ykkur að skipuleggja slíkan viðburð, hvort sem það er núna í vikunni eða við annað tilefni:

Nánari upplýsingar um Plokk á Íslandi og Stóra plokkdaginn finnið þið hér:

Stóri plokkdagurinn á Facebook
Plokk á Íslandi á Facebook
Heimasíða Plokk á Íslandi

Við minnum ykkur kæru Grænskrefungar á skil á Grænu bókhaldi, en fresturinn er nú sem fyrr 1. apríl. Grænt bókhald er grunnurinn að okkar umhverfisstarfi, með því að halda utan um notkun og innkaup á vörum og þjónustu getum við betur áttað okkur á umhverfisáhrifunum sem starfsemin hefur og sett okkur markmið um bætta frammistöðu.

Hér eru nánari upplýsingar um Græna bókhaldið.