Þróunarfélag Keflavíkurflugvallar ehf, Kadeco, hefur nú skráð sig til leiks í Grænu skrefin. Kjarnaverkefni félagsins er að leiða þróun á landi ríkisins sem umlykur flugverndarsvæði Keflavíkurflugvallar. Kadeco kemur að ýmsum verkefnum sem eiga það sameiginlegt að auka virði svæðisins. Fjórir starfsmenn starfa hjá félaginu og hlökkum við til að feta með þeim græna veginn.
Allar starfsstöðvar Skógræktarinnar hafa nú fengið viðurkenningu fyrir að stíga annað Græna skrefið. Starfsfólki Skógræktarinnar er mjög umhugað um umhverfið og höfum við í Grænu skrefunum ekki síður lært af þeim en þau af okkur þegar kemur að umhverfismálunum. Öflug fjarfundarmenning er til staðar hjá stofnuninni sem er dreifð um allt land og fara t.a.m ýmis námskeið og fyrirlestrar fram á Teams. Með því sparast bæði tími, fjármunir og losun. Tjaldsvæði Skógræktarinnar á Vöglum og Hallormsstað bjóða gestum upp á flokkun úrgangs sem er frábært framtak sem fleiri tjaldsvæði um land allt mættu taka til fyrirmyndar. Nýtni og skapandi hugsun eru áberandi hjá Skógræktinni eins og sjá má á meðfylgjandi myndum þar sem nafnspjöld og aðrir munir eru búnir til úr afurðum skóganna. Á Mógilsá er lífrænn úrgangur jarðgerður á staðnum eins og á fleiri starfsstöðvum og kaffikorgurinn fær að fara beinustu leið út í skóg þar sem næringarefnin nýtast svo sannarlega.
Húsnæðis- og mannvirkjastofnun (HMS) hefur nú skráð sig til leiks í Grænu skrefin. Stofnanir sem taka þátt í verkefninu eru því orðnar 83 talsins með yfir 290 starfsstöðvar um land allt. Íbúðalánasjóður og Mannvirkjastofnun sameinuðust undir nafni Húsnæðis- og mannvirkjastofnunar í byrjun árs 2020. Sameiningunni er ætlað að stuðla að heildstæðri yfirsýn yfir húsnæðis- og mannvirkjamál á einum stað ásamt því að efla stefnumótun og framkvæmd húsnæðis- og mannvirkjamála til hagsbóta fyrir almenning. 105 manns starfa hjá stofnuninnu og hlökkum við mikið til umhverfissamstarfsins með þeim.
Í Grænu bókhaldi eru innbyggðir svokallaðir losunarstuðlar sem gera það að verkum að losun frá helstu uppsprettum gróðurhúsalofttegunda (GHL) í starfseminni reiknast sjálfkrafa.
Umhverfisstofnun hefur nú birt upplýsingar um losunarstuðlana á heimasíðu sinni og eru þeir því aðgengilegir fyrirtækjum, sveitafélögum, stofnunum og öllum þeim sem vilja reikna út losun frá sinni starfsemi.
Stuðlunum fylgja skýrar leiðbeiningar um hvaða stuðlar henti best til að reikna út losun frá helstu uppsprettum GHL í rekstri fyrirtækja, stofnana og sveitarfélaga á Íslandi. Markmiðið er að aðstoða sem flesta við að fá haldbæra mynd af losun síns reksturs eða annara athafna. Auk þess gefa stuðlarnir rekstraðilum tækifæri til að tryggja að upplýsingar um þeirra losun sé í samræmi við þær reiknireglur sem gilda í Landsskýrslu um losun gróðurhúsalofttegunda, sem íslensk stjórnvöld taka saman og skila til Loftslagssamnings Sameinuðu þjóðanna (UNFCCC).
Til að glöggva sig á því hvernig nota skal losunarstuðla má segja að þeir séu tölur sem nota má til að reikna út losun GHL með því að margfalda þá við viðeigandi grunngögn. T.a.m. er unnt að reikna út magn GHL sem losna við bruna eldsneytis með því að margfalda losunarstuðul fyrir brennt eldsneyti við magn þess eldsneytis sem notað var.
Losunarstuðlana og helstu upplýsingar um þá má finna hér.
Fjölbrautarskóinn í Garðabæ hlaut viðurkenningu fyrir fyrstu 2 grænu skrefin í síðustu viku á setningu Imbrudaga í skólanum. Þema daganna voru umhverfismál og margt áhugavert var í boði fyrir nemendur skólans af bæði fræðslu og vinnustofum, m.a. flutti Andri Snær Magnason fyrirlestur fyrir fullum sal nemenda, Umhverfisstofnun hélt fyrirlestur um matarsóun og Einar Bárðarson sagði frá Votlendissjóði og þeirra góða starfi.
Óskum starfsfólki og nemendum skólans til hamingju með græna starfið og hlökkum til áframhaldandi samstarfs í að stuðla að betra umhverfi, fyrir okkur og framtíðina!
Á myndinni eru frá vinstri: Snjólaug Elín Bjarnadóttir aðst. skólameistari, Hildur Harðardóttir Umhverfisstofnun, og Kristinn Þorsteinsson skólameistari.
Vinnustofa á Imbrudögum FG, hér var verið að vinna með gamla tauboli og gefa þeim nýtt líf sem breytta boli, töskur o.fl.
Starfsstöð Landsvirkjunar á Glerárgötunni á Akureyri hlaut á dögunum viðurkenningu fyrir fimmta og síðasta græna skrefið. Það er til fyrirmyndar hvað vel hefur gengið að innleiða skrefin hjá Landsvirkjun og hefur nú öll hefðbundin skrifstofustarfssemi fyrirtækisins lokið skrefunum. En þau láta ekki þar við sitja og eru nú þegar byrjuð á innleiðingu skrefanna á aflstöðvunum svo sem Blöndu- og Laxárvirkjun.
Við óskum Landsvikrjun til hamingju með þetta allt saman!
Helga Ösp Jónsdóttir (til vinstri) frá Umhverfisstofnun veitir Ragnheiði Ólafsdóttir (miðja) og Anítu Júlíusdóttur viðurkenninguna.
Kampakátir starfsmenn á Glerárgötunni gæða sér á grænskrefaköku.
Fjársýsla ríkisins hlaut viðurkenningu fyrir annað Græna skrefið um daginn. Vilborg Hólmjárn, sérfræðingur hjá Fjársýslunni, heldur utan um verkefnið af miklum myndarbrag og stefna þau á að taka þriðja skrefið með vorinu.Við óskum þeim innilega til hamingju með árangurinn!
Vilborg Hólmjárn og Hildur Harðardóttir hjá Umhverfisstofnun.
Embætti lögreglustjórans á Norðurlandi eystra fékk í desember 2019 afhenta viðurkenningu fyrir að hafa lokið innleiðingu á fyrsta Græna skrefinu – fyrst allra lögregluembætta. Allar lögreglustöðvar embættisins taka þátt í verkefninu af fullum krafti, en þær eru staðsettar á Akureyri, Dalvík, Húsavík, Siglufirði og Þórshöfn. Mikill hugur er í starfsfólki embættisins og metnaður til að gera vel í umhverfismálunum. Skilvirkri úrgangsflokkun hefur verið komið upp á öllum stöðvum og leiðbeiningar eru vel sýnilegar starfsmönnum eins og sjá má á meðfylgjandi myndum. Einnig hafa innkaup á ræsti- og hreinsiefnum verið tekin í gegn og umhverfisvottaðar vörur keyptar inn eins og hægt er. Þið eruð frábærar fyrirmyndir fyrir önnur lögregluembætti sem við hvetjum að sjálfsögðu til að skrá sig til leiks. Til hamingju með árangurinn! Sjá frétt RÚV um málið.
Lögreglustöðin á Akureyri
Lögreglustöðin á Siglufirði
Lögreglustöðin á Dalvík
Lögreglustöðin á Húsavík
Nú er uppfært excel skjal græna bókhaldsins niðurhalanlegt undir liðnum Grænt bókhald hér á heimasíðunni. Helstu nýmæli eru að hægt er að reikna út losun gróðurhúsalofttegunda frá fleiri þáttum og gerðar voru ýmsar uppfærslur, ítarlegri leiðbeiningar og losunarstuðlar uppfærðir.
Gagnagátt græns bókhalds fór í loftið í fyrra og er henni ætlað að leysa af hólmi excel skjalið góða. Nokkrir hnökrar hafa þó verið á gáttinni og er verið að vinna í lagfæringum á henni þessa dagana. Við biðjum þátttakendur því að skila græna bókhaldinu ekki inn fyrr en Gagnagáttin verður komin í lag. Síðasti skiladagur græns bókhalds vegna ársins 2019 er 1. apríl næstkomandi.
En þurfum við að nota excel skjalið þegar Gagnagáttin er tilbúin? Nei, mögulegt er að skrá græna bókhaldið beint inn í Gagnagátt Umhverfisstofnunar. Excel skjalið nýtist sem vinnuskjal og veitir möguleika á að skrá hjá sér forsendur og aðrar upplýsingar auk þess sem hægt er að bæta við þáttum. Neðst á þessari síðu eru leiðbeiningarmyndbönd um hvernig nota skal excel skjalið og hér er kynning á græna bókhaldinu frá árinu 2018.
Listasafn Íslands hlaut í dag viðurkenningu fyrir tvö fyrstu grænu skrefin. Innleiðing verkefnisins hefur gengið hratt og vel fyrir sig, enda hópurinn greinilega samstilltur og áhugasamur um umhverfismál. Við óskum þeim til hamingju með árangurinn og hlökkum til næstu skrefa með þeim!
Á myndinni er fríður hópur safnsins ásamt viðurkenningarskjalsins góða og fleiri viðurkenninga svo sem Hjólavottun!
