Isavia í Keflavík með þrjú skref

/in /by

Flugstöð Leifs Eiríkssonar, Þjónustuhús og Flugturn í Keflavík fengu í gær viðurkenningu fyrir að hafa lokið við þriðja Græna skrefið. Í Keflavík starfar öflug umhverfisdeild sem farið hefur fyrir innleiðingu Grænu skrefanna í starfseminni. Mikil áhersla hefur verið lögð á fræðslu til starfsmanna og rekstaraðila og að virkja þá til góðra verka. Sorpmálin hafa verið tekin föstum tökum og geta starfsmenn, rekstraraðilar og gestir flugvallarins flokkað sitt sorp. Starfsmenn umhverfisdeildar hafa lagt sig fram við að gera upplýsingar um flokkun eins skýrar og hægt er bæði með því að nota myndmál og þau tungumál sem töluð eru á vinnustaðnum. Hér má til að mynda sjá leiðbeiningar um flokkun eftir rýmum og ítarlegri leiðbeiningar og myndbönd hér. Í mötuneyti starfsmanna hafa diskar verið minnkaðir í viðleitni til að sporna við matarsóun og í nóvember síðastliðnum var matarsóun í mötuneyti mæld yfir þriggja vikna tímabil til að vekja starfsmenn til vitundar um umfang sóunar. Fróðlegt er að lesa umhverfiskaflann í ársskýrslu Isavia frá árinu 2018 en þar má kynna sér hvað fyrirtækið hefur verið að gera í umhverfis- og loftslagsmálum, hljóðvist og endurvinnslu. Við óskum Isavia á Keflavíkurflugvelli innilega til hamingju með árangurinn og hlökkum til að vinna áfram með þeim í Grænu skrefunum!

82594243 2511645255742617 3123361459589873664 n

Hér taka Valur Klemensson og Ásdís Ólafsdóttir, starfsmenn umhverfisdeildar Isavia á Keflavíkurflugvelli, við viðurkenningu fyrir þriðja skrefið frá Birgittu Steingrímsdóttur, starfsmanni Umhverfisstofnunar.

82833422 2317982454968961 4430291038208262144 n

Starfsmenn gæddu sér á glæsilegri Grænskrefaköku í tilefni dagsins.

Vegagerðin á fullri ferð

/in /by

Vegagerðin keyrir Grænu skrefin áfram af öryggi! Í desember sem leið hlaut þjónustustöðin á Akureyri viðurkenningu fyrir skref 2. og 3. og þjónustustöðin á Sauðárkróki fyrir að ljúka öðru skrefinu. Sóley Jónasdóttir fulltrúi grænna skrefa hjá Vegagerðinni á Norðursvæði heldur vel utan um verkefnið og hvetur starfsfólkið til dáða og heldur öllum vel upplýstum. Við umsjónarmenn verkefnisins sjáum hvað slíkt utanumhald er mikilvægt því það er í mörg horn að líta í umhverfismálunum.

Friðrikka Jóhanna Hansen sá svo um að innleiða fyrsta græna skrefið á starfsstöðinni í Hafnarfirði. Starfsfólkið var kampakátt með nýjar og grænar áherslur á vinnustaðnum og allir að vanda sig að flokka. Skellt var í dýrindisköku og auðvitað græn vínber í tilefni áfangans nú í síðustu viku.

Óskum þessum flotta hóp til hamingju með skrefin og hlökkum til áframhaldandi samstarfs!

Vegagerdin Saud Vottun 3

Þjónustöðin á Akureyri: frá hægri á myndinni er Leonard Birgisson, Sóley Jónasdóttir fulltrúi grænna skrefa hjá Vegagerðinni á Norðursvæði, Steinunn Karlsdóttir fh. UST, Jón Helgi Helgason og Grétar Ásgeirsson hjá Vegagerðinni.

Vegagerdin Saud Vottun 3

Þjónustustöðin á Sauðárkróki: á myndinni má sjá frá vinstri; Pál Valdimar Kolka Jónsson verkefnastjóra á gæðadeild og Sóleyju Jónasdóttur fulltrúa Grænna skrefa á Norðursvæði afhenda starfsmönnum Vegagerðarinnar á Sauðárkróki staðfestingu á frábærum árangri þeirra. Starfsmenn stöðvarinnar eru: Haraldur Sigurðsson verkstjóri, Skúli Halldórsson verkstjóri, Hallfríður Guðleifsdóttir aðalféhirðir, Erla Valgarðsdóttir aðalféhirðir og Ævar Jóhannsson vélamaður.

Vegagerdin Hafnarfjordur 1 skref afhending

Þjónustustöðin í Hafnarfirði: Friðrikka Jóhanna Hansen tók við viðurkenningunni, en hún hefur séð um innleiðingu á verkefninu á starsstöðinni á Hringhellu í Hafnarfirðinum ásamt þessum góða hópi starfsmanna sem hafa tekið höndum saman um grænu skrefin.

Vegagerdin Hafnarfjordur 1 skref

Landspítalinn nýr þátttakandi í Grænum skrefum

/in /by

Við bjóðum Landspítalann velkominn til leiks! Til að byrja með mun starfsstöð spítalans við Skaftahlíð innleiða skrefin en þar starfa 270 manns. Öflugt umhverfisstarf hefur verið unnið á Landspítalanum um árabil svo búast má við því að Grænu skrefin verði starfsfólki auðveld viðureignar.

Landspitali Logo

Póst- og fjarskiptastofnun skráir sig til leiks

/in /by

Við bjóðum Póst- og fjarskiptastofnun velkomna til leiks í Grænum skrefum. Hjá stofnuninni starfa 27 manns og hlökkum við til að vinna með þeim að umhverfismálunum. Með þessari skráningu eru 81 stofnun þátttakendur í verkefninu.

PFS

Lagafrumvarp sem tekur á plastvandanum

/in /by

Umhverfis- og auðlindaráðuneytið hefur kynnt í samráðsgátt stjórnvalda drög að breytingum á lögum um hollustuhætti og mengunarvarnir. „Verði frumvarpið að lögum munu nokkrar algengar gerðir af plastvörum verða bannaðar á Íslandi. Þetta eru t.d. plastdiskar, plasthnífapör, plaströr og bollar úr frauðplasti. Við getum svo vel notað aðra hluti í staðinn. Frumvarpsdrögin gera líka ráð fyrir að einnota plastbollar og -matarílát sem maður fær t.d. á skyndibitastöðum megi ekki lengur vera ókeypis“, segir Guðmundur Ingi, umhverfisráðherra. Í frumvarpinu er einnig kveðið á um sérstaka merkingu sem tilteknar einnota plastvörur eiga að bera um meðhöndlun vörunnar eftir notkun og þau neikvæðu áhrif sem varan hefur berist hún út í umhverfið.

Með frumvarpinu er innleidd ný Evróputilskipun en henni er ætlað að koma í veg fyrir og draga úr umhverfisáhrifum af tilteknum plastvörum og áhrifum þeirra á heilsu fólks. Ákvæðum tilskipunarinnar er fyrst og fremst beint að þeim plastvörum sem finnast helst á ströndum en mælingar hafa sýnt að rusl á ströndum í Evrópu er að 80-85% plast og þar af eru einnota plastvörur 50% og hlutir tengdir veiðum 27%. Tilskipuninni er ætlað að styðja við myndun hringrásarhagkerfis og efla úrgangsforvarnir með því að styðja við notkun sjálfbærra og endurnotanlegra vara, fremur en einnota vara. Við hvetjum þá sem láta sig málið varða að senda inn umsögn á samráðsgáttina, en frestur til þess rennur út þann 16. janúar næstkomandi.

plastpoki