Óbyggðanefnd er nr. 62
Óbyggðanefnd er sjálfstæð úrskurðarnefnd sem starfar á grundvelli þjóðlendulaga og er hlutverk þeirra að skera úr um hvaða land er þjóðlenda og úrskurða um eignarréttindi. Nú ætla þau líka að taka á umhverfismálunum í rekstri sínum og verður gaman að fá að fylgjast með því.
Neyslan er fíkn sem við viljum ekki láta lækna okkur af
Voru orð Stefáns Gíslasonar umhverfisstjórnunarfræðings í viðtali í Morgunútvarpinu á Rás 2. Tilefnið var útgáfa skýrslu loftslagsnefndar Sameinuðu þjóðanna sem sendi mjög skýr skilaboð um að tafarlausra aðgerða væri þörf af hendi stjórnvalda í heiminum. Í raun sé ástandið enn alvarlegra en menn hafi áður haldið fram og nauðsynlegt sé að halda hlýnun jarðar undir 1,5° en ekki 2° eins og áður. Fari hlýnun upp fyrir 2° þá mun hættan á enn öfgakenndari flóðum, hitabylgjum, skógareldum, þurrkum aukast svo ekki sé minnst á aukna fátækt fyrir hundruði milljóna manns. Skýrslan byggir á rannsóknum 90 vísindamanna frá 40 löndum um hættuna sem stafar af hlýnun jarðar.
Hress hópur skógræktarfólks
Nú er úttektum á starfsstöðvum Skógræktarinnar (12 talsins) lokið með því að þær eru nú allar komnar með fyrsta Græna skrefið. Það var mjög gaman og hressandi að hitta starfsfólk stofnunarinnar enda mikið umhverfisfólk. Skógræktin er meðal annars farin að bjóða uppá flokkun úrgangs á tjaldsvæðum sínum á Vöglum og Hallormsstað, stöðugt er verið að skoða og bæta aðstæður skógarhöggsfólks með því að nota rafmagnssagir og er stofnunin t.d. að leita að rafmagnsbílum sem hægt er að nota á svæðum þeirra, oft við krefjandi aðstæður. Starfsfólk er einnig mjög nægjusamt og nýtið og nota mikið af afurðum skóganna til að búa til húsgögn, leiktæki og annað sem nýtist bæði þeim og gestum skóganna. Innilega til hamingju með fyrsta skrefið.
Hér má sjá myndir af starfsmönnum Skógræktarinnar sem innleitt hafa verkefnið og tóku á móti viðurkenningunni.
Skógræktin á Egilsstöðum
Skógræktin Hallormsstað
Skógræktin á Ísafirði
Skógræktin Vesturlandi (Hvanneyri og Hvammi)
Skógræktin Mógilsá
Skógræktin á Selfossi
Skógræktin Þjórsárdal
Skógræktin á Tumastöðum
Skógræktin í Vík
Rafhjól og samgöngusamningar
Skipulagsstofnun endurskoðaði samgöngusamningana sína í sumar sem gerði það að verkum að 30% starfsmanna skráðu sig á slíkan samning. Í samanburði við aðra þá er það ansi hátt hlutfall og greinilegt að starfsmenn voru tilbúnir til að draga úr notkun á einkabílnum. Auk þess keypti stofnunin eitt rafhjól sem starfsmenn geta notað bæði til að fara á fundi og til einkaerinda. Enda er það ótrúlega þægilegt að þurfa ekkert að hugsa um bílastæði og slíkt þegar farið er á milli húsa.
Zipcar enn einn valkosturinn í staðinn fyrir einkabílinn
Stjórnarráðið hefur gert samning við Zipcar deilibíla sem felur í sér hagstætt tilboð fyrir starfsfólk ráðuneytanna ef það þarf að sinna nauðsynlegum einkaerindum á vinnutíma. Með Zipcar deilibílum greiðir þú meðlimagjald og getur bókað bílinn í klukkutíma í senn. Þessi leið hvetur fólk enn frekar til að koma bíllaust til vinnu enda auðvelt að skreppa ef nauðsyn krefur.
Þjóðskrá með fyrsta skrefið
Þjóðskrá var að ná fyrsta Græna skrefinu en verkefnið var endurvakið í sumar eftir smá dvala og það sem vantaði uppá var innleitt með hraði. Þau hafa ákveðið að vinna áfram ötullega að verkefninu og fá vonandi annað skrefið innan tíðar. Starfsmenn taka virkan þátt í verkefninu og hefur það t.d. orðið til þess að sérstaklega var hugað að umhverfismálum nú þegar endurgera á salernin í húsnæðinu. Þá með því að nota frekar blásara en pappír og draga úr sápunotkun.
Samgönguvika 2018
Eru ekki allir að taka þátt? Samgönguvika er evrópskt átak um bættar samgöngur í borgum og bæjum. Átakið stendur í eina viku frá 16. september til 22. september og markmiðið er að hvetja fólk til umhugsunar um eigin ferðavenjur og virkja það til að nota almenningssamgöngur, hjóla eða ganga. Við hvetjum stofnanir til að taka þátt og hegða sínum ferðavenjum í framtíðinni með sem umhverfisvænustum hætti. Endilega hvetjum aðra líka áfram með því að pósta sögum af okkur á viðburðinn.
Annað skref Ríkiskaupa
Til hamingju Ríkiskaup með annað Græna skrefið. Það er mikill hugur í starfsfólki stofnunarinnar og ætla þau að vinda sér fljótt í næstu skrefin.
Umhverfismál og hagræðing hjá Þjóðskrá
Hjá Þjóðskrá vinna þau saman vinnuhagræðingu og umhverfismálin. Hér hafa þau sett upp lista sem starfsmenn geta bætt við verkefnum sem þeim finnst að vinna þurfi og hvaða áhrif verkefnin hafa á mismunandi þætti. Skemmtileg nálgun til að fá starfsmenn með í verkefnið.
Aðgerðaáætlun í loftslagsmálum
Fyrsta útgáfa aðgerðaáætlunar stjórnvalda í loftslagsmálum 2018-2030 var birt í gær. Í henni er megináhersla lögð á orkuskipti í samgöngum og átak í kolefnisbindingu. Eins og þátttakendur Grænna skrefa kannast við er töluverð áhersla lögð á umhverfisvænni samgöngur í verkefninu og hafa kröfur til þessa aukist nokkuð með uppfærðum aðgerðum. Nýtt í verkefninu er einnig aðgerð um kolefnisbindingu sem stjórnvöld eru einmitt að leggja mikla áherslu á. Aðgerðaáætlunina má sjá hér.