Erindi frá morgunverðarfundi Grænna skrefa
Okkur langar að þakka öllum sem tóku þátt í morgunverðarfundinum og þakka þeim sem gáfu sér tíma til að halda fyrir okkur fyrirlestra og deila reynslu sinni. Það er alltaf gaman að eiga einn svona uppskerufund á hverju ári með ykkur öllum. Stofnanir hafa staðið sig mjög vel í ár, 63 komnar í verkefnið með yfir 200 starfsstöðvar. Áskoranirnar sem við stöndum frammi fyrir eru risavaxnar og því er ekki eftir neinu að bíða en að byrja að búta verkefnið niður með Grænum skrefum og innleiða bætta umhverfishegðun. Hér má sjá erindin sem voru á fundinum og vonandi veita ykkur innblástur til að halda áfram og gera betur í dag en í gær.
Grænu skrefin 2018 – Hólmfríður Þorsteinsdóttir Umhverfisstofnun
Græn skref hjá Skógræktinni – Björg Björnsdóttir, Skógræktin
Græn skref hjá Alþingi – Heiðrún Pálsdóttir, Alþingi
Loftslagsstefna Stjórnarráðsins – Hulda Steingrímsdóttir, Stjórnarráðinu
Plastmálefni – Elva Rakel Jónsdóttir, Umhverfisstofnun
Umhverfisáhrif matvæla – Stefán Gíslason, Environice
Morgunverðarfundur
Hvetjum þátttakendur og áhugasamar stofnanir til að koma á morgunverðarfundinn. Dagskráin verður eftirfarandi og hægt er að skrá sig á fundinn hér:
Græn skref í ríkisrekstri- Hólmfríður Þorsteinsdóttir, Umhverfisstofnun
– Breytingar og viðbætur á Grænu skrefunum
– Kolefnisjöfnun hvar og hvernig?
Græn skref hjá Skógræktinni – Björg Björnsdóttir
Græn skref hjá Alþingi – Heiðrún Pálsdóttir
Græn skref hjá Stjórnarráðinu – Hulda Steingrímsdóttir
Plast plast plast og aftur plast – Umhverfisstofnun
Umhverfisáhrif matvæla – Stefán Gíslason
Umræður
Innleiðing aðgerða
Þessi aðgerð er í kaflanum um viðburði og fundi í skrefi 1, einhverjir hafa ekki alveg áttað sig á hvernig megi uppfylla hana en það er gert svona. Þegar sendir eru út auglýsingar um viðburði, námskeið eða stærri fundi að þá séu þátttakendur minntir á að betra sé að þeir komi á staðinn með umhverfisvænni hætti. Þá mættu sumir t.d. benda á að erfitt er að finna bílastæði og betra að koma með strætó. Svo má gera aðra hluti s.s. að segja frá að stofnunin sé að vinna að því að lágmarka umhverfisáhrif með því að velja umhverfisvottaðan ráðstefnu/fundarsal. Eða t.d. að aðeins sé boðið uppá grænmetisrétti á staðnum. Það má vera hvaða skilaboð sem er svo lengi sem við fáum aðra til að hugsa. Þá má benda á að Ríkiseignir fóru þá leið að búa til sér undirskrift í tölvupóstkerfinu þannig að þegar starfsmenn eru að boða til fundar velja þau undirskrift með umhverfis skilaboðum.
Innleiðing breytinga
Við þekkjum það öll að vera búin að senda út upplýsingar eftir upplýsingar en samt virðast hlutir ekki síast inn. Það er líka oft þannig að við síum út þau skilaboð og pósta sem við getum sleppt að setja okkur að fullu inní til að spara tíma. Það sem þá gerist er að þeir sem eru að innleiða breytingar upplifa uppgjöf og gremju yfir því að fólk hlusti ekki eða að breytingar festast ekki í sessi. Ein af lausnunum þegar ástandið er svona er að kenna fólki mann á mann á nýja tækni og upplýsa fólk um breytingar í beinu samtali. Hjá Umhverfisstofnun var bæði töluvert af nýju starfsfólki og ákveðin tregða við að nota rafbílinn enda í dag frekar fáir sem eiga slíka bíla og eru ekki vanir þeim. Umhverfisráð hélt því námskeið fyrir litla hópa þar sem fólk var kennt á bílinn og rafhleðslu auk þess að minna fólk á hjólin sem stofnunin á. Þessi nálgun á upplýsingagjöf hefur aukið notkun á bílnum töluvert enda finnst fólki betra að spyrja beint heldur en að senda tölvupósta eða lesa tölvupósta um breytingar.
87% færri einnota plastflöskur hjá Alþingi
Já breytingarnar þurfa ekki að vera stórar til að geta skipt miklu máli. Þannig hefur ein sódavatnsvél leyst af hólmi helling af einnota plastflöskum. Eftir að sódavatnsvélin var sett upp hefur sala á sódavatni í einnota flöskum hrunið. Bæði starfsmenn og Alþingismenn hafa tekið vel í breytingarnar og fá sér frekar sódavatn í margnota flösku sem þau fengu að gjöf frá stofnuninni. Um það bil 240 flöskur voru keyptar í hverjum mánuði eða 2.800 árlega, en núna eru þær aðeins 30 flöskur eða 360 á ári. Þetta eru 87% færri einnota flöskur sem notaðar eru. Vel gert!
Bann á 10 einnota plastvörur?
Evrópuþingið samþykkti á dögunum að vinna að því að banna 10 tegundir af einnota plastvörum (diskar, hnífapör, plastglös, rör og hrærur, eyrnapinnar, blöðrupinnar, drykkjarflöskur, tappar, lok og plastumbúðir, sígarettufilterar, blautþurrkur og plastpokar og blöðrur). Þetta eru vörur sem þegar eru til umhverfisvænni staðgengivörur og þær vörur sem finnast helst sem rusl á ströndum. En um 50% af því rusli sem finnst eru þessir 10 einnota vöruflokkar. Auk þess eru tillögur um bann á svokölluðum oxo-degradable plastvörum og frauðplasti. Einnig voru settar fram tillögur um endurvinnslu og söfnun á veiðarfærum sem eru 27% af því plasti sem finnst á ströndum. Þessar tillögur Evrópuþingsins voru samþykktar með miklum meirihluta og munu nú fara til umræðu í Evrópuráðið og svo áfram til samþykktar hjá Evrópusambandsríkjum. Frekari upplýsingar má sjá hér.
Fyrsta skref Menntamálstofnunar
Viðurkenning fyrir fyrsta Græna skrefið var afhent Menntamálastofnun á föstudaginn s.l. Þar er flott umhverfisnefnd að störfum sem unnið hefur að innleiðingu verkefnisins. Hlökkum til frekari samstarfs 🙂
Alþingi tekur fyrsta skrefið
Alþingi bættist í dag í hóp stofnana sem hafa fengið viðurkenningu Grænna skrefa, en þau luku nú fyrsta skrefinu. Hjá Alþingi hefur áhugi á umhverfismálum aukist markvisst og getur starfsfólk vinnustaðarins verið stolt af áfanga dagsins. Þau ætla að halda ótrauð áfram með næstu skref. Meðal aðgerða sem Alþingi hefur innleitt eru:
o Að bjóða uppá sódavatn í vél í stað þess að starfsmenn og þingmenn kaupi sér nýja og nýja flösku. Allir starfsmenn og þingmenn hafa auk þess fengið margnota vatnsflöskur að gjöf.
o Flokkun á úrgangi hefur aukist um leið og það er líka skipulagðara og aðgengilegra
o Fleiri koma með umhverfisvænum hætti til vinnu en áður
o Alþingi hefur hafið vinnu við að draga úr magni fjölpósts sem kemur til þeirra. Þá hefur verið sett upp lesstofa þar sem hægt er að skoða blöð og póst sem berst Alþingi. Innilega til hamingu með áfangann 🙂
Fjölbrautaskólinn við Ármúla er komin í Grænu skrefin
Skólinn hefur lengi framfylgt metnaðarfullri umhverfisstefnu og hefur meðal annars fengið Grænfánann afhentann sex sinnum og tekur afgerandi afstöðu með umhverfisvænni samgöngum með því að selja aðgang að bílastæði skólans. Hlökkum til að vinna með þeim.
Isavia, Flugfjarskipti með 5 skref
Flugfjarskipti hjá Isavia voru fyrsta starfsstöðin þeirra til að ljúka innleiðingu á fimmta Græna skrefinu og einnig að fá vottun fyrir ISO 140001 umhverfisstjórnunarkerfi. Það hefur verið svo gaman að fá að vera með þeim í þessari vinnu enda innleiðingin gengið með eindæmum hratt og vel. Þau hafa til að mynda gengið lengra en flestir í að draga úr úrgangsmyndun með því að fá hænur sem borða lífræna úrganginn að mestu leyti. En það eru nú kannski líka fáar stofnanir í aðstöðu til þess, auk þess hefur verið passað vel uppá að þjónustuaðilar sem koma með mat til starfsmanna bjóði ekki eða sem minnst uppá matvæli í einnota umbúðum. Til hamingju með árangurinn 🙂
