Árverkniátakið Plastlaus september hefur fest sig rækilega í sessi hér á landi frá því það var sett á laggirnar árið 2017. Tilgangur verkefnisins er að vekja fólk til umhugsunar um plastnotkun og þann plastúrgang sem fellur til dagsdaglega og leita leiða til að minnka notkunina.

Átakið snýst ekki um að vera fullkomlega plastlaus í september heldur að finna sér markmið í mánuðinum til að minnka neyslu á einnota plastumbúðum. Við í Grænu skrefunum hvetjum okkar þátttakendur til að setja sér markmið í mánuðinum og nota til þess eftirfarandi veggspjald. Veggspjaldið er svo hægt að birta á heimasíðu stofnunarinnar og innri vef, senda út til starfsmanna og/eða hengja upp þar sem allir sjá.

Hér að neðan eru nokkur dæmi um markmið sem fyrirtæki og stofnanir geta sett sér í Plastlausum september.

Við tökum þátt í Plastlausum september með því að:

• Fræða starfsfólk okkar um plast og afleiðingar ofnotkunar þess
• Setja upp verklagsreglur fyrir innkaup til að lágmarka einnota plastumbúðir sem til okkar berast
• Losa okkur við einnota borðbúnað úr plasti
• Hvetja starfsfólk okkar til að minnka plastnotkun í mánuðinum
• Minnka magn plastumbúða sem til fellur hjá okkur (hægt að fá tölur frá sorphirðu um magn fyrri mánaða og setja sér markmið um samdrátt)
• Fara í flokkunarátak svo allt umbúðaplast komist í réttan farveg
• Fara út að plokka rusl í hádeginu 1x í viku allan mánuðinn

Við hlökkum til að sjá ykkur útfærslur á plastlausum markmiðum!

Starfsfólk Blöndu- og Laxárstöðvar, sem eru tvær af starfsstöðvum Landsvirkjunar, eru búin að stíga öll 5 Grænu skrefin á hálfu ári! Það er búið að vera gaman að sjá hvað starfsstöðvar í óvanalegri kantinum geta innleitt margar aðgerðir í umhverfismálum og finna lausnir sem henta þeim. Umhverfisteymið með þau Elvar Magnússon og Ragnheiði Ólafsdóttur í fararbroddi (sjá mynd) hafa leitt verkefnið áfram í góðri samvinnu við starfsfólk stöðvanna og augljóst að ekki vantar metnaðinn hjá fyrirtækinu. Til marks um það má nefna nokkur dæmi:

• Í Hjólað í vinnuna var hreinlega hjólað í kringum stöðina!
• Flokkun er í toppmálum, 80% + flokkun á úrgangi
• Pappírsrif er nýtt sem undirburður fyrir hesta í sveitinni
• Vel er staðið að innanhússfræðslu um umhverfismál og Grænu skrefin í gegnum kennsluvefinn Eloomi
• Búið er að mæla matarsóun í þó nokkurn tíma og í ljós kemur að hún er lítil sem engin, starfsmenn mega taka með sér afganga heima og helgarvaktirnar nýta líka afganga
• Innkaupagreining vakti menn til vitundar um hvar hægt er að draga úr og hvað annað megi frekar kaupa inn
• Með kaupum á vatns/sódavatnsvél hefur vatnsdrykkja aukist
• Tedrykkja hefur einnig aukist með flottu lífrænu te-safni
• Nú er boðið uppá niðurskorið grænmeti á fundum og vekur það lukku

Takk fyrir gott samstarf og innilega til hamingju með áfangann!

Sjúkratryggingar Íslands hafa nú skráð sig til leiks í Grænu skrefunum. Hlutverk Sjúkratrygginga Íslands er að tryggja réttindi sjúkratryggðra og aðgengi að góðri og hagkvæmri heilbrigðisþjónustu. Hjá stofnuninni starfa í dag 129 manns og bjóðum við þau hjartanlega velkomin í verkefnið og hlökkum til að fylgja þeim í skrefunum.

Í Grænu skrefunum leggjum við áherslu á að stofnanir velji umhverfisvottuð gistirými og fundaraðstöðu, bæði hérlendis og erlendis. Með því drögum við úr umhverfisáhrifum af viðburðum og ferðum á vegum stofnunarinnar og styðjum við fyrirtæki sem standa sig vel í umhverfismálum.

Eftirfarandi aðgerðir má finna í flokknum Viðburðir og fundir í skrefi 3 og 4:

• Við val á ráðstefnu- og fundarrými er valinn aðili með umhverfisvottun t.d. Svansvottun eða umhverfisstjórnunarkerfi s.s. ISO140001 vottun.
• Við val á gistirými, bæði erlendis og innanlands, er lögð áhersla á að velja staði með umhverfisvottun á borð við Svaninn, Evrópublómið, Græna lykilinn (Green Key), gullmerki Vakans, ISO14001 eða sambærilega vottun.

Við höfum tekið saman lista yfir gisti- og fundarrými sem uppfylla ofangreindar kröfur til að auðvelda ykkur vinnuna. Listann er að finna undir Vinnugögn hér á síðunni ásamt ýmsu öðru ítarefni.

Umhverfisstofnun fór nýlega af stað með fræðsluverkefnið Umhverfisvarpið. Um er að ræða rafræna fræðslu á vefnum þar sem sagt er frá hinum ýmsu verkefnum stofnunarinnar.

Umhverfisvarp miðvikudagsins var helgað loftslagsmálum en í því kynntu sérfræðingar í teymi loftslags og loftgæða losunarbókhald Íslands sem snýr að gróðurhúsalofttegundum. Stiklað var á stóru um helstu niðurstöður losunarbókhaldsins, sem og gefin innsýn inn í hvernig bókhaldið er sett upp og tengsl losunarþátta við lifnaðarhætti okkar. Þá var farið aðeins í sögu alþjóðlegs loftslagssamstarfs, fjallað um þær skuldbindingar sem Ísland hefur gengist undir í loftslagsmálum og þær settar í samhengi við þá vinnuferla og kerfi sem unnið er eftir.

Fram kom að miðað við reiknaða losun síðustu ára, og áætlaða losun 2019 og 2020, er losun Íslands talsvert meiri en við höfum fengið úthlutað fyrir 2. tímabil kýótóbókunarinnar (2013-2020). Því liggur fyrir að íslenska ríkið mun þurfa að kaupa losunarheimildir með þeim kostnaði sem þeim fylgja.

Ísland hefur skuldbundið sig til að draga úr losun um 29% til ársins 2030 miðað við árið 2005 vegna Parísarsamningsins, en ef horft er á þróunina undanfarin ár þurfum við öll að leggjast á eitt til að komast hjá því að fara fram úr losunarheimildum okkar aftur, með bæði þeim fjárhagslega og umhverfislega kostnað sem því fylgir.

Við mælum með að þið hlustið á Umhverfisvarpið og fræðist betur um hvernig þessum málum er háttað og leggið í kjölfarið ykkar lóð á vogaskálarnar til að betur gangi á næstu árum. Enda geta allir eitthvað en engin allt!