Á Morgunfundi Grænna skrefa sem haldinn var þann 5. nóvember sl. var þátttakendum skipt niður á borð þar sem þeir gátu deilt reynslu af innleiðslu skrefanna, gefið góð ráð og rætt næstu skref. Lagt var fyrir verkefni þar sem þátttakendurnir hugsuðu upp aðgerðir sem styðja við markmið um samdrátt um losun. Það var ljóst að frjóir hugar voru komnir saman, og ýmsar góðar hugmyndir urðu til. 

Samgöngusamningar og orkuskipti í samgöngum voru þemu sem komu upp á nánast hverju borði. LED-væðing í lýsingu, fjarvinnustefna, ákvarðanatökuferill fyrir flugferðir og staðsetning ruslatunna innan bygginga komu einnig oft upp. 

Þær aðgerðir sem vinnuhóparnir voru sammála um að væru hvað auðveldastar í framkvæmd en hefðu skilað þeim mestum ávinningi voru að: 

• Hvetja starfsmenn til að vinna heima einu sinni til tvisvar í viku.  
• Leggjast í gerð fjarvinnustefnu.
• Útbúa ákvörðunartré fyrir flug. 
• Bæta aðstöðu fyrir starfsmenn sem koma til vinnu með vistvænum hætti. 
• Skipta jarðefnaeldsneytisbílum út fyrir hreinorkubíla. 
• Bjóða starfsmönnum upp á samgöngusamninga og auglýsa þá vel. 
• Regluleg flokkunarfræðsla fyrir starfsmenn 

Grænu skrefin eru nú þegar með lifandi aðgerðarbanka sem stofnanir og fyrirtæki í meirihluta ríkiseigu eru hvött til að nýta sér. Eins og titill skjalsins ber með sér er um að ræða skjal sem er í stöðugri mótun og við munum færa nýjar hugmyndir inn í skjalið.  

Aðgerðabanki Grænna skrefa verður uppfærður í kjölfar hugmyndanna sem fram komu í hópavinnunni. Sú vinna ætti að klárast í vikulok og munum við birta frétt um það þegar þar að kemur. 

Verkefnið var unnið á tólf borðum og komu fram 112 tillögur að 83 mismunandi aðgerðum. Flestar tillögurnar sneru að flokkun og minni sóun (30 tillögur) og samgöngum (30 tillögur) en einnig var mikið um aðgerðir í miðlun og stjórnun (22 tillögur). 

Morgunfundur Grænna skrefa 2021 verður haldinn föstudaginn 5. nóvember n.k.. Að þessu sinni er áhersla lögð á loftslagsstefnur og aðgerðaáætlanir og verða erindi og borðaverkefni því tengd.

Okkar eigin Kristín Helga Schiöth mun byrja á að fara yfir það helsta sem þarf að hafa í huga við skipulagningu umhverfisvænni viðburða. Eygerður Margrétardóttir, verkefnastjóri hjá Sambandi íslenskra sveitarfélaga mun kynna verkefnakistu Loftslagsvænni sveitarfélaga, en tilgangur hennar er að styðja við sveitarfélög í vinnu sinni að aðgerðamiðaðri stefnumótun í loftslagsmálum. Á fundinum verður einnig erindi um ábyrga kolefnisjöfnun frá Hauki Loga Jóhannssyni, verkefnastjóra hjá Staðlaráði.

Á fundinum fáum við að heyra reynslusögur frá þátttakendum sem hafa stigið skrefin og náð glæsilegum árangri, þrátt fyrir áskoranir.

Að lokum verður stutt erindi frá teymi Grænna skrefa, þar sem farið verður yfir helstu spurningar og svör, ásamt stuttri samantekt á deginum.

Fundurinn er opinn fyrir tengiliði ríkisaðila við Grænu skrefin og hefur skráningarform verið sent á alla ríkisaðila skráða í skrefin. Hafi einhver ekki fengið póst um skráningu má hafa samband við graenskref@graenskref.is.

Það er heldur betur gangur í umhverfismálum hjá ríkisstofnunum þessi dægrin og í dag steig Háskólinn á Akureyri þriðja og fjórða skrefið í einu með glæsibrag.

Í Háskólanum á Akureyri er metnaðarfullt umhverfisráð, skipað bæði starfsfólki og nemendum, sem heldur utan um umhverfismál í skólanum. Ráðið gaf út þetta fróðlega og skemmtilega myndband nýlega, þar sem greint er frá aðgerðum ráðsins, m.a. þeim sem falla undir Grænu skrefin.

Við hvetjum sérstaklega fulltrúa annarra stofnana til að horfa á myndbandið. Eitt markmið Grænu skrefanna er að stofnanir deili fróðleik og reynslu við innleiðingu skrefanna, og Háskólinn á Akureyri leggur sannarlega sitt af mörkum með myndbandinu. Við þökkum HA kærlega fyrir það og óskum þeim innilega til hamingju með skref 3 og 4.