Við höfum birt orkusparandi tékklista undir vinnugögnum sem við hvetjum vinnnustaði til að nýta sér áður en farið er í frí. Tékklistinn inniheldur nokkur atriði sem er gott að huga til þess að spara orku yfir jólin, páska, sumarið eða aðra frídaga. Listann má nota til stuðnings í aðgerð í skrefi þrjú um orkusparandi leiðbeiningar í samráði við umsjónarmann eða þann sem sér um húsnæðið.
Gleðileg jól!
Úrskurðarnefnd umhverfis- og auðlindamála hefur hlotið fimmta græna skrefið. Nefndinni tókst að fara í gegnum öll fimm skrefin á einungis þremur mánuðum sem er óvenjustuttur tími. Þetta tókst með aðlögunarhæfni og jákvæðu viðmóti starfsmanna auk hnitmiðaðrar nákvæmnisvinnu við útfyllingu gátlista Grænna skrefa.
Það þarf þó ekki formlegan úrskurð til að sjá að Nefndin mun áfram leggja metnað í umhverfismálin innan vinnustaðarins. Fimmta skref Nefndarinnar mun svo vafalaust reynast nágrannastofnunum hennar í Höfðaborginni sem mikil hvatning en Úrskurðanefndin er fyrsta stofnunin í húsinu til að klára fimmta skrefið. Við hjá Grænum skrefum óskum þeim til hamingju með árangurinn.
Nýtt kynningarmyndband Grænna skrefa er komið út. Myndbandið er hugsað til þess að auðvelda teymi Grænna skrefa innan stofnana til þess að kynna verkefnið fyrir samstarfsfólki sínu og er tilvalið að sýna það á starfsmannafundi. Í myndbandinu er farið yfir hver tilgangur Grænna skrefa er, ásamt yfirferð á flokkunum sem aðgerðirnar skiptast í.
Myndbandið má sjá hér að neðan og má einnig finna niðurhlaðanlegt í vinnugögnum.
Við endurtökum leikinn og bjóðum tengiliðum Grænna skrefa að nýta sér opið upplýsingaborð sem haldið verður næsta mánudag, þann 6. desember, milli kl. 10-12. Tengiliðir hafa fengið boð á upplýsingaborðið í tölvupósti þar sem hægt er að skrá sig inn á upplýsingaborðið á fyrrgreindum tíma.
Innan þessa tímaramma mun starfsfólk Grænna skrefa vera tilbúið að svara öllum spurningum er við koma Grænu skrefunum, loftslagsstefnum og aðgerðaráætlunun. Opið upplýsingaborð (e. help-desk) er með því fyrirkomulagi að fólk getur farið inn og út eftir þörfum og ekki verður nein skipulögð dagskrá, tengiliðum gefst einfaldlega tækifæri á að spyrja að því sem kann að vefjast fyrir þeim í innleiðingu Grænna skrefa og loftslagsstefnugerð.
Við hvetjum tengiliði Grænna skrefa til að nýta þetta tækifæri til að spyrja spurninga og við minnum á að allir ríkisaðilar eiga að vera búin að setja sér loftslagsstefnu og aðgerðaáætlun fyrir árslok og samkvæmt loftslagsstefnu Stjórnarráðsins eiga allar stofnanir að vera búnar með öll skrefin á sama tíma.
Náttúruhamfaratrygging Íslands skráðu sig til leiks í byrjun september 2021 og eru nú búin með öll fimm skrefin. Fyrsta skrefinu luku þau fyrir tæpum mánuði og á fimmtudaginn sl. kláruðu þau úttekt á rest. Þau hafa ráðist í verkefnið af krafti og gert þær breytingar sem þarf á ótrúlega stuttum tíma. Þau hafa meðal annars fengið rafmagnshjól til afnota fyrir starfsfólk, tekið í gildi samgöngusamninga og sett upp skiptibókahillu á skrifstofunni frá því að vinna við skrefin hófst.
Við óskum Náttúruhamfaratryggingu Íslands innilega til hamingju með skrefin fimm og hlökkum til að fylgjast með með þeim áfram!
Eitt af síðustu verkum Lilju Alfreðsdóttur sem Mennta- og menningarmálaráðherra var að taka við viðurkenningu frá Umhverfisstofnun þar sem mennta- og menningarmálaráðuneytið hefur innleitt öll fimm Grænu skrefin. Afhendingin fór fram um miðjan nóvember en ráðuneytið skráði sig til leiks árið 2018 og verkefnið því innleitt í ráðherratíð Lilju.
Við óskum ráðuneytinu og starfsfólki öllu innilega til hamingju með Grænu skrefin.
Nú er tæpur mánuður til jóla og stjórnendur stofnana og fyrirtækja sennilega farnir að huga að jólagjöfum til starfsfólks. Græn skref hafa tekið saman nokkrar hugmyndir um umhverfisvænni gjafir til starfsfólks. Þessar hugmyndir uppfylla jafnframt aðgerð um um gjafir til stafsfólks í skrefi fjögur í gátlistanum.
Gleðileg jól!
Úrvinnslusjóður lauk á dögunum fyrstu þremur skrefunum á einu bretti, við óskum stofnuninni til hamingju með það. Úrgangur eru ær og kýr Úrvinnslusjóðs og starfsfólk leggur mikið kapp á að minnka úrgang og nýta allt sem best. Eldhússtólarnir í kaffistofu Úrvinnslusjóðs fengu yfirhalningu á þessu ári, og voru yfirdekktir í stað þess að skipta þeim út. Þá gerð má sjá til hægri á myndinni, en tau-ákvlæði var skipt út fyrir leðurlíki sem auðvelt er í þrifum. Áætlað er að yfirdekkja 7 aðra stóla á næsta ári, þá sem eru til vinstri á myndinni.
Það er vel við hæfi að skrifa um þetta á síðasta virka degi Evrópsku nýtnivikunnar. Það felur í sér mun lægra kolefnisspor að lagfæra það sem til er en að farga hinu gamla og kaupa nýtt í staðinn. Það er orðið auðvelt að eignast ódýra, fjöldaframleidda hluti. Aukið aðgengi og lækkað verð húsgagna gæti verið letjandi þegar kemur að því að gera við hið gamla. Fólki finnst e.t.v. ekki taka því að senda hluti í viðgerð, eða yfirhalningu þar sem verðmunurinn á viðgerðinni og nýjum hlut er stundum lítill. Það er gott að hafa í huga að umhverfiskostnaður er ekki reiknaður inn í framleiðslu hluta, en við greiðum þann kostnað á annan hátt. Það er um að gera að vanda valið þegar keypt er, ef húsgögn eru af góðum gæðum í upphafi er auðvelt að flikka upp á og gera við þegar þau eru farin að láta á sjá.
Evrópska Nýtnivikan hófst þann 20. nóvember og stendur yfir til 28. nóvember. Af því tilefni höfum við í Grænu skrefunum uppfært vinnugagn um hvað stofnanir geta gert í tilefni hennar, en það skjal má nálgast hér. Dagskrá Nýtnivikunnar má finna hér, en þema vikunnar í ár eru hringrásarsamfélög.
Á starfsstöð Umhverfisstofnunar í Reykjavík höfum við sett upp jólaskiptimarkað sem mun vera uppi yfir vikuna. Einungis ein regla er fyrir markaðinn, en það er að það sem þú kemur með geti veitt einhverjum öðrum meiri gleði. Engin takmörk eru á því hvað má koma með á skiptimarkaðinn, en við höfum nefnt sem dæmi að hægt sé að koma með bækur, fatnað og skó, jólagjafir, jólaskraut, dót og svo geta umhverfismeðvitaðir jólasveinar fundið þar skógjafir sem leita að nýju heimili. Við gerum ekki kröfu um að fólk komi með neitt á markaðinn til að það geti tekið, enda er markmiðið að finna sem flestum hlutunum nýtt heimili.
Samskiptamiðstöð heyrnarlausra og heyrnarskertra steig á dögunum fyrsta og annað skrefið samtímis. Þau mega vera stolt af vinnunni við skrefin, en sem dæmi má nefna að við vinnustaðinn er glæsilegt hjólaskýli með hjólabogum, þau standa sig vel í flokkun og þessa skemmtilegu poka með táknmálsstafrófinu nota þau til innkaupa á smávöru.
Við óskum þeim innilega til hamingju með skrefin!