Fréttabréf Grænna skrefa er komið út
Í fréttabréfi þessu er fullt af áhugaverðu efni fyrir stofnanir sem eru í verkefninu og fyrir áhugasamar stofnanir einnig. Endilega kíkið hér í blaðið.
Vínbúðin á Eiðistorgi er komin með fyrstu tvö Grænu skrefin
Nú var það Vínbúðin á Eiðistorgi sem fékk afhenta viðurkenningu fyrir fyrstu tvö Grænu skrefin. Eins og með aðrar Vínbúðir er græn hugsun út í gegn í starfsemi þeirra. Innilega til hamingju með áfangann 🙂
Seðlabankinn kominn með sitt fyrsta skref
Már Guðmundsson, seðlabankastjóri tók á móti viðurkenningu Grænna skrefa í gær. Seðlabankinn hefur unnið að því að innleiða grænni rekstur í um eitt ár en hóf þátttöku í Grænum skrefum í febrúar á þessu ári. Innleiðing verkefnisins hefur því gengið hratt og vel og mikill stuðningur er við verkefnið. Innilega til hamingju með áfangann 🙂
Á myndinni eru (f.v.) Birna Kristín Jónsdóttir, Már Guðmundsson seðlabankastjóri og Hólmfríður Þorsteinsdóttir, Umhverfisstofnun.
Þjóðminjasafn Íslands hefur skráð sig í Grænu skrefin
Þjóðminjasafn Íslands er nú 32 stofnunin sem hefur skráð sig til leiks í Grænu skrefunum. Hlutverk safnsins er að auka og miðla þekkingu á menningararfi okkar Íslendinga og nú munu þau auk þess gera það á sem umhverfisvænastan hátt. Velkomin í verkefnið!
Skógrækt til kolefnisjöfnunar
Í sóknaráætlun um loftslagsmál kemur fram að tækifæri Íslands í kolefnisjöfnun felast fyrst og fremst í skógrækt, landgræðslu og endurheimt votlendis. Þá er upplagt fyrir stofnanir að taka þátt í t.d. gróðursetningu með skógræktarfélögum eða öðrum verkefnum. Skógræktarfélag Hafnarfjarðar heldur sjálfboðaliðadag sinn á laugardaginn 24. september, milli kl. 10.00 og 12.00. Allir eru velkomnir og í lokin er boðið uppá hressingu. Frekari upplýsingar er hægt að fá hér.
Vínbúðin Heiðrún er komin með öll fimm skrefin
Vínbúðin Heiðrún hefur bæst í hóp þeirra stofnana/starfsstöðva sem lokið hafa öllum fimm Grænu skrefunum. Innilega til hamingju með flottan árangur 🙂
Umhverfis- og auðlindaráðuneyti komið með þrjú Græn skref
Umhverfis- og auðlindaráðuneytið fagnaði öðru og þriðja skrefinu um daginn og stefna að því að innleiða fjórða skrefið um áramótin. Hér er flottur hópur starfsmanna ráðuneytisins að fagna áfanganum með köku og kaffi.
Samgönguvika 2016
Þá er hin árlega Samgönguvika hafin. Vikan er samevrópsk og er til þess ætluð að vekja athygli á og hvetja til vistvænni samgöngumáta. Ávinningur umhverfisvænni samgöngumáta er ótvíræður, hann er ódýrari, skemmtilegri, betri fyrir umhverfið og betri fyrir heilsuna okkar. Munum eftir bíllausa deginum þann 22. september en þá er upplagt að hvetja alla starfsmenn til að mæta til vinnu með umhverfisvænni hætti.
Dagskrá vikunnar má sjá hér. Auk þess er Samgönguvika á facebook.com/samgonguvika
Saman gegn sóun – Umhverfissýning í Perlunni
Vekjum athygli á umhverfissýningunni þar sem opinberir aðilar og fyrirtæki kynna umhverfismál. Sýningin verður opin til 17.30 á laugardag 10. september. 
Vínbúðin á Hólmavík er komin með tvö Græn skref
Vínbúðin í Hólmavík hefur lokið við innleiðingu tveggja Grænna skrefa. Gaman að segja frá því að Vínbúðin og verslun KSH deila sama húsnæðinu og því ná skrefin til enn fleiri aðila. Það er einmitt það sem við viljum að gerist að starfsmenn og stofnanir breiði út boðskapinn. 