Á morgunverðarfundi Grænna skrefa spratt upp umræða um umhverfisvænar gjafir. Í þessu samhengi var til dæmis verið að velta því fyrir sér hvað væri græn jólagjöf frá vinnustaðnum til starfsmanna, þakklætisvottur til samstarfsaðila eða umhverfisvænn varningur eins og algengt er að gefa á t.d. ráðstefnum og kynningum (í dag er algengt að sjá buff, penna o.s.frv). 

Í umræðunum spruttu upp allskonar tillögur að gjöfum svo sem fjölnota vatnsflöskur, umhverfisvottaðar vörur og út að borða á stað sem býður upp á grænkerafæði, leikhúsferð o.s.frv.  

Í þessu samhengi er gott að hafa í huga að flestar vörur og afþreying hafa einhver umhverfisáhrif og því ágætt að spyrja sig hvort gjöfin komi raunverulega að gagni. Ef margir starfsmenn eiga t.d. vatnsflösku, fjölnota poka eða slíkt þá er það ekki endilega jákvætt fyrir umhverfið að eiga allt of mikið af þessum hlutum. Þá er gjafabréf í búð sem selur umhverfisvænar vörur kannski betri leið þar sem fólk velur það sem vantar.  

Vilji stofnanir ganga lengra og gefa gjafir án nokkurra umhverfisáhrifa var nefnd ein mjög skemmtileg tillaga í umræðum á morgunverðarfundinum. Það er að gefa starfsmönnum auka frídaga í jólagjöf. Ónefndur yfirmaður á einum vinnustað nefndi að vinnutapið væri lítið þó aukafrídagur væri gefinn, enda líklegt að fólk væri með hálfum hug í vinnunni ef það er að vinna mikið um jólin. Í staðinn sé fólk líklegt að koma enn orkumeira til baka ef það fær almennilegt frí. Gjafakort hjá hjólaviðgerðaþjónustu eða í fataviðgerð er líka skemmtileg pæling! 

Að auki kom fram sú hugmynd að hægt væri að styrkja gott málefni í nafni þeirra sem þiggja gjöfina.  Jafnvel er hægt að ganga ennþá lengra og gefa gjafir með jákvæð umhverfisáhrif svo sem rótarskot til styrktar björgunarsveitanna eða kolefnisjöfnun. 

Við bjóðum skrifstofu sýslumanns á Suðurlandi hjartanlega velkomin í Grænu skrefin og hlökkum mikið til að vinna með þeim að bættu umhverfisstarfi.

 

Skrifstofa sýslumannsins á Suðurlandi er með 25 starfsmenn á fjórum starfstöðvum.

Við bjóðum Menntaskólann á Akureyri velkominn til leiks.

Í núgildandi umhverfisstefnu skólans stendur meðal annars „[k]eppa skal markvisst að því að starfsemi og rekstur skólans sé svo umhverfisvænn sem kostur er“ sem rímar vel við Grænu skrefin og verður góður grunnur að byggja á í starfinu sem framundan er.

Við hlökkum til samstarfsins!

Við þökkum kærlega fyrir góða þátttöku á morgunverðarfundi Grænna skrefa þann 21. október síðastliðinn. Hér að neðan finnið þið upptökur og glærur frá fundinum ásamt spurningum sem við leituðum svara við í kjölfar fundar. Vinnustofur voru ekki teknar upp en myndir af umræðuborðum má finna hér.

Staða Grænu skrefanna og umbætur á aðgerðum – Þorbjörg Sandra Bakke
Græn skref – Þjóðskjalasafn – Anna Elínborg Gunnarsdóttir
Græn skref – Vatnajökulsþjóðgarður – Agnes Brá Birgisdóttir
Aðgerðaáætlun stjórnvalda í loftslagsmálum – Anna Sigurveig Ragnarsdóttir

Nokkrar spurningar sem við ætluðum að svara hér:

Hver er staðan á samræmingu sorpflokkunar á landsvísu?

Fyrst er vert að undirstrika að samræming sorpflokkunar þýðir fyrst og fremst samræmdar merkingar/litakóðar fyrir hvern úrgangsstraum. Tillaga um samræmingu kemur fram í drögum að stefnu um meðhöndlun úrgangs sem Umhverfisstofnun skilaði til umhverfis- og auðlindaráðuneytisins í október 2019. Áætlað er að sett verði fram frumvarpsdrög um breytingar á lögum um meðhöndlun úrgangs á vorþingi 2021 og er von stofnunarinnar að samræmingarkrafan verði hluti af því frumvarpi.

Á hvaða vettvangi er verið að skoða kaup á kolefnisreikni matvæla og hvar er sú vinna stödd?

Í aðgerð 2.2.A í Innkaupastefnu matvæla fyrir ríkisaðila, sem samþykkt var árið 2019, segir: Stjórnvöld leggi til reiknilíkan sem mælir kolefnisspor matvæla frá framleiðanda til kaupanda. Umhverfis- og auðlindaráðuneyti og atvinnuvega- og nýsköpunarráðuneyti eru þessa dagana að skoða hvort fjármögnun fáist fyrir aðgang allra ríkisstofnana að slíkum reikni. Sú vinna er því í gangi en erfitt að segja hvenær niðurstaða fæst í málið.

Sjá upplýsingar um Matarspor Eflu hér.

Hvar finnum við upplýsingar um kolefnisspor vefsíða?

Á síðunni Website Carbon.

Hvar finnum við upplýsingar um það sem hafa skal í huga þegar flutt er í nýtt húsnæði?

Við höfum tekið saman nokkra punkta, sjá undir Vinnugögn hér.