Við bjóðum starfsfólk Menntaskólans í Kópavogi velkomna í Græn skref.
Hjá Menntaskólanum í Kópavogi starfa 103 einstaklingar þannig að það munar um minna. Auk þess geta starfsmenn haft góð áhrif á allan þann fjölda nemenda sem sækja skólann og virkjað kraft og vilja nemenda til breytinga.
Við hlökkum til að feta með þeim grænan veg!
Það eru spennandi tímar í Grænu skrefunum og stefnir í að allar stofnanir verði komnar á fullt í umhverfisstarfi sínu á árinu. Stjórnvöld hafa lagt áherslu á að allar stofnanir ríkisins innleiði Græn skref í ríkisrekstri fyrir árslok 2021, eins og fram kemur bæði í loftslagsstefnu Stjórnarráðsins og í fjárveitingabréfi til stofnananna.
Í fjárveitingabréfi er þetta orðað þannig að ríkisaðilar skuli vinna stöðugt að því að efla vistvænan rekstur ríkisins og vinni meðal annars „að því að uppfylla öll fimm Grænu skrefin í ríkisrekstri á árinu í samræmi við skilyrði loftslagsstefnu Stjórnarráðsins. Stofnanir sem ekki hafi þegar skráð sig til þátttöku ljúki a.m.k. innleiðingu á skrefi tvö fyrir 1. júní 2021 og klári öll skrefin fimm fyrir árslok í samræmi við skilyrði stefnunnar.“
Þetta eru frábærar fréttir fyrir umhverfið og framtíðar kynslóðir auk þess sem það hefur jákvæð áhrif á vinnustaðaumhverfi að stíga skrefin.
Við bjóðum allar stofnanir velkomnar og bendum á að þær sem eiga eftir að skrá sig geti gert það á vef Grænna skrefa.
Við viljum óska Landsvirkjun Mývatnssvæði með að hafa tekið fimm Græn skref. Landsvirkjun Mývatnssvæði á sérstakt hrós skilið fyrir að taka öll skrefin í einu.
Oft er sagt að það sé eins og að borða fíl að sinna umhverfisstarfi. Og hvernig borðar maður fíl? Jú einn bita í einu. Grænu skrefin eru hönnuð til þess að umhverfisstarf sé ekki yfirþyrmandi með því að skipta starfinu upp í skref. En Landsvirkjun Mývatnssvæði ræðst ekki á garðinn þar sem hann er lægstur, og tekur þetta allt í einni beit. Það sýnir hversu mikinn metnað starfssemin hefur fyrir umhverfisstarfi. Það sýnir líka hversu mikla og góða forvinnu Landsvirkjun hefur gert. Það er langt síðan Landsvirkjun byrjaði að leggja grunninn að umhverfisstarfi dagsins í dag. Það hefur eflaust fyrst um sinn verið erfitt, en núna er það starf farið að bera ávöxt.
En það fylgja því líka áskoranir að vera umhverfisvænn og vera með starfssemi á hálendinu. Grænu skrefin eru hönnuð fyrir týpíska skrifstofustarfssemi, en á hálendinu er kannski ekki mikil þörf á strætómiðum og góðum hjólabogum. Tæknin hefur heldur ekki náð það langt að rafræn tæki dugi í svo erfiðum aðstæðum. Því eiga sum atriði Grænu skrefanna ekki við, en við erum engu að síður sannfærð um að Landsvirkjun muni hafa augun opin fyrir þróun vistvænna tækja fyrir erfiðar aðstæður. Á meðan fylgist Landsvirkjun vel með notkun á jarðefnaeldsneyti og dregur úr öllum óþarfa.
Við óskum Landsvirkjun Mývatnssvæði enn og aftur, innilega til hamingju með þennan áfanga. Við viljum þakka Laufey Lilju Ágústsdóttur, tengilið Grænna skrefa, sem heldur svo samviskusamlega og vel utan um þetta verkefni. Við þökkum Hörpu Gunni Aðalbjörnsdóttur sem hefur haft umsjón með að koma Grænu skrefunum í verk á Mývatnssvæðinu. Einnig ber að hrósa Ragnheiði Ólafsdóttur sem á stóran þátt í því að leggja grunninn að umhverfisstarfi Landsvirkjunnar. Stjórnendur Landsvirkjunnar almennt, og á Mývatnssvæði, eiga þakkir skyldar því það er alltaf mikilvægt að hafa þeirra stuðning í Grænni vegferð. Að lokum þökkum við öllum starfsmönnum, því umhverfismál eru þannig að þau skila ekki árangri nema allir leggi hönd á plóg og geri sitt. Takk fyrir!