Betri lýsing
Þegar starfsfólk Landmælinga uppgötvaði að lýsingu var ofaukið á sumum stöðum brá það á það ráð að skrúfa aðra hvora ljósaperu úr ljósastæðum,
sem sparar orkuna sem annars færi í að hafa kveikt á perunum.
Gleymum okkur ekki
Einfaldir miðar á vel völdum stöðum á vinnustaðnum eru góð leið til að minna fólk á
að slökkva ljós og á raftækjum við heimferð eða í kompum og geymslum þar sem ekki þarf að loga ljós yfir daginn.
Endurnota eins og hægt er
Stefna Landmælinga í innkaupamálum er að forðast í lengstu lög að kaupa nýtt ef eldri búnað er hægt að nýta. Til dæmis eru tölvur gjarnan látnar ganga á milli starfsmanna, sem hafa ólíkar þarfir í þeim efnum. Þannig þurfa þeir sem vinna í kortagerð mun öflugri tæki en þeir sem sinna t.d. almennum skrifstofustörfum og þegar tölvur þeirra fyrrnefndu úreldast fyrir kortavinnuna geta þær gagnast vel fyrir aðra.
Hvar liggur áhugi starfsmanna?
Skipulagsstofnun réðst í könnun um ferðavenjur, úrgangsflokkun og orkunotkun meðal starfsmanna til að fá yfirsýn yfir þau sóknarfæri sem stofnunin hefur til að bæta sig í umhverfismálum.
Slíkar kannanir þurfa ekki að vera flókar, t.a.m. er hægt að finna vefsíður sem bjóða ókeypis forrit fyrir þess háttar úttektir.
Skipulagsstofnun stígur fyrsta græna skrefið
Grænar plöntur taka hlýlega á móti gestum Skipulagsstofnunar og gleðja auga þeirra sem þar starfa um leið og þær keppast við að bæta loftgæðin á vinnustaðnum. Skipulagsstofnun var meðal fyrstu stofnana ríkisins sem á dögunum stigu grænt skref í sínum rekstri.
Hjá Skipulagsstofnun er nýtnin í fyrirrúmi. Þegar nýlega þrengdi að stofnuninni þurfti að endurskipuleggja nýtingu húsnæðisins og samnýta skrifstofur meira en áður. Við þær breytingar kom í ljós að mörg skrifborðanna sem áður voru í notkun voru of stór til að hægt væri að koma tveimur eða fleirum inn á eina skrifstofu. Í stað þess að kaupa ný húsgögn var brugðið á það ráð að fá gefins borð sem Síminn var hættur að nota. Annað dæmi eru möppur og skjalahólf sem tæmd eru þegar pappíranna er ekki lengur þörf og þau geymd á vísum stað þannig að hægt sé að grípa til þeirra þegar þarf, í stað þess að kaupa nýtt.
Hjá Skipulagsstofnun er eingöngu notaður margnota borðbúnaður , aðeins er keyptur umhverfisvottaður pappír og þjónusta við þrif er keypt af svansvottuðu fyrirtæki.
Og grænu plönturnar , sem víða er að finna um vinnustaðinn, eru ekki bara til skrauts. Ef marka má rannsókn á vegum bandarísku geimvísindastofnunarinnar NASA geta plöntur unnið gegn 99% eiturefna í andrúmslofti innanhúss og gegna því mikilvægu hlutverki við að bæta loftgæði á vinnustaðnum.
Vistvænt hjá Landmælingum Íslands
Samgöngumál eru tekin föstum tökum hjá Landmælingum Íslands sem staðsettar eru á Akranesi. Landmælingar tóku sitt fyrsta græna skref á dögunum og voru meðal fyrstu stofnana landsins sem aðlöguðu starfsemi sína Grænum skrefum í ríkisrekstri.
Þótt ákvörðunin hafi ekki kallað á miklar breytingar í starfseminni voru sóknarfæri hér og þar sem nýtt voru til að stuðla að umhverfisvænna starfsumhverfi. Meðal annars voru ruslafötur aflagðar inni á skrifstofunum í því skyni að auka hvata fyrir starfsmenn til að draga úr úrgangi. Þess í stað eru vel merkt flokkunarílát fyrir rusl á einum stað á vinnustaðnum.
Staðsetning Landmælinga á Akranesi hefur orðið stjórnendum stofnunarinnar hvati til að huga sérstaklega að samgöngumálunum. Sex starfsmenn stofnunarinnar búa í Reykjavík. Til að draga sem mest úr útblæstri vegna ferða er sá háttur hafður á að tveir nýta sér þjónustu strætó til og frá vinnu en fjórir aka saman í Hybrid bíl. Stór hluti þeirra sem búa í grennd við vinnustaðinn hjóla eða ganga til og frá vinnu og er ríflega helmingur starfsmanna með samgöngusamning við Landmælingar. Þá hefur stofnunin ávallt verið öflugur þátttakandi í átakinu Hjólum í vinnuna og er ríflega af hjólagrindum við vinnustaðinn. Loks hefur stofnunin yfir tveimur litlum díselbílum að ráða sem starfsfólk nýtir til að sinna fundum og öðrum vinnutengdum erindum utan stofnunar á vinnutíma, auk þess sem strætómiðar eru alltaf aðgengilegir á vinnustaðnum.
Hvers vegna grænn ríkisrekstur?
Hjá ríkinu starfa um 20000 manns. Reksturinn er umfangsmikill og hefur umtalsverð umhverfisáhrif, bæði vegna athafna starfsmanna og vegna þjónustu sem ríkið veitir. Rekstrinum fylgir losun gróðurhúsalofttegunda frá bílum, meðhöndlun úrgangs og ýmsum verkframkvæmdum. Í gegnum innkaup hefur ríkið einnig mikil áhrif, t.d. á losun gróðurhúsalofttegunda. Starfssemi ríkisins fylgir losun efna sem hafa áhrif á loftgæði, m.a. vegna aksturs bíla, malbikunar og ýmislegs viðhalds.
Með virkri umhverfisstjórnun og kaupum á vistvænum vörum og þjónustu má skapa markað fyrir slíkar vörur og draga verulega úr neikvæðum umhverfisáhrifum af starfsemi ríkisins.
Græn skref og Náttúru- og umhverfisverðlaun Norðurlandaráðs
Þann 29. október síðast liðinn hlaut Reykjavíkurborg Náttúru- og umhverfisverðlaun Norðurlandaráðs 2014. Rökstuðningur dómnefndar á valinu var að markvisst og víðtækt starf að umhverfismálum hefði leitt til góðs árangurs á mörgum sviðum, til að mynda umhverfisvænnar nýtingar á neysluvatni, jarðvarma til húshitunar og rafmagnsframleiðslu úr jarðvarma. Verkefni eins og Græn skref í starfsemi Reykjavíkurborgar hafi einnig skipt máli.
Verðlaunaafhending var í Stokkhólmi og nemur verðlaunaféð um 350 þúsund danskra króna. Það var verðlaunahafi síðasta árs, Selina Juul, sem afhenti verðlaunin í ráðhúsinu í Stokkhólmi.
Nú hafa Grænu skrefin verið aðlöguð að ríkisrekstri og verða því fleiri og fleiri sem geta stigið þessi einföldu og aðgengilegu skref. Til hamingju Reykjavíkurborg með þennan heiður og takk fyrir verkfærið Græn skref.
Þrír plastpokar á fimm vikum
Undanfarið hefur umræða um skaðsemi plasts stóraukist, en plast getur valdið mjög neikvæðum áhrifum á heilsu og umhverfi. Lengi hefur verið vitað um þörf þess að draga úr notkun plasts en þróunin hefur verði þveröfug.
Umhverfishópur Stykkishólms fékk í ársbyrjun styrk frá umhverfis- og auðlindaráðuneytinu til að ráðast í tilraunaverkefni sem felur í sér að gera Stykkishólm að burðarplastpokalausu sveitarfélagi. Verkefnið er unnið í samstarfi við Náttúrustofu Vesturlands, Landvernd, Umís/Environice og Stykkishólmsbæ.
Í september síðastliðnum steig Stykkishólmur mikilvægt skref í umhverfismálum þegar bærinn ákvað í samstarfi við verslunar og þjónustufyrirtæki bæjarins að útrýma notkun plastpoka. Flestar verslanir í bænum hafa hætt sölu á plastpokum alfarið. Sumar verslanir hafa ekki útrýmt plastpokum en hafa í staðinn boðið uppá umhverfisvæna poka. Að sögn bæjarbúa og verslunareigenda hefur verkefnið gengið vonum framar og seldust til að mynda aðeins þrír plastpokar verið seldir í ÁTVR á fyrstu fimm vikum átaksins.
Hugmyndir að veislu án úrgangs
Nota fjölnota glös í staðin fyrir einnota. Hægt er að leigja glös hjá veisluþjónustu ef von er á mörgum gestum.
Fjölnota hnífapör í stað plasthnífapara. Fáið lánað hjá nágrönnum ef veisluþjónustureikningurinn er orðinn of hár.
Setið merkimiða á tunnurnar þínar þannig að gestirnir geti hjálpað þér að flokka tóm ílát, bein og bréfþurrkur.
Skemmtiatriðin, búningarnir og stuðaukandi búnaður getur verið umhverfisvænn án þess að það komi niður á skemmtuninni.
Skreytingarnar geta verið fjölnota. Kerti, krukkur og taudúkar eru engu síðri en einnota vörur.