Við viljum óska Landsvirkjun Mývatnssvæði með að hafa tekið fimm Græn skref. Landsvirkjun Mývatnssvæði á sérstakt hrós skilið fyrir að taka öll skrefin í einu.

Oft er sagt að það sé eins og að borða fíl að sinna umhverfisstarfi. Og hvernig borðar maður fíl? Jú einn bita í einu. Grænu skrefin eru hönnuð til þess að umhverfisstarf sé ekki yfirþyrmandi með því að skipta starfinu upp í skref. En Landsvirkjun Mývatnssvæði ræðst ekki á garðinn þar sem hann er lægstur, og tekur þetta allt í einni beit. Það sýnir hversu mikinn metnað starfssemin hefur fyrir umhverfisstarfi. Það sýnir líka hversu mikla og góða forvinnu Landsvirkjun hefur gert. Það er langt síðan Landsvirkjun byrjaði að leggja grunninn að umhverfisstarfi dagsins í dag. Það hefur eflaust fyrst um sinn verið erfitt, en núna er það starf farið að bera ávöxt.

En það fylgja því líka áskoranir að vera umhverfisvænn og vera með starfssemi á hálendinu. Grænu skrefin eru hönnuð fyrir týpíska skrifstofustarfssemi, en á hálendinu er kannski ekki mikil þörf á strætómiðum og góðum hjólabogum. Tæknin hefur heldur ekki náð það langt að rafræn tæki dugi í svo erfiðum aðstæðum. Því eiga sum atriði Grænu skrefanna ekki við, en við erum engu að síður sannfærð um að Landsvirkjun muni hafa augun opin fyrir þróun vistvænna tækja fyrir erfiðar aðstæður. Á meðan fylgist Landsvirkjun vel með notkun á jarðefnaeldsneyti og dregur úr öllum óþarfa.

Við óskum Landsvirkjun Mývatnssvæði enn og aftur, innilega til hamingju með þennan áfanga. Við viljum þakka Laufey Lilju Ágústsdóttur, tengilið Grænna skrefa, sem heldur svo samviskusamlega og vel utan um þetta verkefni. Við þökkum Hörpu Gunni Aðalbjörnsdóttur sem hefur haft umsjón með að koma Grænu skrefunum í verk á Mývatnssvæðinu. Einnig ber að hrósa Ragnheiði Ólafsdóttur sem á stóran þátt í því að leggja grunninn að umhverfisstarfi Landsvirkjunnar. Stjórnendur Landsvirkjunnar almennt, og á Mývatnssvæði, eiga þakkir skyldar því það er alltaf mikilvægt að hafa þeirra stuðning í Grænni vegferð. Að lokum þökkum við öllum starfsmönnum, því umhverfismál eru þannig að þau skila ekki árangri nema allir leggi hönd á plóg og geri sitt. Takk fyrir!

 

Fyrsta Græna skrefið hefur nú verið stigið hjá Skattinum. Það voru aðalstöðvarnar á Laugavegi sem reið á vaðið og kláraði fyrsta Græna skrefið af fimm í gær.

Í kjölfarið munu aðrar starfsstöðvar stíga skrefið en Skatturinn starfar á 14 stöðum á landinu.

Mikil áhersla hefur verið lögð á að vanda til verka og starfsmanni Grænna skrefa þótti gaman að sjá allt það umhverfisstarf sem unnið hefur verið undanfarið í starfseminni.

Við óskum Skattinum til hamingju með áfangann og hlökkum til áframhaldandi samstarfs.

Meðfylgjandi má sjá myndir sem Græn skref fengu send frá Skattinum, en þær sýna hluta af því sem hefur verið gert til þess að draga úr neikvæðum umhverfisáhrifum af starfseminni undanfarið.

Í dag fékk Vatnajökulsþjóðgarður formlega afhenta viðurkenningu fyrir 3. Græna skrefið. 8 starfsstöðvar þjóðgarðsins taka þátt í innleiðingu verkefnisins og eru Grænu maurarnir eins og þeir kalla sig duglegir að hittast og fara yfir málin, en hópurinn samanstendur af tengiliðum hverrar starfsstöðvar. Umhverfismálin eru alls ekki ný af nálinni í Vatnajökulsþjóðgarði en eins og kom fram í afhendingunni þá hafa Grænu skrefin gefið starfsmönnum tækifæri til að skerpa á ýmsum málum enda umhverfismálin þess eðlis að við getum alltaf bætt okkur!

Starfsmenn Vatnajökulsþjóðgarðs standa sig afar vel í flokkun úrgangs og er flokkunaraðstaða í vinnurýmum og á gestastofum til fyrirmyndar. Helsti flöskuhálsinn varðandi úrgangsmálin eru tjaldsvæðin sem þjóðgarðurinn rekur en samkvæmt starfsmönnum eru lausnir varðandi flokkun á tjaldsvæðum í sjónmáli. Meðal þess sem lögð var áhersla á í 3. skrefinu var greining á raforku- og hitanotkun á öllum starfsstöðvum, umhverfisfræðsla til starfsmanna, innkaup á lífrænu kaffi og te og umhverfisvottuðum ræsti- og hreinsiefnum. Þó að ekkert mötuneyti sé rekið á vegum þjóðgarðsins leggja starfsmenn áherslu á að sporna gegn matarsóun m.a. með upplýsingagjöf og hafa auk þess innleitt eldað úr ísskápnum/frystinum á ákveðnum dögum sem er heldur betur skemmtilegt framtak!

Næst á dagskrá er 4. skrefið og eru Grænu maurarnir nú þegar farnir að skipuleggja innleiðingu þess.

Til hamingju með árangurinn starfsfólk í Fellabæ, Gömlubúð, Gljúfrastofu, Kirkjubæjarklaustri, Mývatni, Skaftafellsstofu, Skaftárstofu og Snæfellsstofu og gangi ykkur vel með framhaldið!

 

 

 

Nú fyrir helgi fékk Vinnumálastofnun í Kringlunni Reykjavík afhenta viðurkenningu fyrir að hafa innleitt skref 2. Afhendingin fór fram á Teams og þar kom fram hversu frábært það er að starfsmenn hafi náð að keyra verkefnið áfram á afar krefjandi tímum. Þið megið sannarlega vera stolt af ykkur! Í þessum fasa verkefnisins hefur verið lögð áhersla á skil á Grænu bókhaldi sem mun koma sér vel þegar stofnunin fer í þá vinnu að setja sér umhverfis- og loftslagsstefnu. Passað er upp á að ræsti- og hreinsivörur séu umhverfisvottaðar og góð flokkunaraðstaða er til staðar í öllum rýmum. Samkvæmt Grænu bókhaldi er endurvinnsluhlutfall Vinnumálastofnunar í Reykjavík tæp 70% sem er glæsilegur árangur!

Næst á dagskrá hjá stofnuninni er innleiðing á skrefi 3 samkvæmt nýja gátlistanum en einnig ætla starfsstöðvar Vinnumálastofnunar á landsbyggðinni að keyra verkefnið áfram. Fyrirhugaðir eru flutningar úr Kringlunni í nýtt húsnæði og þá gefst kjörið tækifæri fyrir stofnunina að útbúa aðstöðuna með helstu umhverfisáherslur sínar í huga. Við höfum einmitt tekið saman ítarefni sem nýtist öllum þeim sem eru að flytja í nýtt skrifstofuhúsnæði, sjá hér. Þar kemur fram að gott er að huga að orkusparnaði, flokkunaraðstöðu, rafhleðslu fyrir gesti og starfsfólk, aðstöðu fyrir hjólandi og gangandi og endurnýtingu svo eitthvað sé nefnt, þegar flutt er í nýtt húsnæði.

Innilega til hamingju með áfangann og gangi ykkur sem allra best með framhaldið!