Færslur

Ný orkumerki Evrópusambandsins og uppfærður gátlisti

/in /by

Orkumerki Evrópusambandsins hafa tekið breytingum og eru nú á kvarðanum A-G á meðan orkunýtniflokkarnir A+, A++ og A+++ víkja. Nýi kvarðinn er strangari og er hannaður á þann veg að mjög fáar vörur í dag eru í flokki A, en það gefur rými fyrir betri orkunýtingu í framtíðinni. Orkunýtnustu raftæki dagsins í dag eru oftast á skalanum B-D samkvæmt nýju merkjunum.

Ástæðan fyrir breytingunum er að gera merkin skýrari, en yfir 90% af rafvörum voru áður í flokki A+, A++ eða A+++. Nýju merkin tryggja það einnig að fyrirtæki haldi áfram að þróa orkunýtnari tæki.

Útlit merkimiðanna hefur breyst lítillega og er orðið einfaldara og nútímalegra. Myndtákn sem skýra tiltekna eiginleika vörunnar hafa verið uppfærð, nokkur eru eins og á gamla miðanum, sum hafa verið endurgerð og sum eru ný.

Þann 1. mars tóku nýju orkumerkin gildi fyrir ísskápa, frysta, uppþvottavélar, þvottavélar, þvottavélar með þurrkurum, sjónvörp og rafeindaskjáir og 1. september bættust ljósgjafar við. Aðrar vörur munu taka upp nýju orkumerkin á næstu árum.

Aðgerð í gátlista Grænu skrefanna sem snýr að kaupum á raftækjum hefur verið uppfærð með tilliti til nýju merkjanna. Aðgerðin var númer fjögur í skrefi eitt, undir innkaupum, en er nú númer fimm. Ein aðgerð hefur bæst við í skrefi eitt, undir innkaupum, þar sem innkaupafólk er beðið um að nota ákvörðunartré fyrir innkaup áður en innkaup fara fram. Þið getið sótt uppfærðan gátlista hér eða undir Vinnugögn hér á síðunni.

Gangi ykkur vel!

Vorfundur Grænna skrefa

/in /by

Senn líður að vorfundi Grænna skrefa, en hann verður haldinn í fjarfundi þann 20. maí næstkomandi kl. 14:00. Á fundinum verður farið yfir helstu fréttir af skrefunum, talað um Græna bókhaldið og gagnagáttina og sýnt hvernig nýja heimasíðan þjónar okkur við innleiðingu verkefnisins. Einnig verður farið yfir skyldu stofnana til að setja sér loftslagsstefnu (sjá 5. gr. c í loftslagslögum) og leiðbeiningar Umhverfisstofnunar þess efnis kynntar.

Starfsmenn Grænna skrefa verða með stutt innlegg um eftirfarandi:

Grænu skrefin – Hildur Harðardóttir

Græna bókhaldið – Birgitta Steingrímsdóttir

Ný heimasíða Grænna skrefa – Þorbjörg Sandra Bakke

Loftslagsstefna ríkisaðila – Ásdís Nína Magnúsdóttir

Fundurinn fer fram í gegnum forritið Teams. Ekki er nauðsynlegt að stofna aðgang til að komast inn á fundinn. Ekki þarf að hlaða niður forriti ef fylgst er með í gegnum vafra, en ef ætlunin er að fylgjast með fundinum í gegnum síma þarf að hlaða niður Teams smáforritinu. Ekki er mælt með að nota Safari vafrann en aðrir vafrar virka vel.

Við stefnum á að hafa kynninguna um 40 mínútna langa og gefa svo gott svigrúm fyrir spurningar en þær verður hægt að bera fram í gegnum spjallvirkni.

Við hvetjum alla þá sem hafa áhuga á Grænu skrefunum að taka þátt, bæði þátttakendur í verkefninu sem og aðra. Þetta er frábært tækifæri til þess að kynna sér Grænu skrefin og læra meira um hvað þátttaka í verkefninu felur í sér fyrir starfsemi ríkisaðila og umhverfið.

Hér er hlekkur á útsendingu fundarins, endilega skráið tímasetninguna í dagatalið: 20. maí kl. 14:00.

Þorbjörg Sandra

Hildur

Ásdís Nína

Birgitta

Nýtt útlit og ný heimasíða

/in /by

Grænu skrefin hafa nú fengið andlitslyftingu með tilkomu nýs útlits og nýrrar heimasíðu. Á heimasíðunni má nálgast helstu upplýsingar um verkefnið; forsögu þess, markmið, ávinning, skrefin sjálf, þátttakendur, Grænt bókhald og vinnugögn. Við höfum einnig bætt við síðu þar sem við svörum algengum spurningum undir Spurt og svarað og svo má nálgast góð ráð undir Heilræði en sniðugt er að senda þau út sem mola til starfsmanna. Í takt við nýtt útlit létum við útbúa nýjar merkingar og borðstand sem þátttakendur geta pantað undir Vinnugögn sér að kostnaðarlausu. Einhverjir hnökrar hafa verið á síðunni undanfarna daga svo við biðjum þá sem sent hafa inn skráningu á síðustu dögum en engan póst frá okkur fengið að senda inn nýja skráningu.

Tveir nýjir starfsmenn hófu störf í verkefninu hér hjá Umhverfisstofnun á dögunum, þær Ásdís Nína Magnúsdóttir og Þorbjörg Sandra Bakke. Mikil aukning hefur verið í skráningum í Grænu skrefin sem er ákaflega ánægjulegt og því mikill fengur að fá þær stöllur til starfa. Þær munu taka við samskiptum við einhverjar stofnanir á næstunni.

Starfsmenn Grænna skrefa óska þátttakendum og landsmönnum öllum gleðilegs og sólríks sumars 🙂

Við kveðjum gamla útlitið …

… og bjóðum nýtt útlit velkomið!

 

Ný útgáfa af grænu bókhaldi

/in /by

Nú er uppfært excel skjal græna bókhaldsins niðurhalanlegt undir liðnum Grænt bókhald hér á heimasíðunni. Helstu nýmæli eru að hægt er að reikna út losun gróðurhúsalofttegunda frá fleiri þáttum og gerðar voru ýmsar uppfærslur, ítarlegri leiðbeiningar og losunarstuðlar uppfærðir.

Gagnagátt græns bókhalds fór í loftið í fyrra og er henni ætlað að leysa af hólmi excel skjalið góða. Nokkrir hnökrar hafa þó verið á gáttinni og er verið að vinna í lagfæringum á henni þessa dagana. Við biðjum þátttakendur því að skila græna bókhaldinu ekki inn fyrr en Gagnagáttin verður komin í lag. Síðasti skiladagur græns bókhalds vegna ársins 2019 er 1. apríl næstkomandi.

En þurfum við að nota excel skjalið þegar Gagnagáttin er tilbúin? Nei, mögulegt er að skrá græna bókhaldið beint inn í Gagnagátt Umhverfisstofnunar. Excel skjalið nýtist sem vinnuskjal og veitir möguleika á að skrá hjá sér forsendur og aðrar upplýsingar auk þess sem hægt er að bæta við þáttum. Neðst á þessari síðu eru leiðbeiningarmyndbönd um hvernig nota skal excel skjalið og hér er kynning á græna bókhaldinu frá árinu 2018.

gb4utg

 

Bílar ríkisins verða umhverfisvænir

/in /by

Ríkisstjórnin hefur samþykkt að innleiða nýja stefnu sem tryggir að ríkisstofnanir kaupi umhverfisvænni bíla en innleiðing vistvænni ökutækja er á meðal aðgerða á aðgerðaráætlun ríkisstjórnarinnar í loftslagsmálum. Með aðgerðunum má draga úr heildarlosun ríkisins vegna ökutækja á skömmum tíma. Að auki er rekstrarkostnaður vistvænna bifreiða lægri og heildarlíftímakostnaður og vistferilskostnaður tækjanna minni. Sjá nánar á vef Stjórnarráðsins.

vistvbilar

Nýtnivikan hefst laugardaginn 16. nóvember

/in /by

Dagana 16.-24. nóvember næstkomandi stendur Evrópsk nýtnivika yfir en markmið átaksins er að hvetja fólk til að draga úr óþarfa neyslu, nýta hluti betur og draga þannig úr myndun úrgangs. Þema þessa árs er fræðsla og miðlun um úrgangsmál undir slagorðinu Minni sóun – minna sorp. Fyrirtæki, stofnanir og almenningur eru hvött til þess að fræðast um úrgangsmál og koma þeirri þekkingu í framkvæmd með því að breyta daglegum neysluvenjum sínum og draga þannig úr myndun úrgangs.

Á heimasíðu Umhverfisstofnunar má finna alls kyns upplýsingar og fróðleik um úrgangsmál, eins og tölfræði um úrgangsflokka og hvernig okkur gengur að uppfylla sett markmið, stefnu ríkis og sveitafélaga í úrgangsmálum, áhugaverðar upplýsingar um flokkun og endurvinnslu og almenna umfjöllun um neyslu og innkaup. Umhverfisstofnun stendur að viðburðum í tengslum við nýtnivikuna, bæði í Reykjavík og á Akureyri, og má nálgast allar upplýsingar um þá á Facebook síðu átaksins. 

Við hvetjum að sjálfsögðu alla þátttakendur Grænna skrefa til að nýta sér nýtnvikuna og vekja athygli á málstaðnum. Hér að neðan eru hugmyndir að því hvað stofnanir geta gert en ítarlegri leiðbeiningar er að finna hér.

NV mynd inn frtt

 

 

Evrópsk samgönguvika er hafin

/0 Comments/in /by

Evrópsk samgönguvika stendur yfir dagana 16.-22. september. Markmið vikunnar er að kynna íbúum í þéttbýli samgöngumáta sem allt í senn eru vistvænir, hagkvæmir og bæta heilsu fólks um leið og þeir hafa jákvæð áhrif á umhverfi og andrúmsloft. Við hvetjum stofnanir til nýta tækifærið þessa vikuna og kynna kosti vistvænna samgöngumáta fyrir starfsfólki sínu. Er einhver starfsmaður innanhúss sem getur deilt reynslu sinni af því að hjóla, ganga eða taka strætó í og úr vinnu? Væri hægt að fá kynningu á hjólasamgöngum í hádegismat eða á starfsmannafundi? Er hægt að setja upp keppni innanhúss, t.d. hvaða deild kemur oftast með vistvænum hætti til/frá vinnu þessa vikuna eða hvaða deild kemur með frumlegasta hætti til vinnu? Endilega virkjið hugmyndaflugið, klæðið ykkur vel og nýtið ykkur Evrópska samgönguviku til þess að upplifa kosti vistvænna samgöngumáta.

Á vef Umhverfisstofnunar er hægt að kynna sér kosti vistvænna samgangna nánar og hér eru allar helstu upplýsingar um samgönguvikuna.samg