Landsbókasafn Íslands – Háskólasafn er nýr þátttakandi í verkefninu. Safnið sér um söfnun og varðveislu á öllum íslenskum gögnum. Einnig sinnir safnið þjónustu við Háskóla Íslands hvað varðar kennslu og rannsóknir. Á safninu starfa 80 manns og við hlökkum til að vinna með þeim öllum.

Rekstrarfélag Stjórnarráðsins er að ljúka við uppsetningu hleðslustöðva fyrir rafmagnsbíla á bílastæðum sem Rekstrarfélag Stjórnarráðsins hefur umsjón með. Til að byrja með verða 6 bílastæði ætluð til að hlaða rafbíla og verður aðgangur að hleðslustöðvunum opinn þeim sem hafa aðgang að bílastæðum ráðuneytanna, en síðar munu þær verða aðgangsstýrðar og mögulegt gjald innheimt fyrir hleðsluna.

Þegar setja á upp hjólastæði er gott að skoða mismunandi gerðir, staðsetningu og hvað hentar hverjum vinnustað fyrir sig. Hjólreiðamenn mæla sérstaklega með því að settir séu upp hjólabogar enda styðja þeir vel við hjólið og auðvelt er að læsa stellinu við bogann. Gallinn við einfaldar hjólagrindur er sá að gjarðirnar á hjólunum eiga það til að beyglast þegar álag er á hjólið t.d. vindur. Það margborgar sig að leggja aðeins meira fjármagn í vel gerð hjólastæði sem allir vilja nota. Svo er líka gaman að vekja athygli á hjólastæðum með því að gera eitthvað nýtt og öðruvísi.
Myndin og upplýsingarnar eru fengnar af vef Landssamtaka hjólreiðamanna.

Til hamingju starfsmenn Vegagerðarinnar, með fyrsta Græna skref starfsstöðvarinnar í Borgarnesi. Þar eru menn samviskusamir í að reyna að finna leiðir til að endurnýta eins vel og hægt er. T.d. þá fá þau notað salt frá fiskvinnslum á Snæfellsnesi til að dreifa á vegina á veturna, einnig eru vegstikurnar margsinnis endurnýttar og þegar það er ekki lengur hægt eru þær sendar í endurvinnslu hér á Íslandi.