Græn skref

 

Græn skref eru leið fyrir opinbera aðila til að vinna markvisst að umhverfismálum eftir skýrum gátlistum og fá viðurkenningu eftir hvert skref. 

Hvernig get ég verið með?

Þjónustuskrifstofa Vinnumálastofnunar á Akureyri tók í dag við viðurkenningu fyrir fyrsta Græna skrefið þar á bæ. Mikill metnaður og áhugi er í hópnum, en stofnunin hefur verið sérlega dugleg í að kynna verkefnið vel fyrir starfsmönnum. Nýlega fengu starfsmenn fræðslu um endurvinnslu, en Akureyringar hafa lengi borið af þegar kemur að flokkun sorps og lífræns úrgangs. Til hamingju með árangurinn og toi toi toi!
 

Fiskistofa með í Grænu skrefunum

Við bjóðum Fiskistofu velkomna til leiks! Hlutverk stofnunarinnar er að gæta hagsmuna þjóðarinnar við ábyrga nýtingu auðlinda hafs og vatna. Hjá Fiskistofu starfa 63 manns á sex starfsstöðvum um land allt.
 

Jafnréttisstofa hefur Grænu vegferðina

Jafnréttisstofa var opnuð á Akureyri í september 2000. Hún annast stjórnsýslu á sviði jafnréttismála í samræmi við lög um jafna stöðu og jafnan rétt kvenna og karla og heyrir undir yfirstjórn forsætisráðherra. Hjá stofnuninni starfa 9 manns og hlökkum við til að vinna með þeim að umhverfismálunum - verið velkomin í Grænu skrefin!
 

Embætti landlæknis stígur með okkur skrefin

Við bjóðum Embætti landlæknis velkomið til leiks og hlökkum mikið til að vinna að umhverfismálunum með þeim 70 starfsmönnum sem þar starfa. 
 
Það gleður okkur hjá Grænu skrefunum að fá stofnanirnar tvær með í verkefnið og bjóðum við þær hjartanlega velkomnar. Bæði embættin eru fyrst sinnar tegundar til að taka þátt í Grænu skrefunum en þau heyra bæði undir dómsmálaráðuneyti. Við hvetjum að sjálfsögðu önnur lögreglu- og sýslumannsembætti til að taka embættin á Norðurlandi eystra til fyrirmyndar og hefja grænu vegferðina með okkur. 
 

Það er inn að vera í rusli

Við mælum með því fyrir alla vinnustaði sem vilja taka sorpflokkun föstum tökum að fá fræðslu frá sinni sorphirðuþjónustu. Starfsfólk Vinnumálastofnunar og Umhverfisstofnunar fékk nýverið kynningar frá Terra sem áður hét Gámaþjónustan. Mikil ánægja var með kynningarnar og gáfu fulltrúar Terra sér góðan tíma í að svara spurningum. Áhugavert verður að sjá hvort kynningarnar skili sér í hærra endurvinnsluhlutfalli hjá stofnununum tveimur. Að sögn Vinnumálastofnunar er inn að vera í rusli og tökum við í Grænu skrefunum heilshugar undir það! 
 

Skiptimarkaður á Umhverfisstofnun

Í tilefni Evrópsku nýtnivikunnar settu meðlimir teymis græns samfélags hjá Umhverfisstofnun upp skiptimarkað. Öllu starfsfólki býðst að koma með föt og hluti á markaðinn og taka svo það sem þeim líst vel á. Framtakið hefur gengið vonum framar og er fólk bæði duglegt að koma með hluti á markaðinn sem og að framlengja líf annarra hluta. Margir hafa fundið sér ný föt og fína muni til heimilisins og enn fleiri dót, búninga og föt á börnin. Það sem ekki öðlast nýtt líf á skiptimarkaðnum fer í Góða Hirðinn hjá Sorpu.
 

Svanurinn og hringrásarhagkerfið

Ársfundur umhverfismerkisins Svansins fer fram á Grand Hótel Reykjavík þriðjudaginn 19. nóvember næstkomandi. Á fundinum verður áhersla á hringrásarhagkerfið, þau tækifæri sem liggja í því og hvernig Svanurinn styður fyrirtækin í þeirri vegferð. Við mælum eindregið með því að þátttakendur Grænna skrefa sendi fulltrúa á fundinn og fræðist um Svaninn, hringrásarhagkerfishugsunina, umhverfisstarf Krónunnar og viðhorf Íslendinga til umhverfis- og loftslagsmála. Opnunarávarp flytur Guðmundur Ingi, umhverfis- og auðlindaráðherra. Allir velkomnir - morgunverður í boði! Vinsamlegast skráið þátttöku til þess að koma í veg fyrir matarsóun hér: http://tiny.cc/ofa7fz. Fundinum verður streymt Facebook viðburðinum.
 

Nýtnivikan hefst laugardaginn 16. nóvember

Dagana 16.-24. nóvember næstkomandi stendur Evrópsk nýtnivika yfir en markmið átaksins er að hvetja fólk til að draga úr óþarfa neyslu, nýta hluti betur og draga þannig úr myndun úrgangs. Þema þessa árs er fræðsla og miðlun um úrgangsmál undir slagorðinu Minni sóun - minna sorp. Fyrirtæki, stofnanir og almenningur eru hvött til þess að fræðast um úrgangsmál og koma þeirri þekkingu í framkvæmd með því að breyta daglegum neysluvenjum sínum og draga þannig úr myndun úrgangs.
 
Flugstöð Leifs Eiríkssonar, Þjónustuhús og Flugturn í Keflavík luku nú í sumar við Grænt skref númer tvö. Allar átta starfsstöðvar Isavia sem skráðar eru í Grænu skrefin hafa nú stigið tvö skref en Flugfjarskipti kláruðu öll fimm Grænu skrefin fyrir ári síðan. Hjá Isavia er unnið mjög metnaðarfullt umhverfisstarf og er í nógu að snúast hjá starfsmönnum umhverfisdeildarinnar í Keflavík. Við óskum Isavia til hamingju með árangurinn!
 

74 stofnanir skráðar til leiks

Heilbrigðisstofnun Norðurlands hefur nú skráð sig í verkefnið og er þar með 74. þátttakandi Grænna skrefa. Hjá stofnuninni starfa 570 starfsmenn á starfsstöðvum  á Akureyri, Blönduósi, Dalvík, Fjallabyggð, Húsavík og Sauðárkróki.Við hlökkum til vegferðarinnar með Heilbrigðisstofnun Norðurlands.
 

Fyrsta skref Vinnumálastofnunar

Fyrsta Græna skrefið hefur nú verið stigið í höfuðstöðvum Vinnumálastofnunar í Reykjavík. Stefnan er svo sett á landsbyggðina í framhaldinu en starfsstöðvar stofnunarinnar eru staðsettar vítt og breitt um landið. Umhverfisteymi Vinnumálastofnunar hefur gengið vasklega til verks og lagt áherslu á að kynna verkefnið vel fyrir starfsmönnum og taka flokkunarmálin föstum tökum. Á döfinni hjá þeim er m.a. að fá kynningu frá Gámaþjónustunni svo þau geti lagt sig enn betur fram við flokkunina. Til hamingju með árangurinn Vinnumálastofnun og gangi ykkur vel með framhaldið! 
 

Umbra stígur skref 2 og 3

Umbra - þjónustumiðstöð Stjórnarráðsins, áður Rekstrarfélag Stjórnarráðsins, hefur nú fengið viðurkenningu fyrir að stíga skref 2 og 3. Innleiðing Grænu skrefanna hefur gengið smurt fyrir sig hjá Umbru, enda umhverfisstarf þegar hafið hjá stofnuninni er hún skráði sig til leiks í verkefnið. Umbra sinnir upplýsingatæknimálum og ýmsum sameiginlegum rekstrarþáttum ráðuneytanna og hefur því tækifæri til að knýja fram mikilvægar breytingar í rekstri Stjórnarráðsins. T.a.m. hefur verið tekin ákvörðun um að skipta öllum ráðherrabílum og snattbíl stofnunarinnar út fyrir rafbíla á næstu tveimur árum. Góð snyrtiaðstaða er fyrir starfsfólk sem kemur hjólandi og gangandi til vinnu og jafnframt hefur starfsfólk aðgang að tveimur rafhjólum sem þeim býðst að fá að láni í allt að 3 daga í viðleitni til að kynna hjólin fyrir starfsmönnum og hvetja til notkunar þeirra. Umbra er að mestu leyti plastpokalaus stofnun og auk þess að notast við lífbrjótanlega poka fyrir lífrænan og blandaðan úrgang hafa þau brugðið á það ráð að kaupa fjölnota poka undir pappír. Samkvæmt Grænu bókhaldi var endurvinnsluhlutfall Umbru 72% fyrir árið 2018 og verður spennandi að sjá hvort hlutfallið verði ekki enn hærra fyrir árið 2019. Til hamingju með glæsilegan árangur og metnaðarfullt umhverfisstarf starfsfólk Umbru!
 
Í dag hlaut embætti Héraðssaksóknara viðurkenningu fyrir að stíga fyrsta Græna skrefið. Það er mikill metnaður fyrir verkefninu innanhúss og starfar öflugt þriggja manna teymi að innleiðingu þess. Það sem skiptir ekki síður máli er stuðningur yfirstjórnar sem svo sannarlega er til staðar hjá Héraðssaksóknara og auðveldar allar breytingar. Ólafur Þór Hauksson, héraðssaksóknari, sagðist við afhendinguna í dag vona að Grænu skrefin stuðli að aukinni starfsánægju og bætti við að verkefnið geti leitt til minni rekstrarkostnaðar hjá embættinu. Starfsmenn embættisins hafa vakið athygli undanfarið þar sem þeir þeysast á milli staða á rafhlaupahjóli, en kaupin á því voru einmitt liður í Grænu skrefunum. Til hamingju með árangurinn og gangi ykkur vel með framhaldið!
 

Velkomin í hópinn, Fjársýsla ríkisins!

Fjársýsla ríkisins búin að stíga sitt fyrsta Græna skref! Þær Ragnheiður Gunnarsdóttir forstöðumaður og Vilborg Hólmjárn hafa umsjón með verkefninu og stefna á að klára annað skref fyrir áramót, enda góður stuðningur innhúss. Alveg til fyrirmyndar! 
 

Annað skref Hafrannsóknastofnunar

Við óskum Hafrannsóknastofnun til hamingju með að hafa lokið Grænu skrefi nr. 2 af 5. Lísa Anne Libungan á Uppsjávarlífríkissviði tók við skrefinu en hún situr í Umhverfisnefnd Hafró. Stofnunin sýnir vilja í verki og að eigin frumkvæði gróðursettu þau nú í vor 77 tré í Heiðmörk. Þar eiga þau reit sem þau kalla Brimgarð og gerðu starfsmenn og fjölskyldur sér glaðan dag, grilluðu og plöntuðu trjám með krökkunum sínum í yndislegu veðri. Framtakið verður endurtekið næsta vor!
 

Evrópsk samgönguvika er hafin

Evrópsk samgönguvika stendur yfir dagana 16.-22. september. Markmið vikunnar er að kynna íbúum í þéttbýli samgöngumáta sem allt í senn eru vistvænir, hagkvæmir og bæta heilsu fólks um leið og þeir hafa jákvæð áhrif á umhverfi og andrúmsloft. Við hvetjum stofnanir til nýta tækifærið þessa vikuna og kynna kosti vistvænna samgöngumáta fyrir starfsfólki sínu. Er einhver starfsmaður innanhúss sem getur deilt reynslu sinni af því að hjóla, ganga eða taka strætó í og úr vinnu? Væri hægt að fá kynningu á hjólasamgöngum í hádegismat eða á starfsmannafundi? Er hægt að setja upp keppni innanhúss, t.d. hvaða deild kemur oftast með vistvænum hætti til/frá vinnu þessa vikuna eða hvaða deild kemur með frumlegasta hætti til vinnu? Endilega virkjið hugmyndaflugið, klæðið ykkur vel og nýtið ykkur Evrópska samgönguviku til þess að upplifa kosti vistvænna samgöngumáta.
 

Öll skrefin í höfn hjá Landsvirkjun

Landsvirkjun hefur nú lokið við að innleiða öll fimm Grænu skrefin í höfuðstöðvum sínum á Háaleitisbraut. Greinilegt er að bakvið metnaðarfullt umhverfisstarf Landsvirkjunar er samstilltur og drífandi hópur af öllum sviðum rekstursins sem lætur verkin tala og velta við hverjum steini. Við óskum Landsvirkjun innilega til hamingju með áfangann!
 

Mötuneyti til fyrirmyndar

Það er gaman að sjá hvað mörg mötuneyti eru farin að vanda til verka þegar kemur að matarsóun, endurvinnslu og að bjóða uppá græna valkosti og þ.a.l. minnka framboð af rauðu kjöti. Í mötuneyti Landsvirkjunar á Háaleitisbraut stendur Ingvar Sigurðsson kokkur vaktina. Ingvar er snillingur í því að fullnýta hráefni og hann sér til þess að allur úrgangur sem fellur til í eldhúsinu sé rétt flokkaður til endurvinnslu. Ingvar býður starfsfólki að taka með sér afganga heim í margnota matarílátum sem það kemur sjálft með. En þá afganga sem eftir verða hikar Ingvar ekki við að nýta í nýjan og girnilegan rétt. Restar gærdagsins verða því kræsingar á ný! Einnig er gaman að segja frá því að vegan úrvalið í hlaðborðinu rýkur út og eftirspurnin eykst stöðugt. 
 
Samgöngu- og sveitarstjórnarráðuneytið og dómsmálaráðuneytið hafa nú innleitt fyrstu þrjú grænu skrefin á einu bretti. Ráðuneytin fengu afhenta viðurkenningu fyrir árangurinn í dag og voru að vonum stolt af sér og sínum. Við óskum ykkur til hamingju og gangi ykkur vel með framhaldið!