Græn skref

 

Græn skref eru leið fyrir opinbera aðila til að vinna markvisst að umhverfismálum eftir skýrum gátlistum og fá viðurkenningu eftir hvert skref. 

Hvernig get ég verið með?

83 stofnanir skráðar til leiks

Húsnæðis- og mannvirkjastofnun (HMS) hefur nú skráð sig til leiks í Grænu skrefin. Stofnanir sem taka þátt í verkefninu eru því orðnar 83 talsins með yfir 290 starfsstöðvar um land allt. Íbúðalánasjóður og Mannvirkjastofnun sameinuðust undir nafni Húsnæðis- og mannvirkjastofnunar í byrjun árs 2020. Sameiningunni er ætlað að stuðla að heildstæðri yfirsýn yfir húsnæðis- og mannvirkjamál á einum stað ásamt því að efla stefnumótun og framkvæmd húsnæðis- og mannvirkjamála til hagsbóta fyrir almenning. 105 manns starfa hjá stofnuninnu og hlökkum við mikið til umhverfissamstarfsins með þeim.
 
Í Grænu bókhaldi eru innbyggðir svokallaðir losunarstuðlar sem gera það að verkum að losun frá helstu uppsprettum gróðurhúsalofttegunda (GHL) í starfseminni reiknast sjálfkrafa. 
 
Starfsstöð Landsvirkjunar á Glerárgötunni á Akureyri hlaut á dögunum viðurkenningu fyrir fimmta og síðasta græna skrefið. Það er til fyrirmyndar hvað vel hefur gengið að innleiða skrefin hjá Landsvirkjun og hefur nú öll hefðbundin skrifstofustarfssemi fyrirtækisins lokið skrefunum. En þau láta ekki þar við sitja og eru nú þegar byrjuð á innleiðingu skrefanna á aflstöðvunum svo sem Blöndu- og Laxárvirkjun. 
 

Fjölbrautaskólinn í Garðabæ stigu 2 skref

Fjölbrautarskóinn í Garðabæ hlaut viðurkenningu fyrir fyrstu 2 grænu skrefin í síðustu viku á setningu Imbrudaga í skólanum. Þema daganna voru umhverfismál og margt áhugavert var í boði fyrir nemendur skólans af bæði fræðslu og vinnustofum, m.a. flutti Andri Snær Magnason fyrirlestur fyrir fullum sal nemenda, Umhverfisstofnun hélt fyrirlestur um matarsóun og Einar Bárðarson sagði frá Votlendissjóði og þeirra góða starfi. 
 

Annað skref Fjársýslu ríkisins

Fjársýsla ríkisins hlaut viðurkenningu fyrir annað græna skrefið um daginn. Vilborg Hólmjárn, sérfræðingur hjá Fjársýslunni, heldur utan um verkefnið af miklum myndarbrag og stefna þau á að taka þriðja skrefið með vorinu.Við óskum þeim innilega til hamingju með árangurinn!
 

Ný útgáfa af grænu bókhaldi

Nú er uppfært excel skjal græna bókhaldsins niðurhalanlegt undir liðnum Grænt bókhald hér á heimasíðunni. Helstu nýmæli eru að hægt er að reikna út losun gróðurhúsalofttegunda frá fleiri þáttum og gerðar voru ýmsar uppfærslur, ítarlegri leiðbeiningar og losunarstuðlar uppfærðir.
 
Embætti lögreglustjórans á Norðurlandi eystra fékk í desember 2019 afhenta viðurkenningu fyrir að hafa lokið innleiðingu á fyrsta Græna skrefinu - fyrst allra lögregluembætta. Allar lögreglustöðvar embættisins taka þátt í verkefninu af fullum krafti, en þær eru staðsettar á Akureyri, Dalvík, Húsavík, Siglufirði og Þórshöfn. Mikill hugur er í starfsfólki embættisins og metnaður til að gera vel í umhverfismálunum. Skilvirkri úrgangsflokkun hefur verið komið upp á öllum stöðvum og leiðbeiningar eru vel sýnilegar starfsmönnum eins og sjá má á meðfylgjandi myndum. Einnig hafa innkaup á ræsti- og hreinsiefnum verið tekin í gegn og umhverfisvottaðar vörur keyptar inn eins og hægt er. Þið eruð frábærar fyrirmyndir fyrir önnur lögregluembætti sem við hvetjum að sjálfsögðu til að skrá sig til leiks. Til hamingju með árangurinn! Sjá frétt RÚV um málið. 
 

Listasafn Íslands taka 2 skref í einu

Listasafn Íslands hlaut í dag viðurkenningu fyrir tvö fyrstu grænu skrefin. Innleiðing verkefnisins hefur gengið hratt og vel fyrir sig, enda hópurinn greinilega samstilltur og áhugasamur um umhverfismál. Við óskum þeim til hamingju með árangurinn og hlökkum til næstu skrefa með þeim!
 

Isavia í Keflavík með þrjú skref

Flugstöð Leifs Eiríkssonar, Þjónustuhús og Flugturn í Keflavík fengu í gær viðurkenningu fyrir að hafa lokið við þriðja Græna skrefið. Í Keflavík starfar öflug umhverfisdeild sem farið hefur fyrir innleiðingu Grænu skrefanna í starfseminni. Mikil áhersla hefur verið lögð á fræðslu til starfsmanna og rekstaraðila og að virkja þá til góðra verka. Sorpmálin hafa verið tekin föstum tökum og geta starfsmenn, rekstraraðilar og gestir flugvallarins flokkað sitt sorp. Starfsmenn umhverfisdeildar hafa lagt sig fram við að gera upplýsingar um flokkun eins skýrar og hægt er bæði með því að nota myndmál og þau tungumál sem töluð eru á vinnustaðnum. Hér má til að mynda sjá leiðbeiningar um flokkun eftir rýmum og ítarlegri leiðbeiningar og myndbönd hér. Í mötuneyti starfsmanna hafa diskar verið minnkaðir í viðleitni til að sporna við matarsóun og í nóvember síðastliðnum var matarsóun í mötuneyti mæld yfir þriggja vikna tímabil til að vekja starfsmenn til vitundar um umfang sóunar. Fróðlegt er að lesa umhverfiskaflann í ársskýrslu Isavia frá árinu 2018 en þar má kynna sér hvað fyrirtækið hefur verið að gera í umhverfis- og loftslagsmálum, hljóðvist og endurvinnslu. Við óskum Isavia á Keflavíkurflugvelli innilega til hamingju með árangurinn og hlökkum til að vinna áfram með þeim í Grænu skrefunum!
 

Vegagerðin á fullri ferð

Vegagerðin keyrir Grænu skrefin áfram af öryggi! Í desember sem leið hlaut þjónustustöðin á Akureyri viðurkenningu fyrir skref 2. og 3. og þjónustustöðin á Sauðárkróki fyrir að ljúka öðru skrefinu. Sóley Jónasdóttir fulltrúi grænna skrefa hjá Vegagerðinni á Norðursvæði heldur vel utan um verkefnið og hvetur starfsfólkið til dáða og heldur öllum vel upplýstum. Við umsjónarmenn verkefnisins sjáum hvað slíkt utanumhald er mikilvægt því það er í mörg horn að líta í umhverfismálunum.
 
Við bjóðum Landspítalann velkominn til leiks! Til að byrja með mun starfsstöð spítalans við Skaftahlíð innleiða skrefin en þar starfa 270 manns. Öflugt umhverfisstarf hefur verið unnið á Landspítalanum um árabil svo búast má við því að Grænu skrefin verði starfsfólki auðveld viðureignar. 
 
Við bjóðum Póst- og fjarskiptastofnun velkomna til leiks í Grænum skrefum. Hjá stofnuninni starfa 27 manns og hlökkum við til að vinna með þeim að umhverfismálunum. Með þessari skráningu eru 81 stofnun þátttakendur í verkefninu.
 

Lagafrumvarp sem tekur á plastvandanum

Umhverfis- og auðlindaráðuneytið hefur kynnt í samráðsgátt stjórnvalda drög að breytingum á lögum um hollustuhætti og mengunarvarnir. "Verði frumvarpið að lögum munu nokkrar algengar gerðir af plastvörum verða bannaðar á Íslandi. Þetta eru t.d. plastdiskar, plasthnífapör, plaströr og bollar úr frauðplasti. Við getum svo vel notað aðra hluti í staðinn. Frumvarpsdrögin gera líka ráð fyrir að einnota plastbollar og -matarílát sem maður fær t.d. á skyndibitastöðum megi ekki lengur vera ókeypis", segir Guðmundur Ingi, umhverfisráðherra. Í frumvarpinu er einnig kveðið á um sérstaka merkingu sem tilteknar einnota plastvörur eiga að bera um meðhöndlun vörunnar eftir notkun og þau neikvæðu áhrif sem varan hefur berist hún út í umhverfið. 
 

Bílar ríkisins verða umhverfisvænir

Ríkisstjórnin hefur samþykkt að innleiða nýja stefnu sem tryggir að ríkisstofnanir kaupi umhverfisvænni bíla en innleiðing vistvænni ökutækja er á meðal aðgerða á aðgerðaráætlun ríkisstjórnarinnar í loftslagsmálum. Með aðgerðunum má draga úr heildarlosun ríkisins vegna ökutækja á skömmum tíma. Að auki er rekstrarkostnaður vistvænna bifreiða lægri og heildarlíftímakostnaður og vistferilskostnaður tækjanna minni. Sjá nánar á vef Stjórnarráðsins
 

Umbra klárar 4. skrefið

Umbra - þjónustumiðstöð Stjórnarráðsins hefur nú stigið 4. Græna skrefið en einungis tveir mánuðir eru síðan þau fengu viðurkenningu fyrir skref 2 og 3. 80% af úrgangi stofnunarinnar fer til endurvinnslu og í viðleitni til að draga úr myndun úrgangs er verið að koma fyrir handblásurum á flestum salernum, en með því dregur verulega úr notkun einnota handþurrka. 13 hleðslustöðvar fyrir rafbíla starfsmanna, 2 fyrir gesti og 5 fyrir ráðherrabíla eru staðsettar við Umbru - geri aðrir betur! Til lukku með árangurinn starfsfólk Umbru.
 

Veðurstofan stígur 3 skref í einu

Veðurstofa Íslands hefur nú fengið viðurkenningu fyrir að stíga fyrstu þrjú Grænu skrefin. Öflugt umhverfisstarf hefur verið unnið á stofnuninni um árabil og ljóst að það er rótgróið í menningu vinnustaðarins að huga að umhverfinu í hvívetna. Nýtni er í hávegum höfð og fá starfsmenn sem vilja t.a.m að eiga raftæki sem stofnunin hefur ekki þörf fyrir lengur. Þegar skrifborð eru endurnýjuð er einungis skipt um borðplötur og fæturnir nýttir áfram. Starfsfólk Veðurstofunnar eru miklir hjólreiðagarpar og hjóla margir til og frá vinnu allt árið um kring. Aðstaða fyrir hjólandi og gangandi er til fyrirmyndar, hægt er að geyma hjól í læstum rýmum og búningsherbergi með sturtum til staðar fyrir bæði kyn. Á hverju vori er hjólaviðgerðardagur þar sem starfsfólk aðstoðar hvert annað við að yfirfara og gera hjólin klár fyrir sumarið. Stofnunin skaffar svo það sem þarf til viðgerða. Veðurstofan hefur tekið þátt í Hjólað í vinnuna í mörg ár og oftar en ekki fengið viðurkenningu fyrir góðan árangur. Starfsfólk og gestir á rafbílum þurfa ekki að örvænta því sex hleðslustöðvar eru staðsettar á bílapani Veðurstofunnar. Til hamingju með glæsilegan árangur Veðurstofa Íslands!
 

ÍSOR stígur 3. skrefið

Innleiðing Grænu skrefanna hefur gengið hratt og örugglega fyrir sig hjá ÍSOR. Viðurkenningu fyrir fyrsta skrefið hlutu þau í janúar 2018 og í dag fengu þau viðurkenningu fyrir það þriðja. Samhliða afhendingu 3. skrefsins fékk stofnunin sömuleiðis silfur í Hjólavottun vinnustaða en öflug hjólreiðamenning er til staðar meðal starfsfólks ÍSOR og aðstaðan eftir því. Flokkun úrgangs er tekin föstum tökum og eru skýrar leiðbeiningar sýnilegar starfsmönnum, bæði á íslensku og ensku. Í viðleitni til að sporna gegn matarsóun hefur stofnunin innleitt skráningarkerfi í mat og sett upp skemmtilega áminningarmiða í matsal. Til hamingju með árangurinn ÍSOR!
 

Vegagerðin á Húsavík

Þjónustustöð Vegagerðarinnar á Húsavík hlaut viðurkenningu fyrir 1. græna skrefi í lok nóvember. Mikill metnaður er í þeim köppum að fylgja ákvæðum skrefanna og örugglega stutt að bíða þess að þeir stígi skref nr. 2. Hópurinn á myndinni stendur hér fyrir aftan sérsmíðaða glæsilega hjólagrind, prýðis aðstaða fyrir hjólandi starfsfólk sem og gestikomandi. Óskum þeim til hamingju með skrefið!  
 

80 þátttakendur í Grænum skrefum

Landhelgisgæsla Íslands hefur nú skráð sig til leiks í Grænu skrefin og eru því alls 80 ríkisstofnanir sem taka þátt í verkefninu. Hjá Landhelgisgæslunni starfa 200 manns við margvísleg verkefni, svo sem leit og björgun, löggæsluverkefni, sjómælingar á öruggum siglingarleiðum og önnur sérhæfð verkefni. Höfuðstöðvar Landhelgisgæslunnar eru í Skógarhlíð í Reykjavík en starfsstöðvar eru líka á Keflavíkurflugvelli og Reykjavíkurflugvelli, í skipum og ratsjárstöðvum. Við bjóðum Landhelgisgæslu Íslands innilega velkomna í Grænu skrefin. 
 
Í skrefi tvö í Grænu skrefunum snýr ein aðgerð að vistakstri en hún hljóðar svona: "Starfsfólk okkar sem notar bíl mikið vegna vinnu sinnar hefur farið á vistakstursnámskeið". Hér höfum við einnig hvatt stofnanir til að fá fyrirlestur um vistakstur fyrir allt starfsfólk enda fræðsla sem á sannarlega erindi við alla sem nota bíl, hvort sem það er í leik eða starfi. Með því að breyta ökuhegðun okkar og temja okkur vistakstur stuðlum við að minni útblæstri og mengun, minnkum slit á dekkjum og vegum og drögum þannig úr magni svifryks í umhverfinu og spörum auk þess pening. Starfsfólk Þjóðskrár Íslands fékk fyrirlestur um vistakstur á dögunum og starfsfólk Vatnajökulsþjóðgarðs skellti sér á vistakstursnámskeið í Ökuskólanum í Mjódd. "Þjóðgarðurinn okkar er stór og dreifður og þurfa starfsmenn stundum að aka langar leiðir til að sinna verkefnum og því er mikilvægt að temja sér vistakstur. Með slíku ökulagi er hægt að minnka orkunotkun bifreiða um 10-15% auk þess sem vistakstur getur stuðlað að meira akstursöryggi. Starfsfólk þjóðgarðsins lærði margt nýtt á vistakstursnámskeiðinu og hlökkum við til að sjá árangurinn í grænu bókhaldi þjóðagarðsins", segir í frétt á vef Vatnajökulsþjóðgarðs.