Markmið Grænu skrefanna er að efla umhverfisstarf ríkisaðila. Samkvæmt Loftlagsstefnu Stjórnarráðsins verða gerðar kröfur um að allar ríkisstofnanir uppfylli öll fimm Grænu skrefin fyrir árslok 2021.

Hægt er að styðjast við Grænu skrefin við gerð umhverfis- og loftlagsstefnu. Samkvæmt lögum um loftlagsmál (nr. 70/2012, 5.gr.c) skulu stofnanir ríkisins og fyrirtæki í meirihlutaeigu ríkisins setja sér loftlagsstefnu. Stefnan skal innihalda skilgreind markmið um samdrátt í losun gróðurhúsalofttegunda og kolefnisjöfnun starfseminnar ásamt aðgerðum svo að þeim markmiðum verði náð.

Verkefnið Græn skref í ríkisrekstri á rætur sínar að rekja til stefnu ríkisins fyrir árin 2013 – 2016 um Vistvæn innkaup og grænan ríkisrekstur, en á þeim tíma kom fram skýr vilji hjá mörgum ríkisstofnunum að draga úr neikvæðum umhverfisáhrifum, innleiða Grænt bókhald og auka þekkingu starfsfólks á umhverfismálum. Græn skref í ríkisrekstri fór formlega af stað í nóvember árið 2014. Fyrr á árinu höfðu nokkrar stofnanir Umhverfis-, orku- og loftslagsráðuneytisins prufukeyrt aðferðina og hjálpað til við að aðlaga Grænu skrefin að skrifstofustarfssemi ríkisins.

Grænu skrefin eru uppfærð reglulega til að endurspegla áherslur stjórnvalda og nýjustu þekkingu. Einnig er reynt að taka mið af reynslu og ábendingum frá þátttakendum við uppfærslu skrefanna.

Með góðfúslegu leyfi var verkefnið byggt á Grænum skrefum Reykjavíkurborgar, en Reykjavíkurborg hafði þá þróað aðferðafræðina með innblæstri frá verkefninu Green offices í Harvard háskóla í Bandaríkjunum.

Grænu skrefin eru fjármögnuð af Umhverfis,- orku- og loftslagsráðuneytinu en umsjón og rekstur verkefnisins er í höndum Umhverfisstofnunar.